ວິທີຕື່ມກຳລັງໃຈໃນມື້ທີ່ໃຈທໍ້ຖອຍ

      ໝົດກຳລັງໃຈ, ໝົດພະລັງໃນການໃຊ້ຊີວິດ ບໍ່ວ່າຈະເກີດຈາກຄວາມອິດເມື່ອຍອ່ອນເພຍຈົນເກີນໄປ, ຜິດຫວັງຊ້ຳໆ ຫລື ຍ້ອນ ໝົດກຳລັງຈົນບໍ່ຢາກສົນໃຈຫຍັງອີກຕໍ່ໄປ ມື້ນີ້ພວກເຮົາຈະພາທ່ານມາສ້າງແຮງໃຈໃໝ່ ເພື່ອຕື່ມພະລັງ ຢ່າປ່ອຍໃຫ້ຕົນເອງໝົດ ຫວັງ, ມາເອີ້ນກຳລັງໃຈກັບຄືນ, ລຸກຂຶ້ນສູ້ອີກຄັ້ງ.

1. ຫາເວລາພັກເມື່ອຍແດ່ : ບໍ່ວ່າຈະເມື່ອຍກາຍ ຫລື ເມື່ອຍມາຈາກໃຈ ກໍຂໍໃຫ້ຢຸດພັກກ່ອນເລີຍ ຖອຍອອກມາຈາກບັນຫາ ແລະ ຢຸດພັກຫາຍໃຈເລິກໆກ່ອນ ເພາະຖ້າຍິ່ງຝືນ ຍິ່ງທົນ ຍິ່ງເຮັດຕໍ່ ຈົນໝົດແຮງ ອາດເຮັດໃຫ້ເຮົາຍິ່ງທໍ້ ຍິ່ງເມື່ອຍ ຈົນ ໝົດຄວາມອົດທົນເລີຍກໍເປັນໄດ້, ລອງອອກໄປຍ່າງຫລິ້ນ, ພັກຜ່ອນ, ເຮັດກິດຈະກຳທີ່ມັກ, ຢຸດຫລິ້ນສື່ສັງຄົມອອນ ລາຍຈັກໄລຍະ, ລອງຟັງສຽງໃນໃຈຕົນເອງແດ່, ໃຫ້ລາງວັນຕົນເອງໄດ້ທ່ອງທ່ຽວໃນບ່ອນທີ່ຢາກໄປ, ໄດ້ກິນຫຍັງ ແຊບໆ, ອ່ານໜັງສື ເຮັດສິ່ງນີ້ເປັນການພັດທະນາຄວາມສາມາດຂອງຕົນເອງ, ການຖອຍອອກມາບາງເທື່ອາດຈະໄດ້ ໄອເດຍໃໝ່ໆກໍມີ.
2. ເຮັດເຕັມທີ່ ປ່ອຍວາງໃນຜົນຕອບຮັບ : ເມື່ອໃດກໍຕາມທີ່ເຮົາຮູ້ສຶກຜິດຫວັງ ຢ່າເມົາແຕ່ໂທດຕົນເອງເລີຍ ເຮົາໄດ້ເຮັດທຸກ ຢ່າງດີທີ່ສຸດແລ້ວ ເພາະບາງເທື່ອບັນຫາມັນກໍມີຫລາຍເຫດຜົນ ຫລາຍປັດໄຈທີ່ເຮົາຄວບຄຸມບໍ່ໄດ້. ສະນັ້ນ ສິ່ງທີ່ຄວນ ເຮັດໃຫ້ສຸດຄວາມສາມາດກ່ອນຢ່າງໜ້ອຍໆຖ້າຜົນຈະອອກມາບໍ່ດີແທ້ໆ ເຮົາກໍຈະໄດ້ບໍ່ເສຍດາຍ ນັ່ງຄິດວ່າຖ້າເຮົາໄດ້ ເຮັດແບບນັ້ນແບບນີ້ກໍຄົງຈະດີ.
3. ບັນຫາ = ເຂັ້ມແຂງຂຶ້ນ : ເຄີຍໄດ້ຍິນບໍ່ວ່າ What doesn’t kill you, makes you stronger ບັນຫາຕ່າງໆທີ່ເກີດ ຂຶ້ນອາດຈະເຮັດໃຫ້ເຮົາຮູ້ສຶກທໍ້ຖອຍ ແລະ ໝົດຫວັງ, ແຕ່ຖ້າເຮົາຜ່ານມັນມາໄດ້ ເຊື່ອເລີຍວ່າເຮົາໄດ້ຮຽນຮູ້ແນວທາງ ແລະ ວິທີຄິດຈາກບັນຫາທີ່ເກີດຂຶ້ນແລ້ວ ທີ່ຈະແກ້ໄຂບັນຫາຂອງແຕ່ລະບັນຫາແມ່ນຫຍັງ ແລ້ວເຮົາຕ້ອງແກ້ໄຂແນວໃດ ສິ່ງສຳຄັນຄື ເຮົາຈະເກັ່ງ ແລະ ເຂັ້ມແຂງຂຶ້ນຢ່າງແນ່ນອນ ຈື່ໄວ້ວ່າການລົ້ມເຫລວແດ່ມັກຈະນຳໄປສູ່ຄວາມສຳເລັດໃນ ທີ່ສຸດ.
4. ໃຫ້ກຳລັງໃຈຕົນເອງ : ການມີເປົ້າໝາຍເປັນເລື່ອງທີ່ດີ, ແຕ່ຢ່າກົດດັນຕົນເອງຫລາຍເກີນໄປ, ຢ່າໄປປຽບທຽບຜົນງານ ຕົນເອງກັບຄົນອື່ນຈົນໝົດກຳລັງໃຈ ເພາະສິ່ທີ່ເຮົາຄວນເຮັດແທ້ໆແມ່ນການເຮັດວຽກໂດຍຮູ້ຄວາມສາມາດຂອງຕົນ ເອງ, ຮູ້ວ່າຕົນເອງເກັ່ງຫຍັງ, ມີຈຸດເດັ່ນຫຍັງໃຫ້ພັດທະນາ ແລະ ມີຈຸດດ້ອຍຫຍັງທີ່ຄວນແກ້ໄຂ ເພາະຈະຊ່ວຍໃຫ້ເຮົາ ເຮັດວຽກໄດ້ມີປະສິດທິພາບ ແລະ ເຫັນຄຸນຄ່າຂອງຕົນເອງຫລາຍຂຶ້ນ.
5. ເອົາຊະນະຄວາມຢ້ານ : ຄວາມຢ້ານເປັນອຸປະສັກຢ່າງໜຶ່ງທີ່ເຮັດໃຫ້ເຮົາບໍ່ສາມາດເຮັດວຽກໄດ້ ຢ້ານວ່າເຮັດລົງໄປ ແລ້ວຈະອອກມາບໍ່ສົມບູນແບບ, ຢ້ານວ່າເຮົາຈະບໍ່ເປັນທີ່ພໍໃຈຂອງຫົວໜ້າ ແລະ ເພື່ອນຮ່ວມງານ, ຢ້ານໄປໝົດທຸກຢ່າງ ໂດຍທີ່ຍັງບໍ່ໄດ້ລົງມືເຮັດ. ໃຫ້ຢຸດຄິດ, ເຂົ້າໃຈວ່າມັນຍາກ, ແຕ່ຖ້າເຮົາເອົາຊະນະຄວາມຢ້ານໄດ້, ເຊື່ອໝັ້ນໃນຕົນເອງ ເຂົ້າໄວ້ວ່າເຮົາເຮັດໄດ້ ແລະ ເຮົາຈະເຮັດໃຫ້ສຳເລັດນຳ ເມື່ອເຮົາມີຄວາມໝັ້ນໃຈໃນການເຮັດວຽກ ຄວາມສຳເລັດທີ່ ເຮົາຄາດໝາຍໄວ້ກໍຢູ່ບໍ່ໄກຫລາຍດອກ ຖ້າຍັງຮູ້ສຶກຢ້ານຢູ່ ໃຫ້ລົງມືເຮັດໄປກ່ອນ ໂດຍທີ່ຍັງຢ້ານຢູ່ ຮັບຮອງໄດ້ວ່າ ຮູ້ໂຕ ອີກເທື່ອ ເຮົາກໍຊະນະຄວາມຢ້ານຂອງໂຕເອງໄດ້ແລ້ວ.