ເສດຖະກິດໝັ້ນຄົງແຮງງານຍືນຍົງ

- advert banner 728 90 728x90 - ເສດຖະກິດໝັ້ນຄົງແຮງງານຍືນຍົງ

- tnews 1499169403 7998 - ເສດຖະກິດໝັ້ນຄົງແຮງງານຍືນຍົງ

ໂດຍ: ກ້ອງສ່ອງ ອິດສະຫລະ

​​ພາຍຫລັງ​ລັດຖະບານ​ໄທ​ໄດ້​ປັບປຸງ​ລັດຖະທໍາ​ມະນູນ ​ແລະ ​ກົດໝາຍ​​ ເພື່ອ​ຈໍາກັດ ​ແລະ​ຫລຸດ​ຊ່ອງຫວ່າງ​ບັນດາປາກົດ​ການ​ຫຍໍ້​ທໍ້​ທີ່​ເກີດ​ຂຶ້ນ​ພາຍ​ໃນ​ປະ​ເທດ​ເຊັ່ນ: ການ​ຄ້າ​ມະນຸດ, ​ຢາ​ເສບ​ຕິດ ​ແລະ ​ການ​ສວຍ​ໂອ​ກາດ​​ສໍ້​ໂກງ​ທຸກ​ຮູບ​ແບບຢູ່ພາຍ​ໃນ​ປະ​ເທດ ​ກໍ​ໄດ້​ສົ່ງ​ຜົນ​ກະທົບຕໍ່​ແຮງ​ງານ​ລາວ​ທີ່​ໄປ​ຮັບຈ້າງ​ຫາ​​ເ​ງິນຢູ່​ໄທຈໍານວນ​ຫລາຍ​ແສນ​ຄົນ​ຕ້ອງ​ໄດ້​ຫອບ​ເອົາ​ຊີວິດ​ແລະ ​ເຄື່ອງ​ຂອງ​ກັບພູມ ລໍາເນົາ. ບັນຫາທີ່​ທາງ​ການ​ໄທ​ໄດ້​ປະຕິບັດ​ການ​ເຊັ່ນ​ນີ້​ໜຶ່ງ​ໃນນັ້ນ​ກໍ​ຄືແກ້​ໄຂບັນຫາ​ແຮງ​ງານ​ຕ່າງ​ດ້າວຜິດລະບຽບກົດໝາຍ (​ແຮງ​ງານ​ເຖື່ອນ)​ ໃຫ້​ເຂົ້າ​ສູ່ລະບົບ​ແລະ​ ຖືກຕ້ອງ​ຕາມ​​ກົດໝາຍ​.

​ເມື່ອ​ຖາມ​ວ່າ​ເປັນ​ຫຍັງ​ຄົນ​ລາວ​ເຮົາ​ຈຶ່ງ​​ພາກັນຫລັ່ງໄຫລ​ໄປ​ຮັບຈ້າງຫາ​ເງິນ​ຢູ່​ປະ​ເທດ​ໄທ ? ຖ້າ​ຈະ​ໃຫ້​ຜູ້​ຂຽນ​ຕອບ​ມັນ​ກໍ​ຍ້ອນ​​ເງື່ອນ​ໄຂ ​ແລະ ​ປັດ​ໄຈຫລາຍ​ດ້ານ​ ເປັນ​ຕົ້ນ​ແມ່ນປະເທດ​ລາວ​ກັບ​ໄທ​ເປັນ​ເພື່ອນ​ບ້ານໃກ້​ຄຽງ, ​ເປັນ​ບ້ານ​ອ້າ​ຍ​ເມືອງ​ນ້ອງ ທັງ​ເປັນ ສາຍ​ຍາດ​ຕິດ​ຕໍ່​ໜໍ່​ເນືອງ ອັນ​ສໍາຄັນໃນ​ບາງ​ທ້ອງ​ຖິ່ນ​ເຂົາ​ຍັງ​ມີ​ພໍ່ແມ່, ​ປູ່ຍ່າຕານາຍ, ມີ​ລູກ​ມີຫລານ, ລຸງ​ປ້າ​ອາວ​ອາ. ​ນີ້​ລະ​ຄື​ນິຄະ​ຊາດ​ຕັດຂາດ​ກັນ​ບໍ່​ໄດ້ ​ເວົ້າ​ສະ​ເພາະ​ແມ່ນຄົນລາວ​ທົ່ວພາກ​ອີສານ.​ ໃນ​ສະໄໝ​ປະຫວັດກ່ອນໜ້າ​ນີ້​​ເຄິ່ງສະຕະວັດ​ການ​ໄປມາຫາສູ່​ກັນລະຫວ່າງ​ສອງຝັ່ງ​ແມ່​ນ້ຳຂອງບໍ່​ມີ​ຮອດ​ບັດ​ຜ່ານ​ແດນ, ​ໃຜ​ຢາກ​ໄປ​ກໍ​ຂີ່​ເຮືອ​ຂ້າມ​ຂອງ​ໄປ ຫລື ​ໃຜ​ຢາກ​ມາ​ກໍ​ຂີ່​ເຮືອ​ຂ້າມຂອງ​ມາ​. ອັນ​ສອງ​ຍ້ອນ​ມີນາ​ຍໜ້າ​ມາຫາ​ເລາະ​ໂຄສະນາ​ຫາ​ກິນ​​ເຖື່ອນ ເພື່ອຕົວະ​ຍົວະຫລອກ​ລວງ​ເອົາ​ຄົນ​ລາວ​ໄປ​ຂາຍ​​ແຮງ​ງານ​ຢູ່​ໄທວ່າ​ໄດ້​ຮັບ​ເງິນ​ດີ​ມີ​​ເງິນຫລາຍ ວ່າ​ຊັ້ນ ! ອັນ​ທີ​ສາມ​ແມ່ນ​ເຫັນ​ວ່າ​ເສດຖະກິດຂອງ​ໄທ​ເຂັ້ມ​ແຂງກວ່າ​ລາວ​ໃນ​ຫລາຍ​ດ້ານ ຄ່າ​ແຮງ​ງານ​ກໍ​ສູງ​ກວ່າ​​​​ ຈາກ​ນັ້ນ​ໃຜ​ກໍ​ພາກັນ​ເຫີ່.

