ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ

ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ - Singapore Covid 640 AP - ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ
ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ - AGL banner - ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ

“ເຮົາຕ້ອງເດີນໜ້າຕໍ່ໄປດ້ວຍຍຸດທະສາດຢູ່ຮ່ວມກັບໂຄວິດ, ຕອນນີ້ເຮົາຕ້ອງເຮັດຫຍັງເປັນຂັ້ນຕອນຕໍ່ໄປ ໃນການເລີ່ມຕົ້ນ ແລະ ໂດຍພື້ນຖານທີ່ສຸດ, ເຮົາຕ້ອງອັບເດດມາຍເຊັດຂອງເຮົາ, ເຮົາຄວນຢຳເກງໂຄວິດ, ແຕ່ເຮົາຕ້ອງບໍ່ຢຸດສະງັກດ້ວຍຄວາມຢ້ານ ໃຫ້ເຮົາດຳເນີນກິດຈະກຳປະຈຳວັນຕາມປົກກະຕິເທົ່າທີ່ຈະເປັນໄປໄດ້ ໂດຍໃຊ້ມາດຕະການປ້ອງກັນທີ່ຈຳເປັນ ແລະ ປະຕິບັດຕາມມາດຕະການຈັດການຢ່າງປອດໄພ (Safe Management Measures: SMMs) ດ້ວຍການສັກວັກຊີນ ໂຄວິດໄດ້ກາຍເປັນພະຍາດທີ່ບໍ່ຮຸນແຮງສຳລັບພວກເຮົາສ່ວນຫລາຍ”.

ທ່ານ ລີຊຽນລຸງ ນາຍົກລັດຖະມົນຕີສິງກະໂປ ອາຍຸ 69 ປີ ຖະແຫລງຜ່ານໂທລະພາບກ່ຽວກັບສະຖານະການການລະບາດຂອງໂຄວິດໃນສິງກະໂປ ແລະ ເສັ້ນທາງສູ່ຄວາມປົກກະຕິໃໝ່ (New Normal) ໃນວັນທີ 9 ຕຸລາ 2021 ຜ່ານມາ.

ປັດຈຸບັນ ຈຳນວນຜູ້ຕິດເຊື້ອໃໝ່ກຳລັງເພີ່ມຂຶ້ນຢ່າງວ່ອງໄວໃນສິງກະໂປ ທ່ານເລີ່ມຕົ້ນຈາກຄວາມຂັດແຍ່ງທາງຄວາມຄິດລະຫວ່າງຝ່າຍທີ່ຕ້ອງການໃຫ້ປະເທດເລີ່ມຟື້ນຟູຈາກໂຄວິດກັບຝ່າຍທີ່ຕ້ອງການໃຫ້ປະເທດກັບມາລັອກດາວອີກ. ກ່າວເຖິງຍຸດທະສາດ “ກຳຈັດໂຄວິດ” (Zero COVID) ທີ່ເຄີຍປະສົບຜົນສຳເລັດໃນໄລຍະທຳອິດ ແຕ່ລະຫວ່າງນັ້ນ ສິງກະໂປໄດ້ຈັດຫາວັກຊີນກຽມໄວ້ຈົນປັດຈຸບັນເປັນປະເທດທີ່ມີອັດຕາການສັກວັກຊີນສູງທີ່ສຸດປະເທດໜຶ່ງ ເຊິ່ງວັກຊີນເປັນຕົວພິກເກມທີ່ເຮັດໃຫ້ໂຄວິດບໍ່ແມ່ນພະຍາດອັນຕະລາຍອີກຕໍ່ໄປ.

ປັດຈຸບັນ ສິງກະໂປປ່ຽນມາໃຊ້ຍຸດທະສາດ “ຢູ່ຮ່ວມກັບໂຄວິດ” (Living with COVID) ແຕ່ບໍ່ແມ່ນຫົນທາງທີ່ງ່າຍດາຍ ເຖິງວ່າຈະມີການຄວບຄຸມຂອງວັກຊີນສູງເຖິງ 80% ແລ້ວກໍຕາມ, ແຕ່ດ້ວຍການຜ່ອນຄາຍມາດຕະການ ແລະ ສາຍພັນທີ່ລະບາດເປັນສາຍພັນເດວຕາ ເຮັດໃຫ້ຈຳນວນຜູ້ຕິດເຊື້ອເພີ່ມຂຶ້ນຈຳນວນຫລາຍ ຜູ້ຕິດເຊື້ອທີ່ມີອາການໜັກມີອັດຕາ 0,2% ເຊິ່ງຖືວ່າຫລາຍສຳລັບສິງກະໂປ ຈົນຕ້ອງປັບເພີ່ມມາດຕະການການຈັດການຢ່າງປອດໄພ (SMMs) ເພື່ອຮັກສາຄວາມໝັ້ນຄົງຂອງລະບົບສາທາລະນະສຸກ ແລະ ນຳໂຄງການພັກຟື້ນຢູ່ເຮືອນ (Home Recovery) ມາໃຊ້.

