ການສັກວັກຊີນຄົບໂດສ ແມ່ນຈຳເປັນທີ່ສຸດ ເພື່ອຫລຸດຜ່ອນການເສຍຊີວິດຍ້ອນພະຍາດໂຄວິດ-19
ທ່ານ ດຣ ນາງພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ລາຍງານວັນທີ 23 ຕຸລາ 2021 ນີ້ວ່າ: ໃນສະພາບທີ່ມີການລະບາດໃນຊຸມຊົນຢ່າງຕໍ່ເນື່ອງນີ້, ການສັກວັກຊີນແມ່ນຈຳເປັນທີ່ສຸດ ເພື່ອຫລຸດຜ່ອນການເສຍຊີວິດຍ້ອນພະຍາດໂຄວິດ-19 ໂດຍສະເພາະໃນກຸ່ມຄົນທີ່ມີປັດໃຈສ່ຽງສູງ (ຜູ້ທີ່ມີພະຍາດປະຈຳຕົວ, ຜູ້ສູງອາຍຸ) ແລະ ພາຍຫລັງສັກວັກຊີນແລ້ວຮ່າງກາຍເຮົາຕ້ອງການເວລາໄລຍະໜຶ່ເພືື່ອສ້າງພູຄຸ້ມກັນ.
ສະນັ້ນ ເມື່ອທ່ານໄດ້ຮັບວັກຊີນຄົບໄວ ຮ່າງກາຍຂອງເຮົາກໍຈະມີພູມຄຸ້ມກັນໄດ້ໄວ ແລະ ສາມາດຫລຸດຜ່ອນຄວາມສ່ຽງຕໍ່ການເຈັບເປັນຮຸນແຮງ ແລະ ເສຍຊີວິດຈາກພະຍາດໂຄວິດ-19 ດ້ວຍການສັກວັກຊີນໃຫ້ຄົບຕາມຄຳແນະນຳຂອງແພດໝໍ, ການໄດ້ຮັບວັກຊີນແມ່ນການຫລຸດຜ່ອນຄວາມສ່ຽງບໍ່ໃຫ້ເກີດເຈັບເປັນຮຸນແຮງ ແລະ ເສຍຊີວິດເມືື່ອຕິດເຊືື້ອ, ດັ່ງນັ້ນຈຶ່ງຂໍໃຫ້ບັນດາກຸ່ມເປົ້າໝາຍໃນແຕ່ລະແຂວງຈົ່ງໄດ້ພ້ອມໃຈກັນໄປຮັບວັກຊີນ ເພືື່ອໃຫ້ເຂົ້າເຖິງວັກຊີນໄດ້ຢ່າງສະເໝີພາບທົົ່ວເຖິງ ແລະ ເຖິງແມ່ນວ່າທ່ານຈະໄດຮັບວັກຊີນຄົບແລ້ວ, ແຕ່ກໍຍັງຕ້ອງປະຕິບັດມາດຕະການປ້ອງກັນຕົນເອງຢ່າງເຂັ້ມງວດເພືື່ອຄວາມປອດໄພຂອງທ່ານ ແລະ ທຸກຄົນໃນສັງຄົມ.
ປັດຈຸບັນສາມາດສັກວັກຊີນເຂັມທີ 1 ໄດ້ 3.186.921 ກວມເອົາ 43,43%, ເຂັມທີ 2 ໄດ້ 2.717.482 ກວມເອົາ 37,03%. ສຳລັບສະຖານໃຫ້ວັກຊີນຢູ່ນະຄອນຫລວງວຽງຈັນມີ: ໂຮງໝໍສູນກາງ, ໂຮງໝໍເມືອງ 9 ຕົວເມືອງ, ວັດຈີນ ບ້ານດົງປາແຫລບ ເມືອງຈັນທະບູລີ (ເປີດວັນຈັນ-ວັນສຸກ).
