ຕ້ານໂຄວິດ-19 ບົນຈິດໃຈເປັນເຈົ້າຕົນເອງ

ຕ້ານໂຄວິດ-19 ບົນຈິດໃຈເປັນເຈົ້າຕົນເອງ - 245011174 1947158022118474 3393338224779867170 n scaled - ຕ້ານໂຄວິດ-19 ບົນຈິດໃຈເປັນເຈົ້າຕົນເອງ
ຕ້ານໂຄວິດ-19 ບົນຈິດໃຈເປັນເຈົ້າຕົນເອງ - AGL banner - ຕ້ານໂຄວິດ-19 ບົນຈິດໃຈເປັນເຈົ້າຕົນເອງ

ໂດຍ: ທິດກໍ່າ

ໄດ້ຫລາຍວັນແລ້ວ ຢູ່ໃນນະຄອນຫລວງວຽງຈັນເຫັນວ່າທາງເຈົ້າໜ້າທີ່ຕຳຫລວດ ແລະ ອຳນາດການປົກຄອງທຸກຂັ້ນໄດ້ເລີກຮື້ບັນດາຈຸດຫ້າມຜ່ານຕາມເສັ້ນທາງຫລັກໆ ເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ອັນສາເຫດກໍຍ້ອນວ່າເຖິງຈະໃຊ້ການເກືອດຫ້າມ ແລະ ຕັນເສັ້ນທາງຫ້າມບໍ່ໃຫ້ຄົນໄປມາ ແຕ່ກໍຍັງມີຜູ້ຂໍອະນຸຍາດຜ່ານໄປມາຢ່າງບໍ່ຂາດສາຍ. ໃນຈຳນວນຜູ້ຂໍຜ່ານໄປມານັ້ນ ສ່ວນຫລາຍເຂົາກໍວ່າມີຄວາມຈຳເປັນ, ບາງຄົນເຂົາກໍມີໃບຢັ້ງຢືນຈາກກົມກອງ ຫລື ຈຳນວນໜຶ່ງກໍໄປວຽກໄປງານ, ຊອກຢູ່ຫາກິນທຳການຜະລິດທຸລະກິດ ແລະ ສ່ວນຫລາຍກໍວ່າໄດ້ສັກຢາຄົບສອງເຂັມແລ້ວ. ສະຫລຸບແລ້ວ ການຕັ້ງດ່ານໃນຖະໜົນຫລວງສາຍຫລັກໆໃນນະຄອນຫລວງວຽງຈັນນັ້ນ ເຫັນວ່າບໍ່ມີປະສິດທິຜົນເຕັມຮ້ອຍ.

ສ່ວນເຫດຜົນອັນທີສອງນັ້ນ ແມ່ນເພື່ອຮັກສາຄວາມສົມດູນທາງດ້ານເສດຖະກິດ ເພາະນຄອນຫລວງວຽງຈັນເປັນສູນກາງເສດຖະກິດຂອງປະເທດ ແລະ ຍັງມີຫລາຍຂົງເຂດທີ່ຕ້ອງສູ້ຊົນບຸກບືນໃສ່ຕົວເລກຄາດໝາຍຕາມມະຕິຄັ້ງທີ XI ຂອງພັກໄດ້ວາງອອກ. ຍ້ອນເຫັນບັນຫາດັ່ງກ່າວ ຈຶ່ງມີວິທີທາງອອກໃຫ້ປິດການສັນຈອນສະເພາະແຕ່ບ້ານແດງ ໂດຍໃຫ້ປິດຕາມທາງຮ່ອມທາງຊອຍ, ບໍ່ໃຫ້ປິດຖະໜົນໃຫຍ່ສາຍຫລັກໆ ອັນເປັນສາຍເລືອດຫລໍ່ແຫລມໃນການໄປມາຊອກຢູ່ຫາກິນທຳທຸລະກິດການງານເພື່ອມີທາງອອກໃນການສ້າງເສດຖະກິດກຸ້ມຕົນເອງ, ເພິ່ນຕົນເອງໃຫ້ຢູ່ລອດໃນຊ່ວງໄລຍະວິກິດຈາກໂຄວິດ-19.

ຫາກຕັ້ງໂຈດກັນວ່າ, ໃນເມື່ອເປີດເສັ້ນທາງໄປມາສະດວກສະບາຍຄືແນວນີ້, ບັນຫາການຕ້ານການແຜ່ລະບາດຂອງໂຄວິດ-19 ມັນຈະຮັບປະກັນບໍ່ ? ຄຳຕອບກໍຄື ໃຫ້ທຸກຄົນກຸ້ມຕົນເອງພໍໃຜພໍລາວ ມັນເປັນວິທີທາງອອກທີ່ດີທີ່ສຸດ. ໝາຍວ່າຖ້າຜູ້ໃດບໍ່ຢາກຕິດເຊື້ອໂຄວິດ-19 ກໍຢ່າພາກັນໄປທົ່ວທີບ, ພະຍາຍາມຮັກສາໂຕເອງໃຫ້ດີ ບໍ່ໄປຫລິ້ນ, ບໍ່ໄປທ່ຽວໃນແຫລ່ງຊຸມຊົນ, ບໍ່ໄປຊຸມໄປແຊວໃນຈຸດທີ່ມີຄວາມສ່ຽງ ກໍເປັນອັນວ່າຈົບເລື່ອງ. ນອກຈາກນັ້ນ ຖ້າຜູ້ໃດເປັນຕົ້ນເຫດໃນການນຳເຊື້ອມາຕິດໃສ່ໝູ່ກໍຈະໄດ້ຖືກດຳເນີນຄະດີຕາມກົດໝາຍເຊັ່ນ: ຈຳຄຸກ ຫລື ທັງຈຳທັງປັບຕາມແຕ່ລະກໍລະນີ ນັບແຕ່ນ້ອຍຫາໃຫຍ່ ດັ່ງທີ່ໄດ້ປະກາດໄປແລ້ວວ່າ: ຖ້າແມ່ນບຸກຄົນປັບໃໝ 3 ລ້ານ, ນິຕິບຸກຄົນປັບໃໝ 10 ລ້ານ. ວິທີການນີ້ເຂົາເອີ້ນວ່າຕ້ານໂຄວິດ-19 ບົນຈິດໃຈເປັນເຈົ້າຕົນເອງພໍໃຜພໍລາວມັນຈຶ່ງສັກສິດ.

ຕ້ານໂຄວິດ-19 ບົນຈິດໃຈເປັນເຈົ້າຕົນເອງ - lattana banner 1 - ຕ້ານໂຄວິດ-19 ບົນຈິດໃຈເປັນເຈົ້າຕົນເອງ
ຕ້ານໂຄວິດ-19 ບົນຈິດໃຈເປັນເຈົ້າຕົນເອງ - lattana banner - ຕ້ານໂຄວິດ-19 ບົນຈິດໃຈເປັນເຈົ້າຕົນເອງ
ຕ້ານໂຄວິດ-19 ບົນຈິດໃຈເປັນເຈົ້າຕົນເອງ -    AD conten website - ຕ້ານໂຄວິດ-19 ບົນຈິດໃຈເປັນເຈົ້າຕົນເອງ
error: Alert: ເນື້ອຫາຂ່າວມີລິຂະສິດ !!