ທ່ານກ່າວຕໍ່ປະຊາຊົນຕາມຕົງວ່າ: ຈຳນວນຜູ້ຕິດເຊື້ອຈະຍັງເພີ່ມຂຶ້ນອີກໃນອີກຫລາຍອາທິດ ເມື່ອເຖິງຈຸດໜຶ່ງຈຳນວນຜູ້ຕິດເຊື້ອຈະຫລຸດລົງ ເຮົາບໍ່ຮູ້ແນ່ນອນວ່າເມື່ອໃດ ແຕ່ຈາກປະສົບການຂອງປະເທດອື່ນໆ ຫວັງວ່າຈະພາຍໃນ 1 ເດືອນ ຫລື ປະມານນັ້ນ ການຕໍ່ສູ້ກັບໂຄວິດກິນໄລຍະເວລາຍາວນານ ແລະ ສົງຄາມຍັງດຳເນີນຕໍ່ໄປ, ແຕ່ຕອນນີ້ເຮົາຢູ່ໃນສະຖານະທີ່ດີກວ່າ ເມື່ອທຽບໃສ່ປີຜ່ານມາ ຫລື 6 ເດືອນຜ່ານມາ ບາງຄັ້ງອາດບໍ່ຮູ້ສຶກແນວນັ້ນ “ແຕ່ເຮົາກຳລັງເດີນໜ້າໄປສູ່ຄວາມປົກກະຕິໃໝ່ຢ່າງໝັ້ນຄົງ”.

7 ມາດຕະການທີ່ສິງກະໂປເດີນໜ້າສູ່ New Normal

ທ່ານ ລີຊຽນລຸງ ໃຊ້ເວລາໃນການຖະແຫລງປະມານ 25 ນາທີ ຜູ້ທີ່ສົນໃຈສາມາດເປີດຟັງທາງ YouTube ຫລື ອ່ານຖະແຫລງການສະບັບເຕັມໄດ້ທາງເວັບໄຊຂອງສຳນັກຂ່າວຕ່າງປະເທດ ຫລັງຈາກນັ້ນຄະນະກຳມະການສະເພາະກິດ ເຊິ່ງປະກອບມີລັດຖະມົນຕີຫລາຍກະຊວງ (Multi-Misistry Task Force) ໄດ້ຖະແຫລງກ່ຽວກັບການປ່ຽນແປງມາດຕະການຄວບຄຸມໂຄວິດຕາມຍຸດທະສາດຢູ່ຮ່ວມກັບໂຄວິດ ເຊິ່ງມີການປ່ຽນແປງທັງການກວດຫາເຊື້ອ, ການກັກຕົວ, ການປິ່ນປົວ ແລະ ການເດີນທາງເຂົ້າມາຈາກຕ່າງປະເທດ ກ່າວຄື:

  1. ການຍົກເລີກຄຳສັ່ງໃຫ້ກັກຕົວສຳລັບຜູ້ສຳຜັດໃກ້ຊິດ

ເລີ່ມວັນທີ 11 ຕຸລາ 2021 ເປັນຕົ້ນໄປ ຜູ້ສຳຜັດກັບຜູ້ຕິດເຊື້ອຄົນກ່ອນໜ້າຈະບໍ່ໄດ້ຮັບຄຳສັ່ງໃຫ້ກັກຕົວ ແຕ່ຈະໄດ້ຮັບຄຳເຕືອນຄວາມສ່ຽງດ້ານສຸຂະພາບ (Health Risk Warning) ແທນ ເຊິ່ງເປັນນະໂຍບາຍທີ່ຕ້ອງການໃຫ້ແນວທາງດ້ານສາທາລະນະສຸກງ່າຍຂຶ້ນ ແຕ່ຕ້ອງອາໄສຄວາມຮັບຜິດຊອບສ່ວນບຸກຄົນ ແລະ ຈັດການດ້ວຍຕົນເອງ ໂດຍຜູ້ທີ່ໄດ້ຮັບຄຳເຕືອນຈະຕ້ອງກັກຕົນເອງ (Self-isolate) ທັນທີ ແລະ ກວດຫາເຊື້ອດ້ວຍຊຸດກວດ ART (Antigen Rapid Test) ໃນວັນດຽວກັນ.

