ທຣຳ ເປີດຕົວ TRUTH Social ແພກຟອມໂຊຊຽວມີເດຍຂອງຕົນເອງ ແຂ່ງກັບເຟສບຸກ-ທະວິດເຕີ
ໂດນັລ ທຣຳ ປະກາດເປີດຕົວແພກຟອມໂຊຊຽວມີເດຍຂອງຕົນໃນຊື່ “TRUTH Social” ຫລັງຖືກຫ້າມຈາກແພກຟອມຫລັກຄືເຟສບຸກ-ທະວິດເຕີ.
ວັນທີ 21 ຕຸລາ 2021, ສຳນັກຂ່າວຕ່າງປະເທດລາຍງານວ່າ: ໂດນັລ ທຣຳ ອະດີດປະທານາທິບໍດີອາເມລິກາ ປະກາດແຜນການເປີດຕົວ ແພກຟອມໂຊຊຽວມີເດຍຂອງຕົນເອງ ໂດຍໃສ່ຊື່ວ່າ: “TRUTH Social”.
ອະດີດປະທານາທິບໍດີ ທຣຳ ເຊິ່ງຖືກຫ້າມຈາກແພກຟອມຍອດນິຍົມຄືເຟສບຸກ ແລະ ທະວິດເຕີ ເນື່ອງຈາກເຫດການບຸກອາຄານລັດຖະສະພາເມື່ອຕົ້ນປີຜ່ານມາເປີດເຜີຍວ່າ: ແພກຟອມໃໝ່ຂອງທ່ານມີຂຶ້ນເພື່ອຕໍ່ຕ້ານການກົດຂີ່ຂອງບໍລິສັດເຕັກໂນໂລຊີຂະໜາດໃຫຍ່ ທີ່ມີແຕ່ປິດກັ້ນບໍ່ໃຫ້ຝ່າຍເຫັນຕ່າງໃນອາເມລິກາໄດ້ມີປາກມີສຽງໃນການສະແດງອອກ.
ທັງນີ້ TRUTH Social ຈະດຳເນີນງານພາຍໃຕ້ບໍລິສັດ Trump Media and Technology Group ເຊິ່ງເປັນບໍລິສັດເຕັກໂນໂລຊີທີ່ຕັ້ງຂຶ້ນໃໝ່ຜ່ານການຄວບຄຸມກິດຈະການກັບ Digital World Acquisition ບໍລິສັດໃນໄມອາມີທີ່ຈົດທະບຽນຢູ່ໃນຕະຫລາດຫລັກຊັບ Nasdaq.
ການເຄື່ອນໄຫວຫລ້າສຸດຂອງອະດີດປະທານາທິບໍດີ ທຣຳ ເກີດຂຶ້ນຫລັງຈາກມີກະແສຂ່າວເລື່ອງການເປີດຕົວແພກຟອມໂຊຊຽວມີເດຍອອກມາແຂ່ງຂັນກັບເຟສບຸກ ແລະ ທະວິດເຕີອອກມາກ່ອນໜ້ານີ້ ແລະ ມີການຄາດຄະເນກັນວ່າ: ທ່ານຕ້ອງການສ້າງແພກຟອມຂອງຕົນເອງຂຶ້ນມາເພື່ອປູທາງສຳລັບການຫາສຽງເລືອກຕັ້ງປະທານາທິບໍດີອາເມລິກາຄັ້ງໜ້າໃນປີ 2024.
ສຳລັບ TRUTH Social ຈະເປີດໃຫ້ນຳໃຊ້ເວີຊັນເບຕ້າສຳລັບຜູ້ໄດ້ຮັບເຊີນກ່ອນໃນໄລຍະທຳອິດເດືອນພະຈິກນີ້ ໂດຍພ້ອມໃຫ້ດາວໂຫລດລ່ວງໜ້າແລ້ວໃນ Apple App Store ແລະ ຄາດວ່າຈະເປີດໃຊ້ເປັນວົງກວ້າງໃນໄຕມາດທຳອິດປີ 2022.
ອ້າງອີງ:
https://www.theguardian.com/…/donald-trump-truth-social…
https://www.ft.com/…/0c989fd1-2e1a-4509-a478-02bb494f40de
