ລ້ຽງງົວ ແລະ ລ້ຽງແບ້ ສ້າງລາຍໄດ້ 100 ລ້ານກວ່າກີບຕໍ່ປີ

- 244760730 585945702854134 7802873200231021705 n - ລ້ຽງງົວ ແລະ ລ້ຽງແບ້ ສ້າງລາຍໄດ້ 100 ລ້ານກວ່າກີບຕໍ່ປີ
- AGL banner - ລ້ຽງງົວ ແລະ ລ້ຽງແບ້ ສ້າງລາຍໄດ້ 100 ລ້ານກວ່າກີບຕໍ່ປີ

ທ່ານ ຟົງຊົງ ສະມາຊິກຊາວໜຸ່ມໜ່ວຍຮາກຖານຄະນະໂຄສະນາອົບຮົມແຂວງອຸດົມໄຊ ໃຫ້ຮູ້ວ່າ:ຄອບຄົວຂອງລາວເປັນຄອບຄົວທີ່ໃຫຍ່ ມີຈຳນວນສະມາຊິກໃນຄອບຄົວ 31 ຄົນ ຍິງ 18 ຄົນ ຊຶ່ງເຮັດໃຫ້ຕົນເອງ ແລະ ຄອບຄົວ ເກີດມີແນວຄິດຢາກລິເລີ່ມ ແລະ ຫັນປ່ຽນອາຊີບທີ່ເປັນຫຼັກໃຫ້ແກ່ຄອບຄົວ ທ່ານ ຟົງຊົງ ໄດ້ເວົ້າວ່າໃນເມື່ອກ່ອນຄອບຄົວຂອງຕົນເອງໄດ້ຢຶດຖືອາຊີບການປູກຝັງ-ລ້ຽງສັດ ໂດຍສະເພາະແມ່ນການປູກຢາງພາລາ, ເຮັດສວນສາລີ ແລະ ລ້ຽງສັດຈຳນວນໜຶ່ງ ແຕ່ການລ້ຽງແມ່ນລ້ຽງແບບກະແຈກກະຈາຍ, ລ້ຽງແບບທຳມະຊາດ, ແຕ່ເຫັນວ່າຄອບຄົວກໍຍັງພົບຄວາມຫຍຸ້ງຍາກຫຼາຍດ້ານ, ບໍ່ກຸ້ມກິນ ພາລະໃນການໃຊ້ຈ່າຍໃນຄອບຄົວແມ່ນນັບມື້ສູງຂຶ້ນ ຕົກມາໃນປີ 2015 ລາວພ້ອມດ້ວຍຄອບຄົວໂດຍສະເພາະພໍ່ ແລະ ນ້ອງຊາຍ ຈຶ່ງໄດ້ມາປຶກສາຫາລືກັນ ເພື່ອຫັນປ່ຽນຊອກອາຊີບທີ່ເປັນຫຼັກ ແລະ ໝັ້ນຄົງກວ່າທີ່ເປັນຢູ່ນະຕອນນັ້ນ, ເລີຍຕັດສິນໃຈຢຶດເອົາອາຊີບການລ້ຽງງົວ ແລະ ລ້ຽງແບ້ ໂດຍເຮັດເປັນຈຸດສຸມ, ປູກຫຍ້າ (ລ້ຽງແບບເປັນຟາມ) ເພື່ອເປັນອາຊີບເສີມ ນອກຈາກໂມງການ, ກ່ອນຈະຕັດສິນໃຈເຮັດກະສິກຳດັ່ງກ່າວນີ້ ກໍເນື່ອງຈາກວ່າມີທ່າແຮງທີ່ເປັນພື້ນຖານຫຼາຍດ້ານເຊັ່ນ: ມີພື້ນທີ່ ແລະ ສັດລ້ຽງເປັນຂອງຕົນເອງຈຳນວນໜຶ່ງມາກ່ອນແລ້ວ, (ຈຳນວນໜຶ່ງກໍໄດ້ຊື້ເພີ່ມ ) ປັດຈຸບັນມີເນື້ອທີ່ທັງໝົດ 90 ຮຕ, ມີສັດລ້ຽງທັງໝົດ 160 ໂຕ, ງົວ 130 ໂຕ, ແບ້ 30 ໂຕ, ສະຖານທີ່ລ້ຽງມີ 2 ຈຸດ ຄື: ຈຸດ 1 ຢູ່ບ້ານນາງາມ ມີເນື້ອທີ່ 30 ຮຕ, ມີງົວ 30 ໂຕ, ແບ້ 30 ໂຕ ແລະ ຈຸດທີ 2 ຢູ່ບ້ານປຸງວີງ ( ຫຼັກ 37 ) ມີເນື້ອທີ່ 60 ຮຕ, ມີສັດລ້ຽງປະເພດງົວ 100 ໂຕ. ຍ້ອນພໍ່ ແມ່ ແລະ ອ້າຍເອື້ອຍນ້ອງໃນຄອບຄົວເຄີຍມີມູນເຊື້ອ ແລະ ປະສົບການໃນການລ້ຽງມາແຕ່ດຶກດຳບັນ ຈຶ່ງເຮັດໃຫ້ກິດຈະກຳການລ້ຽງງົວ ແລະ ລ້ຽງແບ້ຂອງພວກຂ້າພະເຈົ້າບໍ່ຄ່ອຍມີບັນຫາຫຍັງຫຼາຍ ເຖິງຈະມີກໍມີພະຍາດຜີວໜັງເລັກໆນ້ອຍໆ ແຕ່ພວກເຮົາກໍປິ່ນປົວ ແລະ ຮັກສາເອງໄດ້ ເພື່ອຫຼຸດພົ້ນອອກຈາກຄວາມທຸກຍາກເທື່ອກ້າວ.