ຖ້າຜົນການກວດເປັນລົບ ຜູ້ນັ້ນສາມາດເຮັດກິດຈະກຳໄດ້ຕາມປົກກະຕິຫລັງຈາກອັບໂຫລດຜົນການກວດອອນລາຍ ແລະ ຕ້ອງກວດແບບນີ້ທຸກວັນຈົນຄົບ 7 ວັນ ເມື່ອຜົນການກວດໃນວັນທີ 7 ເປັນລົບຈະສາມາດອອກຈາກການກັກຕົນເອງໄດ້ ແຕ່ຖ້າຜົນການກວດເປັນບວກ ແລະ ບໍ່ມີອາການ ຈະຕ້ອງກັກຕົນເອງຢູ່ເຮືອນເປັນເວລາ 72 ຊົ່ວໂມງ ແລ້ວກວດ ART ອີກຈົນກວ່າຜົນກວດຈະເປັນລົບ ແລະ ສັງເກດອາການ ຖ້າມີອາການຮ້າຍແຮງຈຶ່ງຈະໄປພົບໝໍ ເພາະສະນັ້ນຜູ້ຕິດເຊື້ອທີ່ບໍ່ມີອາການຈະຄົບກຳນົດແຍກຕົວຢ່າງໄວທີ່ສຸດ 4 ວັນ.

  1. ການກວດ PCR ສຳລັບຜູ້ທີ່ມີອາການເທົ່ານັ້ນ Polymerase Chain Reaction (PCR) ເປັນການກວດຫາສານພັນທຸກຳຂອງໄວຣັສ ຈະຖືກສຳຮອງໄວ້ສຳລັບຜູ້ທີ່ຮູ້ສຶກບໍ່ສະບາຍ ຫລື ມີອາການພາຍໃນແນວທາງດ້ານສາທາລະນະສຸກໃໝ່, ສ່ວນຜູ້ທີ່ບໍ່ມີອາການເຊັ່ນ: ການກວດຫາເຊື້ອໃນຊຸມຊົນ ໃນຜູ້ສຳຜັດໃກ້ຊິດຈະໃຊ້ຊຸດກວດ ART ເຊິ່ງສາມາດກວດຫາເຊື້ອ ແລະ ກັກຕົນເອງໄດ້ວ່ອງໄວ ໂດຍແຕ່ລະຄອບຄົວຈະໄດ້ຮັບຊຸດກວດຢ່າງໜ້ອຍ 10 ຊຸດສຳລັບການແຈກຢາຍທາງໄປສະນີໃນຮອບລະຫວ່າງ 22 ຕຸລາ – 7 ທັນວານີ້.
  2. ການພັກຟື້ນຢູ່ເຮືອນສຳລັບປະຊາຊົນສ່ວນຫລາຍ

ຜູ້ຕິດເຊື້ອທີ່ “ບໍ່ໄດ້ຮັບວັກຊີນ” ອາຍຸລະຫວ່າງ 12-49 ປີ ແລະ ເດັກອາຍຸ 5-11 ປີ ຈະເຂົ້າສູ່ໂຄງການພັກຟື້ນຢູ່ເຮືອນນັບແຕ່ທຳອິດ ເພາະມີຄວາມສ່ຽງຕໍ່າຈາກອາການໜັກ, ສ່ວນຜູ້ຕິດເຊື້ອທີ່ “ໄດ້ຮັບວັກຊີນຄົບ” ອາຍຸລະຫວ່າງ 70-79 ປີ ຈະຕ້ອງພັກຟື້ນຢູ່ເຮືອນຫລັງຈາກໄດ້ຮັບການສັງເກດອາການ ແລະ ການປະເມີນຄວາມສ່ຽງໃນການເຈັບເປັນ ໂດຍຜູ້ທີ່ໄດ້ຮັບວັກຊີນຄົບຈະສາມາດອອກຈາກການແຍກກັກຕົນເອງໄດ້ໃນວັນທີ 10 ເປັນຕົ້ນໄປ, ສ່ວນຜູ້ບໍ່ໄດ້ຮັບວັກຊີນຈະອອກຈາກການແຍກກັກຕົນເອງໃນວັນທີ 14,