ຈາກ​ເຫດຜົນ​ທີ່ຜູ້​ຂຽນ​ໄດ້ຍົກ​ມາ​ນັ້ນ, ຈຶ່ງ​ເປັນ​ເຫດ​ໃຫ້​ຄົນ​ລາວ​ເຮົາ​ ໂດຍ​ສະ​ເພາະ​ແມ່ນ​ຊາວ​ໜຸ່ມ​ຍິງ​ຊາຍ​ຢູ່​ແຖວ​ຊົນນະບົດ​ພາ ກັນຫລັ່ງໄຫລໄປ​ຮັບຈ້າງຫາ​ເງິນຢູ່​ໄທ​ໃນ​ແຕ່ລະ​ເດືອນ​ແຕ່ລະ​ປີຫລາຍ​ຮ້ອຍຫລາຍພັນ​ຄົນ.​ ໃນ​ສະໄໝ​ກ່ອນ​ການ​ໄປ​ເຮັດວຽກ ຫລື ​ໄປ​ຢາມ​ພີ່ນ້ອງ​ຢູ່​ເມືອງ​ໄທ​ບໍ່​ມີ​ຮອດ​ເອກະສາ​ນ, ສົມທົບ​ກັບ​ທາງການ​ໄທ​ພວກ​ເພິ່ນກໍ​ຍັງບໍ່​ທັນ​​ເຄັ່ງ​ຂັດ​ໃນ​ການກວດກາພີ່ນ້ອງຄົນ​ລາວ​ທີ່​ເດີນທາງ​ໄປ​ໄທ​, ​ແຕ່​ປັດຈຸບັນ​​​ເຫັນ​ວ່າຢືນ​ຢູ່​ໃນ​ຖານະ​ຄົນ​ລະ​ປະເທດ​ ກໍ​ຕ້ອງ​ໄດ້​ມີ​ເອ​ກະສາ​ນຢ່າງ​ຄົບ​ຖ້ວນ​, ກົງກັນຂ້າມຖ້າ​ບໍ່ຖືກ​ຕ້ອງຕາ​ມຂໍ້​ກໍານົດກົດໝາຍເພິ່ນກໍວ່າ​ເຂົ້າ-ອອກ​ເມືອງ​ຜິດ​ກົດໝາຍ​ ບໍ່​ວ່າຢູ່​ບ້ານ​ເພິ່ນ​ ​ແລະ ​ບ້ານ​​ເຮົາ. ​​ສະພາບ​ການ​ໄປ ເຮັດວຽກ​ຢູ່​ໄທເວົ້າ​ເຖິງ​ຜູ້​ໃຊ້​ແຮງ​ງານ ຫລືວ່າ ນາຍ​ຈ້າງ​ໃນ​ຜ່ານ​ມາກໍ​ຄື​​​ໄລຍະປັດຈຸ​ບັນ​ຜູ້ດີ​ກໍ​ດີ​, ຕໍ່​ຜູ້​ບໍ່​ດີ​ກໍ​ມີຫລາຍ​ອັນຫລາຍ​ຢ່າງ​ເຊັ່ນ:​ ຫລອກ​ລວງ​ຕົ້ມຕຸ​ນ, ບາງ​ຄົນ​ກໍ​ຖືກ​ຂາຍ​ໂຕ, ຖືກທຸບ​ຕີ​ທໍລະມານ​ຢ່າງ​ແສນສາຫັດ, ຈໍາກັດ​ການ​ໄປມາ​ ໃນ​ບໍ່​ໃຫ້ອອກ​ນອກ​ບໍ່ໃຫ້​ເຂົ້າ ​ກາຍ​ເປັນ​ທາດ​ຂອງ​ຄົນ​ໂກງ ຫລື ບາງ​ກໍລະນີ​ກໍ​ທຸບ​ຕີຈົນເຖິງ​ຂັ້ນ​ເສຍ​ຊີວິດ​ ແລະ ​ຫາຍ​ຕົວ​ໄປ​ແບບ​ບໍ່​ມີ​ຮ່ອງຮອຍ. ນີ້​ລະ​ຄື​ຜົນ​ທີ່​ໄດ້​ຮັບ​ຈາກ​ການ​ໄປເຮັດວຽກ​ຕາມ​ລໍາພັງຂອງ​ຄົນ​ລາວ​ທີ່​ຍັງ​ບໍ່​ທັນ​ຮູ້​ອີ່​ໂນ່ອີ່​ເນ່.