- 244728720 585945752854129 6137492089712353604 n 300x169 - ລ້ຽງງົວ ແລະ ລ້ຽງແບ້ ສ້າງລາຍໄດ້ 100 ລ້ານກວ່າກີບຕໍ່ປີ

ການລ້ຽງຖືວ່າມີຄວາມສຳເລັດພໍສົມຄວນມີການເກີດແມ່ແຜ່ລູກໃນທຸກໆປີ ແຕ່ກໍຍັງມີບັນຫາ, ມີຂໍ້ຈຳກັດທາງດ້ານການຕະຫຼາດ, ເນື່ອງຈາກວ່າເປັນໄລຍະການແຜ່ລະບາດຂອງພະຍາດໂຄວິດ-19 ເຮັດໃຫ້ການນຳເຂົ້າ ແລະ ຂາຍສົ່ງອອກພົບຄວາມຫຍຸ້ງຍາກ ເພາະລູກຄ້າພວກເຮົາສ່ວນຫຼາຍແມ່ນມາຈາກຕ່າງແຂວງ.

ການສ້າງເສດຖະກິດຄອບຄົວມາເປັນໄລຍະ 7 ປີ ໃນການດໍາເນີນກິດຈະກໍາດັ່ງກ່າວ ຈົນຮອດປັດຈຸບັນ, ເຫັນວ່າຊີວິດການເປັນຢູ່ຂອງຄອບຄົວແມ່ນໄດ້ຮັບການພັດທະນາດີຂຶ້ນໄປເລື້ອຍໆ ສາມາດມີວັດຖຸ ແລະ ສິ່ງປະຈັກຕາທີ່ໄດ້ມາຈາກການເຮັດກິດຈະກຳນີ້ເປັນຕົ້ນແມ່ນ ເຮືອນຢູ່ອາໄສ, ມີພາຫະນະຮັບໃຊ້ ລົດໃຫຍ່, ລົດຈັກ, ເຄື່ອງໃຊ້ຄົວເຮືອນ ແລະ ອື່ນໆເປັນຕົ້ນ.

ສະຫາຍ ວົງເດືອນ ເຊຍໄໝຊົ່ງ ເປັນນ້ອງຊາຍຂອງ ສະຫາຍ ຟົງຊົງ ຊຶ່ງເປັນວິຊາການຫຼັກປະຈໍາຢູ່ຟາມດັ່ງກ່າວ (ເພາະຜູ້ກ່ຽວໄດ້ໃບປະກາດຈົບສາຍລ້ຽງສັດປະລິນຍາຕີ) ຍັງໄດ້ກ່າວຕື່ມວ່າ: ການທີ່ຈະສ້າງອາຊີບເສີມອັນໃດອັນໜຶ່ງສຳຄັນຄືຄວາມເຂົ້າໃຈ ແລະ ເອກະພາບກັນພາຍໃນຄອບຄົວ ເຖິງແມ່ນວ່າຄອບຄົວພວກເຮົາເປັນຄອບຄົວທີ່ໃຫຍ່ມີຈຳນວນສະມາຊິກຫຼາຍຄົນ ແຕ່ພວກເຮົາຮູ້ຈັກແບ່ງໜ້າວຽກ, ແບ່ງເວລາໃຫ້ແຕ່ລະຄົນຮັບຜິດຊອບຢ່າງເໝາະສົມ ແລະ ອັນສຳຄັນແມ່ນບໍ່ໃຫ້ມີຜົນກະທົບຕໍ່ວຽກງານວິຊາສະເພາະ ແລະ ອີກອັນໜຶ່ງ ຖ້າເຮົາຕັດສິນໃຈເຮັດກິດຈະກໍາຫຍັງໄປແລ້ວ ເມື່ອພົບບັນຫາກໍຊອກທາງອອກ ແລະ ຊອກວີທີຮຽນຮູ້ເພື່ອແກ້ໄຂ ຖືວ່າເປັນການທັງເຮັດທັງຮຽນໄປພ້ອມໆກັນດ້ວຍວິທີຕ່າງໆເຊັ່ນ:ຮຽນຈາກຜູ້ທີ່ມີປະສົບການມາກ່ອນແລ້ວ, ສຶກສາຜ່ານທາງຢູທູບ, ເວບໄຊ, ໜັງສືພິມ, ວາລະສານ ແລະ ໃນທີ່ສຸດຈຶ່ງເຮັດໃຫ້ຄອບຄົວປະສົບຜົນສຳເລັດໂດຍພື້ນຖານມາຮອດທຸກວັນນີ້.