  1. ຫ້າມຜູ້ທີ່ບໍ່ໄດ້ຮັບວັກຊີນນັ່ງໃນສູນອາຫານແຄມທາງ ແລະ ຮ້ານກາເຟ

ບໍ່ພຽງແຕ່ການປິ່ນປົວ ມາດຕະການປ້ອງກັນພະຍາດກໍມີການແບ່ງແຍກຜູ້ທີ່ໄດ້ຮັບ-ຍັງບໍ່ໄດ້ຮັບວັກຊີນ, ຄາດວ່າອາດຈະເປັນມາດຕະການເຄິ່ງບັງຄັບໃຫ້ຄົນເຂົ້າຮັບການສັກວັກຊີນ ໂດຍຜູ້ທີ່ໄດ້ຮັບວັກຊີນຄົບຈະສາມາດນັ່ງໃນສູນອາຫານແຄມທາງ (Hawker), ຮ້ານກາເຟ ຫລື ສະຖານທີ່ທ່ອງທ່ຽວ ແລະ ຈຳກັດການລວມກຸ່ມບໍ່ເກີນ 2 ຄົນ ເລີ່ມວັນທີ 13 ຕຸລາ 2021 ເປັນຕົ້ນໄປ, ສ່ວນຜູ້ທີ່ຍັງບໍ່ໄດ້ຮັບວັກຊີນ ຫລື ໄດ້ຮັບບໍ່ຄົບຕ້ອງຊື້ແບບເມືອເຮືອນເທົ່ານັ້ນ.

  1. ການສັກວັກຊີນເຂັມກະຕຸ້ນຂະຫຍາຍເຖິງບຸກຄະລາກອນທາງການແພດ ແລະ ອາຊີບດ່ານໜ້າ

ສິງກະໂປເລີ່ມສັກວັກຊີນເຂັມກະຕຸ້ນເປັນວັກຊີນຊະນິດ mRNA ໃຫ້ຜູ້ທີ່ມີອາຍຸ 50 ປີຂຶ້ນໄປ ທີ່ໄດ້ຮັບວັກຊີນຄົບ 2 ເຂັມຢ່າງໜ້ອຍ 6 ເດືອນ ນັບແຕ່ກາງເດືອນກັນຍາ ຕໍ່ມາໃນເດືອນນີ້ໄດ້ຈັດສັນວັກຊີນເຂັມກະຕຸ້ນເພີ່ມອີກໃຫ້ບຸກຄະລາກອນທາງການແພດ ແລະ ອາຊີບດ່ານໜ້າ ນັບແຕ່ອາຍຸ 18 ປີຂຶ້ນໄປ, ນັກໂທດ, ຜູ້ເຮັດວຽກໃນເຮືອນພັກຜູ້ສູງອາຍຸ ລວມທັງຜູ້ທີ່ມີອາຍຸ 30-50 ປີຂຶ້ນໄປ ໂດຍບໍ່ຈຳກັດອາຊີບ.

  1. ການສັກວັກຊີນໃນເດັກ

ນາຍົກລັດຖະມົນຕີສິງກະໂປຍັງກ່າວເຖິງເດັກອາຍຸນ້ອຍກວ່າ 12 ປີ ເຊິ່ງປັດຈຸບັນຍັງບໍ່ມີວັກຊີນທີ່ໄດ້ຮັບການຮັບຮອງໃຫ້ໃຊ້ໃນກຸ່ມນີ້ ຜູ້ປົກຄອງຫລາຍຄົນກັງວົນວ່າເດັກຈະຕິດເຊື້ອ ເຖິງວ່າເດັກທີ່ຕິດເຊື້ອຈະບໍ່ມີອາການຮຸນແຮງ, ທາງການສິງກະໂປກຳລັງຕິດຕາມຄວາມກ້າວໜ້າການວິໄຈວັກຊີນໃນເດັກໃນອາເມລິກາຢ່າງໃກ້ຊິດ ແລະ ຈະເລີ່ມສັກວັກຊີນໃຫ້ເດັກໂດຍໄວທີ່ສຸດເມື່ອວັກຊີນໄດ້ຮັບການຮັບຮອງ ແລະ ຜູ້ຊ່ຽວຊານເຫັນວ່າວັກຊີນມີຄວາມປອດໄພ ໂດຍຄາດວ່າຈະເລີ່ມຕົ້ນໄດ້ໃນຕົ້ນປີໜ້າ.