- Tiger Head 728x90 - ເສດຖະກິດໝັ້ນຄົງແຮງງານຍືນຍົງ
- 1 1 - ເສດຖະກິດໝັ້ນຄົງແຮງງານຍືນຍົງ

​ເຖິງ​ຢ່າງ​ໃດ​ກໍ​ດີ, ຕາມ​ຜູ້​ຂຽນວ່າ​ໃນ​ຫລາຍ​ປີຜ່ານມາ​ພັກ ​​ແລະ ລັດຖະບານ​ເຮົາ ​ກໍ​ໄດ້​ພະຍາຍາມ​ເອົາ​ໃຈ​ໃສ່​ແກ້​ໄຂຢ່າງ​ບໍ່​ລົດ​ລະຕໍ່​ພວກ​ທີ່​ໄປມາ​​​ແບບ​ບໍ່​ຖືກຕ້ອງ​ຕາມ​ລະບຽບກົດໝາຍ ໂດຍ​ສະ​ເພາະແມ່ນນັບ​ແຕ່​ປະ​ເທດ​ເຮົາ​ໄດ້​ເຂົ້າ​ກຸ່ມ​ອາ​ຊຽນມານີ້​ ກໍ​ຍິ່ງໄດ້ ພ້ອມ​ກັນ​ຄົ້ນ​ຄວ້າ​ແກ້​ໄຂ ​​ແລະ ຮ່ວມມື​ກັນ​ເພື່ອ​ເຮັດ​ໃຫ້​ສະຖານະ​ພາບ​ແຮງ​ງານ​ຖືກຕ້ອງຕາ​ມລະບຽບ​ກົດໝາຍ ເຊິ່ງ​ມາ​ຮອດ​ປັດ ຈຸບັນ​ກໍ​ສາມາດ​ແກ້​ໄຂ ​ແລະ ​ປະສານ​ງານ​ຮ່ວມ​ກັນ​ໂດຍ​ມີ​ຂັ້ນ​ຕອນ​ປະຕິບັດວຽກ​ຫລາຍ​ຢ່າງ ​ຄື​ໄດ້​ເກັບ​ກໍາສອບ​ຖາມ​ຂໍ້​ມູນ​ພື້ນຖານ​ພົນລະ​ເມືອງ​ລາວ ​ເພື່ອ​ຢັ້ງຢືນ​ສະຖານະ​ພາບ​ຢ່າງ​ລະອຽດ,​ ເກັບ​ກໍາ​ຂໍ້​ມູນ​ພື້ນຖານສະຖານະ​ພາບ​ການເຂົ້າ​-ອອກເມືອງ​ ເພື່ອ​ອອກ ໜັງສື​ເດີນທາງ, ອອກ​ບັດ​ເຮັດວຽກ​ຢູ່​ຕ່າງປະ​ເທດ​ໃຫ້, ອອກ​ລະບຽບ​ໃນ​ການ​ຄຸ້ມ​ຄອງ​ແຮງ​ງານຮ່ວມ​ກັນ​ ແລະ ​ອື່ນໆ. ຕໍ່ບັນຫາ​ທີ່​ກ່າວ​ມາ​​ນີ້​ບໍ່​ແມ່ນ​ເວົ້າ​ແຕ່​ປາກ​ລ້າ​ໆ ຍັງ​ໄດ້​ມີ​ການ​ເຊັນ​ຂໍ້​ຕົກ​ລົງ​ຮ່ວມ​ມື​ກັນ​ຄັກ​ແນ່. ສໍາລັບ​ຝ່າຍ​ໄທ​ເອງ​ເພິ່ນ​ກໍ​ຍິນ​ດີ​ຈະ​ສ້າງ​ລະບົບ​ໂປຣ​ແກຣມ​ຈັດ​ຄິວ​ແຮງ​ງານ​ເຂົ້າ​ສູ່​ຂະ​ບວນການ​ປັບ​ສະຖານະ​ພາບປະສານ​ງານ​ໃນ​ເວລາ​ເຂົ້າ-​ອອກ​ເມືອງໃນ​ທຸກ​ຂອດ​ຕາມ​ລະ ບຽບຫລັກການ​ຂອງ​ຝ່າຍ​ໄທ​ຢ່າງ​ເຂັ້ມ​ງວດ ​ແລະ ອັນ​ສໍາຄັນ​ກໍແມ່ນ​ບັນຫາຄວາມປອດ​ໄພ​ທຸກ​ຢ່າງ​ໃຫ້​ແກ່​ສະຖານະ​ພາບ​ແຮງ​ງານ​ລາວ​ທີ່​ໄດ້​​ເຂົ້າ​ໄປ​ເຮັດ​ວຽກ​ຢູ່​ໄທ. ນີ້​ຄື​ບາດກ້າວ​ອັນ​ສໍາຄັນ​ໃນ​ການ​ພົວພັນ​ຮ່ວມ​ມື​ຂອງ​ສອງ​ຝ່າຍ​ທັງ​ລາວ ​ແລະ ​ໄທ ກໍ​ຄື​ຂະ​ແໜງ​ການ​ທີ່​ກ່ຽວຂ້ອງ.

