ອອກພັນສາປີນີ້ ອົງການພຸດທະສາດສະໜາສໍາພັນລາວ ໄດ້ລິເລີ່ມພິທີການໄຫ້ວພະສູດມົນແບບໃໝ່ຜ່ານທາງອອນລາຍ ເພື່ອຫລີກລ່ຽງການແພ່ເຊື້ອໃນຊຸມຊົນ
ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ລາຍງານໃນວັນທີ 20 ຕຸລາ 2021 ນີ້ວ່າ: ມື້ນີ້ຕົວເລກການຕິດເຊື້ອທົ່ວປະເທດ ແມ່ນເພີ່ມຂຶ້ນກວ່າ 500 ຄົນ ຕໍ່ວັນ ແລະ ໃນນະຄອນຫລວງວຽງຈັນ ກໍມີການຕິດເຊື້ອສູງເຖິງ 200 ກວ່າຄົນ ພາຍໃນມື້ດຽວ ເຊິ່ງເປັນສັນຍາເຕືອນ ວ່າການລະບາດໃນຊຸມຊົນ ແມ່ນຍັງບໍ່ທັນມີທ່າອ່ຽງທີ່ຈະຫລຸດລົງເທື່ອ. ເຊິ່ງອີກ 2 ວັນ ກໍແມ່ນບຸນອອກພັນສາ ປະວໍລະນາ ເຊິ່ງຈະມີປະຊາຊົນຜູ້ສັດທາອອກໄປໃສ່ບາດ ຕາມວັດວາຕ່າງໆ ຕາມຮີດຄອງປະເພນີທີ່ເຄີຍໄດ້ຈັດມາ. ຖ້າພວກເຮົາຫາກເມີນເສີຍຕໍ່ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 1330/ຫສນຍ, ລົງວັນທີ 15 ຕຸລາ 2021 ແລະ ຄຳແນະນຳຂອງຄະນະສະເພາະກິດຂັ້ນຕ່າງໆທີ່ກ່ຽວຂ້ອງ ກ່ຽວກັບການໂຮມຊຸມນຸມ ຫລື ການຈັດງານບຸນປະເພນີ ພວກເຮົາທຸກຄົນ ກໍຈະສ່ຽງຕໍ່ການຕິດເຊື້ອ ໃນໄລຍະໄປຮ່ວມງານດັ່ງກ່າວ ເຊິ່ງກໍມີຄວາມສ່ຽງທີ່ຈະຕິດເຊື້ອ ພ້ອມທັງ ນຳເອົາເຊື້ອໄປສູ່ຄອບຄົວ ແລະ ຊຸມຊົນອ້ອມຂ້າງ.
ສະນັ້ນ ໃນງານບຸກປະເພນີອອກພັນສາ ປະວໍລະນາທີ່ໄດ້ຮອບວຽນມາໃນປີນີ້ ຂໍໃຫ້ທຸກຄົນ, ທຸກຄອບຄົວມີສະຕິທີ່ສຸດໃນການໄປຮ່ວມສິນກິນທານຢູ່ວັດ ແຕ່ລະບ້ານຄວນໄດ້ປະກາດໃຫ້ລູກບ້ານ ຊາບກ່ຽວກັບກິດຈະກໍາຂອງວັດ. ອົງການພຸດທະສາດສະໜາສໍາພັນລາວ ໄດ້ລິເລີ່ມພິທີການໄຫ້ວພະສູດມົນແບບໃໝ່ຜ່ານທາງອອນລາຍ ນີ້ເປັນທາງເລືອກທີ່ດີທີ່ສຸດໃນການເຮັດບຸນ ໃນໄລຍະທີ່ມີການລະບາດພະຍາດໂຄວິດ -19. ເຖິງວ່າຈະເປັນບ້ານແດງ ຫລື ບ້ານບໍ່ແດງກໍຕາມ ການຮ່ວມທານຂອງຄອບຄົວທີ່ມີສັດທາ ກໍສາມາດດໍາເນີນຜ່ານການໂອນເງິນອອນລາຍຜ່ານລະບົບທະນາຄານ ສ່ວນທາງວັດເອງ ກໍສາມາດໃຫ້ພອນແກ່ອອກຕົນຍາດໂຍມ ຜ່ານທາງອອນລາຍໄດ້ເຊັ່ນກັນ. ຂໍໃຫ້ບຸນອອກພັນສາປີນີ້ ເປັນງານບຸນທີ່ທຸກຄົນໄດ້ຮ່ວມບຸນທີ່ແທ້ຈິງ ແຕ່ບໍ່ເປັນການສ້າງບາບ ໂດຍການເອົາເຊື້ອພະຍາດໄປແຜ່ໃນວັດ ຫລື ໃຫ້ຄົນອື່ນໆໃນສັງຄົມ ລວມທັງເປັນການໂມທະນາບຸນໃຫ້ຕົນເອງ ແລະ ຄອບຄົວ ໂດຍການບໍ່ໄປຕິດເອົາເຊື້ອ ແລ້ວນໍາເຂົ້າມາສູ່ຄອບຄົວ ເດັດຂາດ. ຖ້າເຮັດໄດ້ດີ ພວກເຮົາທຸກຄົນ ຈຶ່ງຈະບໍ່ຕົກຢູ່ໃນສະພາບການລະບາດຢ່າງໄວວາ ແລະ ລາມກວ້າງ ເໝືອນດັ່ງທີ່ເຄີຍໄດ້ປະສົບ ຜ່ານການຮ່ວມບຸນປີໃໝ່ລາວ ໃນເດືອນ 4 ຜ່ານມານີ້.
ຖ້າຫາກທ່ານໄປໃສ່ບາດ ຢູ່ໃນບ້ານທີ່ບໍ່ຖືກກຳນົດເປັນບ້ານແດງ ກໍໃຫ້ປະຕິບັດມາດຕະການປ້ອງກັນຕົນເອງ ຢ່າງເຂັ້ມງວດທີ່ສຸດ ເປັນຕົ້ນ ໃສ່ຜ້າປິດປາກ-ດັງ, ພົກພາເຈວລ້າງມືຂ້າເຊື້ອຕິດຕົວ, ຮັກສາໄລຍະຫ່າງ 2 ແມັດຂຶ້ນໄປ, ບໍ່ແຫຍ້ກັນ, ຮັກສາມາລະຍາດໃນການໄອ-ຈາມ ຫລື ຖົ່ມນ້ຳລາຍ, ຄາກຂີ້ກະເທີ່ ແລະ ອື່ນໆ ທີ່ເປັນພຶດຕິກຳທີ່ມີຄວາມສ່ຽງ.
ດ່ັງນັ້ນ, ຈຶ່ງສະເໜີໃຫ້ຄະນະຮັບຜິດຊອບຈັດງານໃນແຕ່ລະວັດ ໃຫ້ມີມາດຕະການກັ່ນກອງ ເພື່ອບໍ່ໃຫ້ເກີດມີການຕິດເຊື້ອຢູ່ພາຍໃນວັດຂອງທ່ານ. ພ້ອມກັນນັ້ນ, ກໍຈັດສັນໃຫ້ພຣະສົງ, ສຳມະເນນ ຮັກສາໄລຍະຫ່າງ ໃນໄລຍະສູດ, ໃຫ້ພອນ ລວມທັງ ສັນເຂົ້າໃນບາດໃຜບາດມັນ ຕາມທໍານຽມຂອງສົງ ບໍ່ນັ່ງສັນຮ່ວມກັນເປັນພາເຂົ້າເດັດຂາດ ເພື່ອຫລີກເວັ້ນການຕິດເຊື້ອຂອງພຣະສົງທັງໝົດໃນວັດ.