  1. ການທ່ອງທ່ຽວສຳລັບຜູ້ທີ່ໄດ້ຮັບວັກຊີນຄົບແລ້ວ (Vaccinated Travel Lanes: VTL) ສິງກະໂປຕ້ອງການກັບມາເຊື່ອມຕໍ່ກັບໂລກອີກ ເນື່ອງຈາກບໍລິສັດ ແລະ ນັກລົງທຶນຕ້ອງການດຳເນີນທຸລະກິດ ປະຊາຊົນຕ້ອງການທ່ອງທ່ຽວ ນັກສຶກສາຕ້ອງການເດີນທາງໄປຕ່າງປະເທດ ຄອບຄົວ ແລະ ໝູ່ເພື່ອນຈາກຕ່າງປະເທດຕ້ອງການໃຊ້ເວລາຮ່ວມກັນ ຈຶ່ງມີໂຄງການ VTL ລິເລີ່ມກັບເຢຍລະມັນ ແລະ ບຣູໄນແລ້ວ ແລະ ຫລ້າສຸດຄື ສ.ເກົາຫລີ ເພື່ອສະແດງໃຫ້ເຫັນວ່າຜູ້ທີ່ໄດ້ຮັບວັກຊີນຄົບແລ້ວມີຄວາມເປັນໄປໄດ້ໃນການເດີນທາງຢ່າງປອດໄພ.

    ປະເທດໃນໂຄງການ VTL ທີ່ຈະເລີ່ມວັນທີ 19 ຕຸລານີ້ ໄດ້ແກ່ ແຄນາດາ, ເດນມາກ, ຝຣັ່ງ, ອິຕາລີ, ເນເທີແລນ, ສະເປນ, ອັງກິດ ແລະ ອາເມລິກາ, ສ່ວນ ສ.ເກົາຫລີ ຈະເລີ່ມວັນທີ 15 ພະຈິກ ນັກທ່ອງທ່ຽວສາມາດເດີນທາງເຂົ້າສິງກະໂປໂດຍບໍ່ຕ້ອງກັກຕົວ ແຕ່ຕ້ອງມີຜົນການກວດຫາເຊື້ອດ້ວຍວິທີ PCR ກ່ອນເດີນທາງ 48 ຊົ່ວໂມງ ແລະ ກວດຫາເຊື້ອອີກເມື່ອເດີນທາງມາເຖິງ ສ່ວນການເດີນທາງປົກກະຕິສິງກະໂປແບ່ງປະເທດອອກໄປ 4 ກຸ່ມ ໂດຍກຸ່ມສ່ຽງສູງຈະຕ້ອງກັກຕົວ 10 ວັນ ແລະ ກວດຫາເຊື້ອ 3 ຄັ້ງ.

ຂໍ້ສັງເກດແນວທາງ New Normal ຂອງສິງກະໂປ

ສິງກະໂປໃຫ້ຄວາມສຳຄັນຕໍ່ການສັກວັກຊີນ ໂດຍຈັດຫາວັກຊີນນັບແຕ່ຍັງໃຊ້ຍຸດທະສາດກຳຈັດໂຄວິດ ເມື່ອສັກວັກຊີນໄດ້ຄວບຄຸມເຮັດໃຫ້ສາມາດປ່ຽນມາເປັນຍຸດທະສາດຢູ່ຮ່ວມກັບໂຄວິດໄດ້ຢ່າງໝັ້ນໃຈ ແລະ ສັກວັກຊີນເຂັມກະຕຸ້ນຕໍ່ ໂດຍເລີ່ມຈາກຜູ້ສູງອາຍຸກ່ອນ ຕໍ່ມາເປັນບຸກຄະລາກອນທາງການແພດ ແລະ ໄວເຮັດວຽກ ສ່ວນເດັກອາຍຸນ້ອຍກວ່າ 12 ປີອາດຈະເລີ່ມສັກມໍ່ໆນີ້ ຄວາມແຕກຕ່າງໃນການປະຕິບັດຕົວລະຫວ່າງຜູ້ທີ່ໄດ້ຮັບວັກຊີນແລ້ວກັບຜູ້ທີ່ຍັງບໍ່ໄດ້ຮັບວັກຊີນເປັນມາດຕະການເຄິ່ງບັງຄັບໃຫ້ຄົນເຂົ້າຮັບການສັກວັກຊີນເພີ່ມຂຶ້ນ.