ທ່ານກ່າວວ່າ: ທັງໝົດນັ້ນກໍຍ້ອນຄວາມດຸໝັ້ນ ອົດທົນ ບວກກັບຄວາມສາມັກຄີຂອງສະມາຊິກຢູ່ພາຍໃນຄອບຄົວ ແລະ ການຕັດສິນໃຈ ຈຶ່ງເຮັດໃຫ້ຊີວິດການເປັນຢູ່ຂອງຄອບຄົວໄດ້ຮັບການພັດທະນາດີຂຶ້ນໃນແຕ່ລະປີສາມາດສ້າງລາຍຮັບຈາກການຂາຍງົວ ແລະ ຂາຍແບ້ ສ້າງລາຍໄດ້ບໍ່ຕ່ຳກວ່າ 100 ລ້ານກວ່າກີບຕໍ່ປີ ແລະ ສິ່ງທີ່ພູມໃຈ ແລະ ປະທັບໃຈທີ່ສຸດກໍແມ່ນຄວາມກ້າຫານ, ຄວາມຕັ້ງໃຈບຸກບືນສູ້ຊົນ, ເພາະການສ້າງລາຍຮັບເພີ່ມບໍ່ວ່າຈະເປັນອາຊີບໃດກໍຕາມ ຖ້າເປັນອາຊີບທີ່ບໍລິສຸດ ຖືກຕ້ອງຕາມລະບຽບກົດໝາຍຂອງພັກ-ລັດວາງອອກ, ມີຄວາມຊື່ສັດ, ປະຢັດ, ອົດທົນ ກໍຈະພາທຸກຄົນປະສົບຜົນສໍາເລັດ ແລະ ສາມາດຫຼຸດຜົ້ນອອກຈາກຄວາມທຸກຍາກໄດ້ເທື່ອລະກ້າວ, ແຜນໃນຕໍ່ໜ້າຄອບຄົວຈະສືບຕໍ່ດໍາເນີນກິດຈະກໍານີ້ໄປອີກ ໂດຍນຳໃຊ້ທຶນຮອນທີ່ຕົນເອງມີຢູ່ ເພື່ອເປັນທຶນໝູນວຽນໃນການຂະຫຍາຍກິດຈະການດັ່ງກ່າວ ແລະ ມີແຜນຈະສືບຕໍ່ຂະຫຍາຍຈຸດລ້ຽງອີກ 1 ຈຸດ ມີເນື້ອທີ່ 60 ຮຕ ເພື່ອປູກຫຍ້າ, ລ້ຽງແບ້, ລ້ຽງງົວ ເພື່ອຈໍາໜ່າຍອອກໃຫ້ກວ້າງຂວາງເຊັ່ນ: ນອກຈາກເທດສະບານເມືອງໄຊແລ້ວ ຈະສົ່ງອອກໄປຕ່າງເມືອງ ແລະ ບັນດາແຂວງໃກ້ຄຽງຕາມຄວາມສາມາດທີ່ຕົນເອງເຮັດໄດ້ ແລະ ຕອນທ້າຍ ສະຫາຍ ຟົງຊົງ ຍັງໄດ້ຝາກເຖິ່ງພໍ່ແມ່ປະຊາຊົນກໍຄືເພື່ອນຊາວໜຸ່ມບັນດາເຜົ່າ ທີ່ຕ້ອງການຢາກສ້າງອາຊີບເສີມ ເພື່ອສ້າງລາຍຮັບເຂົ້າສູ່ຄອບຄົວ ກໍສາມາດເຂົ້າມາແລກປ່ຽນບົດຮຽນ ເບິ່ງສະຖານທີ່ການຜະລິດຂອງເພິ່ນໄດ້ ຈຸດທີ 1 ຢູ່ບ້ານນາງາມ ແລະ ຈຸດທີ 2 ຢູ່ ບ້ານປຸງວີງ ຫຼັກ 37 ເມືອງໄຊ ແຂວອຸດົມໄຊ

 

CR: ນາງ ບົວຫອມ ພົມພູມີ

 

- lattana banner 1 - ລ້ຽງງົວ ແລະ ລ້ຽງແບ້ ສ້າງລາຍໄດ້ 100 ລ້ານກວ່າກີບຕໍ່ປີ
- lattana banner - ລ້ຽງງົວ ແລະ ລ້ຽງແບ້ ສ້າງລາຍໄດ້ 100 ລ້ານກວ່າກີບຕໍ່ປີ
-    AD conten website - ລ້ຽງງົວ ແລະ ລ້ຽງແບ້ ສ້າງລາຍໄດ້ 100 ລ້ານກວ່າກີບຕໍ່ປີ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!