ນິວຊີແລນຕັ້ງເປົ້າສັກວັກຊີນຕ້ານໂຄວິດຄົບໂດສໃຫ້ໄດ້ 90% ກ່ອນຈະຍົກເລີກມາດຕະການລັອກດາວ
ວັນທີ 22 ຕຸລາ 2021, ທ່ານ ນາງ ຈາຊິນດາ ອາເດິນ ນາຍົກລັດຖະມົນຕີຂອງນິວຊີແລນ ປະກາດຕັ້ງເປົ້າສັກວັກຊີນຕ້ານໂຄວິດຄົບໂດສໃຫ້ໄດ້ 90% ຂອງພົນລະເມືອງທີ່ມີສິດເຂົ້າຮັບວັກຊີນ ກ່ອນຈະຍົກເລີກມາດຕະການລັອກດາວຕ່າງໆ ທີ່ໃຊ້ຮັບມືຕໍ່ການແຜ່ລະບາດຂອງໂຄວິດພາຍໃນປະເທດ ໂດຍສະເພາະສາຍພັນເດວຕາ.
ໂອ໊ກແລນເປັນໜຶ່ງໃນເມືອງທີ່ຖືເປັນສູນກາງການແຜ່ລະບາດຮອບຫລ້າສຸດຂອງນິວຊີແລນ ແລະ ຢູ່ພາຍໃຕ້ມາດຕະການລັອກດາວມາດົນກວ່າ 2 ເດືອນແລ້ວ, ທາງການຄາດວ່າຈະສາມາດສັກວັກຊີນຄົບໂດສໃຫ້ພົນລະເມືອງທີ່ອາໄສຢູ່ໃນເມືອງແຫ່ງນີ້ໄດ້ຕາມເປົ້າໝາຍທີ່ວາງໄວ້ໃນມໍ່ໆນີ້.
ຂະນະທີ່ພື້ນທີ່ອື່ນໆຂອງນິວຊີແລນ ເຖິງວ່າຈະບໍ່ໄດ້ມີສູນກາງການແຜ່ລະບາດໃໝ່ເກີດຂຶ້ນ, ແຕ່ຈະໄດ້ຮັບການຫລຸດຜ່ອນມາດຕະການຮັບມືໂຄວິດຕ່າງໆຫລາຍຂຶ້ນ ເມື່ອແຕ່ລະພື້ນທີ່ສາມາດສັກວັກຊີນໄດ້ຕາມເປົ້າ 90%. ເຖິງຢ່າງໃດກໍຕາມ, ຄົນຍັງຈຳເປັນຕ້ອງສະແດງຫລັກຖານທີ່ຢືນຢັນວ່າຕົນເຂົ້າຮັບການສັກວັກຊີນແລ້ວ ເພື່ອເຂົ້າໃຊ້ບໍລິການ ແລະ ສະຖານທີ່ຕ່າງໆ.
ນອກຈາກນີ້, ທາງການນິວຊີແລນຍັງໃຫ້ຄຳໝັ້ນຈະຊ່ວຍເຫລືອບັນດາທຸລະກິດທີ່ໄດ້ຮັບຜົນກະທົບຈາກມາດຕະການລັອກດາວທີ່ເກີດຂຶ້ນ, ພ້ອມສະໜັບສະໜູນໃຫ້ບັນດາຊົນເຜົ່າພື້ນເມືອງຂອງນິວຊີແລນສາມາດເຂົ້າເຖິງ ແລະ ເຂົ້າຮັບວັກຊີນຕ້ານໂຄວິດໄດ້ງ່າຍຂຶ້ນ.
ໄລຍະຜ່ານມາ ນິວຊີແລນຖືເປັນໜຶ່ງໃນປະເທດທີ່ຮັບມືສະຖານະການການແຜ່ລະບາດຂອງໂຄວິດໄດ້ຢ່າງມີປະສິດທິພາບ, ກວດຫາເຊື້ອ, ກັກຕົວ, ຫາຜູ້ຕິດເຊື້ອ ແລະ ເຝົ້າຕິດຕາມຜົນຢ່າງຈິງຈັງ, ເຂັ້ມງວດ ແລະ ຈຳກັດມາດຕະການເດີນທາງເຂົ້າ-ອອກປະເທດ ແລະ ການເດີນທາງຂ້າມພື້ນທີ່. ແຕ່ກໍຍັງບໍ່ສາມາດຢຸດການແຜ່ລະບາດໄດ້ຢ່າງຊິ້ນເຊີງ ນັບແຕ່ເຊື້ອເດວຕາແຜ່ລະບາດ ສົ່ງຜົນໃຫ້ທາງການປ່ຽນແປງຈາກການຢຸດການແຜ່ລະບາດມາເປັນປ່ຽນແປງ ແລະ ເປີດໂອກາດໃຫ້ປະຊາຊົນໄດ້ມີໂອກາດໃຊ້ຊີວິດທ່າມກາງໂຄວິດທີ່ຍັງບໍ່ຫາຍໄປ ຫລັງແຜ່ລະບາດມາເກືອບ 2 ປີ.
ຫລ້າສຸດ ນິວຊີແລນມີຜູ້ຕິດເຊື້ອສະສົມແລ້ວ 5.450 ຄົນ, ເສຍຊີວິດແລ້ວ 28 ຄົນ, ພົນລະເມືອງປະມານ 60% ຂອງພົນລະເມືອງທີ່ມີສິດເຂົ້າຮັບການສັກວັກຊີນໄດ້ຮັບວັກຊີນຄົບໂດສແລ້ວ.
ອ້າງອີງ:
- https://apnews.com/article/coronavirus-pandemic-business-health-new-zealand-auckland-39bfb0808ff00607fd310269743134df
- https://abcnews.go.com/Health/wireStory/zealand-sets-90-vaccination-target-end-lockdowns-80718292
- https://www.reuters.com/world/asia-pacific/new-zealand-sets-90-vaccine-target-end-lockdowns-reopen-2021-10-21/
- https://coronavirus.jhu.edu/region/new-zealand
