ກອງປະຊຸມລະຫວ່າງ ສະພາແຫ່ງຊາດ-ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ
ໃນວັນທີ 12 ຕຸລາ 2021 ນີ້, ກອງປະຊຸມຮ່ວມລະຫວ່າງຄະນະປະຈໍາສະພາແຫ່ງຊາດ ກັບສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ໃນຮູບແບບທາງໄກ ພາຍໃຕ້ການເປັນປະທານຂອງ ທ່ານ ໄຊສົມພອນ ພົມວິຫານ ປະທານຄະນະປະຈຳສະພາແຫ່ງຊາດ ໂດຍມີ ທ່ານ ນາງ ວຽງທອງ ສີພັນດອນ ປະທານສານປະຊາຊົນສູງສຸດ, ມີທ່ານ ໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດ ພ້ອມດ້ວຍບັນດາຄະນະປະຈໍາສະພາແຫ່ງຊາດແລະ ພາກສ່ວນກ່ຽວຂ້ອງເຂົ້າຮ່ວມ.
ກອງປະຊຸມໃນຄັ້ງນີ້, ກໍເພື່ອເປັນການປຶກສາຫາລື ແລະ ຮ່ວມກັນຊອກຫາວິທີແກ້ໄຂບັນຫາເຄັ່ງຮ້ອນ ແລະ ຮີບດ່ວນທີ່ເກີດໃນສັງຄົມ, ສົ່ງຜົນກະທົບຕໍ່ການສ້າງສາພັດທະນາເສດຖະກິດ-ສັງຄົມ, ຊີວິດການເປັນຢູ່ຂອງປະຊາຊົນ ແລະ ເພື່ອເປັນການຕິດຕາມກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍຂອງບັນດາອົງການລັດຂັ້ນຕ່າງໆ.
ທ່ານ ໄຊສົມພອນ ພົມວິຫານ ກ່າວວ່າ: ເນື້ອໃນທີ່ນໍາມາພິຈາລະນາຢູ່ກອງປະຊຸມຮ່ວມໃນຄັ້ງນີ້ ລ້ວນແຕ່ເປັນວຽກງານມີຄວາມສໍາຄັນ ຕິດພັນກັບສິດ ແລະ ຜົນປະໂຫຍດຂອງປະຊາຊົນບັນດາເຜົ່າຢ່າງກວ້າງຂວາງ. ສະນັ້ນ, ສະພາແຫ່ງຊາດ, ສານປະຊາຊາຊົນສູງສຸດ, ອົງການໄອຍະການປະຊາຊົນສູງສຸດ ຕ້ອງໄດ້ພ້ອມກັນປະກອບຄໍາເຫັນ, ພິຈາລະນາດ້ວຍເຫດດ້ວຍຜົນຖືເອົາຜົນປະໂຫຍດສ່ວນລວມຂອງຊາດ, ຂອງປະຊາຊົນເປັນສໍາຄັນສຸດ ທັງນີ້ກໍເພື່ອສ້າງຄວາມເປັນເອກະພາບ ກ່ຽວກັບວິທີການແກ້ໄຂວຽກງານໃນຕໍ່ໜ້າ ໃຫ້ມີບາດກ້າວຫັນປ່ຽນທີ່ດີຂຶ້ນ. ດັ່ງນັ້ນ, ເພື່ອເຮັດໃຫ້ການດໍາເນີນກອງປະຊຸມໄດ້ຮັບຜົນສໍາເລັດຕາມແຜນການທີ່ວາງໄວ້ນັ້ນ, ຮຽກຮ້ອງມາຍັງບັນດາທ່ານ ຄະນະນໍາຂອງສານປະຊາຊົນສູງສຸດ, ຄະນະນໍາຂອງອົງການໄອຍະການປະຊາຊົນສູງສຸດ, ຄະນະປະຈໍາສະພາແຫ່ງຊາດ ແລະ ທຸກພາກສ່ວນທີ່ກ່ຽວຂ້ອງ ຈົ່ງໄດ້ເຊີດຊູຄວາມຮັບຜິດຊອບ ແລະ ເອົາໃຈ ໃສ່ຄົ້ນຄວ້າ, ປະກອບຄໍາຄິດເຫັນໃສ່ບັນດາເນື້ອໃນທີ່ນໍາມາພິຈາລະນາໃນກອງປະຊຸມຄັ້ງນີ້ ໃຫ້ບັນລຸຜົນສໍາເລັດຕາມຄາດໝາຍ ແລະ ສາມາດນໍາໄປຈັດຕັ້ງປະຕິບັດຢ່າງມີປະສິດທິຜົນ.
ກອງປະຊຸມໄດ້ພ້ອມກັນປຶກສາຫາລື 2 ຫົວຂໍ້ຄື: ການດໍາເນີນຄະດີ 3 ຂັ້ນ ຕາມທີ່ກໍານົດໄວ້ໃນມາດຕາ 90 ຂອງລັດຖະທໍາມະນູນ ສະບັບປັບປຸງປີ 2015, ລົງເລິກການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 012/ສພຊ, ລົງວັນທີ 22 ມິຖຸນາ 2017 ວ່າດ້ວຍຍົກສູງຄຸນນະພາບ ການດໍາເນີນຄະດີຢູ່ສານຂັ້ນຕົ້ນ ແລະ ຂັ້ນອຸທອນຂອງສານປະຊາຊົນ ແລະ ການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 012/ສພຊ, ລົງວັນທີ 22 ມີຖຸນາ 2017 ກ່ຽວກັບການຍົກສູງຄຸນນະພາບການປະຕິບັດສິດສັ່ງຟ້ອງຜູ້ຖືກຫາຂຶ້ນສານ ແລະ ການເຂົ້າຮ່ວມໃນການດໍາເນີນຄະດີແພ່ງຢູ່ທີ່ປະຊຸມສານ ແລະ ການປະຕິບັດພາລະບາດຕິດຕາມກວດກາຕາມມາດຕາ 390 ຂອງປະມວນກົດໝາຍອາຍາ ສະບັບປີ 2017 ຂອງອົງການໄອຍະການປະຊາຊົນ ກ່ຽວກັບການຕົກລົງຂອງບຸກຄົນທີ່ມີສິດກ່ຽວຂ້ອງ ກ່ຽວກັບການສືບສວນ-ສອບສວນ, ການສັ່ງຟ້ອງ, ການອອກຄໍາສັ່ງ, ຄໍາຊີ້ຂາດ, ຄໍາຕັດສິນ, ຄໍາພິພາກສາ ແລະ ການຈັດຕັ້ງປະຕິບັດຄໍາຕັດສິນຂອງສານທີ່ບໍ່ຖືກຕ້ອງຕາມກົດໝາຍ.