ແນວທາງດ້ານສາທາລະນະສຸກໃໝ່ເຮັດໃຫ້ສິງກະໂປກ້າວເຂົ້າໃກ້ “ຄວາມປົກກະຕິເກົ່າ” ຫລາຍຂຶ້ນ ທັງການຍົກເລີກຄຳສັ່ງກັກຕົວສຳລັບຜູ້ສຳຜັດໃກ້ຊິດ ໂດຍໃຊ້ການກວດຫາເຊື້ອດ້ວຍຊຸດກວດ ART ທຸກວັນຈົນຄົບ 7 ວັນແທນ. ການກວດຫາເຊື້ອດ້ວຍຕົນເອງ ແລະ ການແຍກຕົນເອງຢູ່ເຮືອນຢ່າງໜ້ອຍ 4 ວັນໃນກໍລະນີກວດພົບຜົນບວກ ແລະ ບໍ່ມີອາການ ການກວດດ້ວຍວິທີ PCR ສະເພາະຜູ້ທີ່ມີອາການ ແລະ ໃຫ້ພັກຟື້ນຢູ່ເຮືອນຢ່າງໜ້ອຍ 10 ວັນໃນກໍລະນີທີ່ໄດ້ຮັບວັກຊີນຄົບແລ້ວແຕ່ອາການບໍ່ຮຸນແຮງ.

ໃນປັດຈຸບັນຍອດຜູ້ຕິດເຊື້ອໃໝ່ໃນສິງກະໂປກຳລັງເພີ່ມຂຶ້ນຢ່າງວ່ອງໄວ ສະເລ່ຍຢ້ອນຫລັງ 7 ວັນຫລາຍກວ່າ 3.000 ຄົນຕໍ່ວັນ ແນວທາງນີ້ຈຶ່ງຫລຸດພາລະຂອງລະບົບສາທາລະນະສຸກ ທັງການກວດຫາເຊື້ອ ແລະ ການປິ່ນປົວ, ແຕ່ຂະນະດຽວກັນ 98,5% ຂອງຜູ້ຕິດເຊື້ອເປັນກຸ່ມບໍ່ມີອາການ ຫລື ມີອາການໜ້ອຍ ໄລຍະເວລາຂອງແຕ່ລະມາດຕະການທີ່ສັ້ນລົງສົ່ງຜົນຕໍ່ການໃຊ້ຊີວິດປະຈຳວັນໜ້ອຍລົງ. ສຳລັບທາມໄລຂອງການເຂົ້າສູ່ຄວາມປົກກະຕິໃໝ່, ນາຍົກລັດຖະມົນຕີສິງກະໂປຄາດວ່າຈະໃຊ້ເວລາຢ່າງໜ້ອຍ 3 ເດືອນ ຫລື ອາດເຖິງ 6 ເດືອນ.

ອ້າງອີງ:

ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ -    AD conten website - ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ
ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ - lattana banner - ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ
ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ - lattana banner 1 - ສິງກະໂປ ຢູ່ຮ່ວມກັບໂຄວິດແນວໃດ ໃນວັນທີ່ຜູ້ຕິດເຊື້ອໃໝ່ເພີ່ມຂຶ້ນ

Comment

    Anonymous
    17/10/2021 - 6:08 pm

    ບໍ່ແມ່ນພິມຜິດບໍວ່າ ສິງກະໂປກຳລັງເຂົ້າໃກ້ “ຄວາມປົກກະຕິເກົ່າ“ ອ່ານຫຼາຍຄັ້ງແລ້ວ ຮູ້ສຶກວ່າ “ໃໝ່“ ຄືຊິບໍ່ແມ່ນ “ເກົ່າ“.

Comments are closed.

error: Alert: ເນື້ອຫາຂ່າວມີລິຂະສິດ !!