ຕາມ​ຜູ້​ຂຽນ​ຄິດ, ອີກ​ສິ່ງ​ໜຶ່ງ​ເພື່ອ​ຊອກ​ຫາ​ທາງ​ອອກ​ໃຫ້​ແຮງ​ງານ​ລາວ​ຊອກ​ຢູ່​ຫາ​ກິນ​ພາຍໃນ​ປະ​ເທດ, ​ເປັນ​ການ​ເພີ່ມກໍາລັງ​ແຮງ​ການ​ຜະລິດ​ຢູ່​ພາຍ​ໃນ​ໃຫ້​ເສດຖະກິດ​ເຕີບ​ໃຫຍ່​, ​ເປັນ​ການ​ສະກັດ​ກັ້ນ​ແຮງ​ງານ​ພາຍ​ໃນ​​ອອກ​ໄປ​ຕ່າງປະ​ເທດ​ ຄວນ​ໄດ້ມີການ ຄົ້ນຄວ້າເພີ່ມອັດຕາ​ຄ່າ​ແຮງ​ງານ​ຕໍ່າໃຫ້ຫລາຍກວ່າ 9 ແສນກີບຂຶ້ນ​ໄປ ​ເພື່ອໃຫ້​ມີ​ການ​ທຽບ​ຖານກັບບັນດາປະ​ເທດ​​ໃນ​ກຸ່ມ​ອາ​ຊຽນ. ຖ້າ​ພວກເຮົາ​ປັບ​ເງື່ອນ​ໄຂ​ນີ້​ໄດ້​ ການ​ນໍາ​ໃຊ້​ແຮງ​ງານຢູ່​ພາຍ​ໃນ​ກໍ​ຈະ​ໝັ້ນຄົງ​ ແລະ​ ຍືນ​ຍົງ ​ແລະ ​ແຮງ​ງານ​ກໍບໍ່​ຫລັ່ງໄຫລ​ອອກ​ໄປຕ່າງປະ​ເທດ​ ເພາະ​ຜ່ານ​ມາແຮງ​ງານ​ພາຍ​ໃນ​​ຖືກ​ຜູ້​ລົງທຶນ​​​ເອົາປຽບຕະຫລອດມາ ຍ້ອນ​ຄ່າ​ແຮງ​ງານ​ຕໍ່າ​ເກີນ​ໄປ.

 

error: Content is protected !!