ອາເມລິກາກຽມປະກາດໃຊ້ມາດຕະການໃໝ່ ສຳລັບຜູ້ທີ່ຕ້ອງການເດີນທາງເຂົ້າປະເທດ ມີຜົນບັງຄັບໃຊ້ 8 ພະຈິກນີ້
ວັນທີ 26 ຕຸລາ 2021: ທາງການອາເມລິກາກຽມປະກາດໃຊ້ມາດຕະການໃໝ່ສຳລັບຜູ້ທີ່ຕ້ອງການເດີນທາງເຂົ້າປະເທດ ຫລັງຈາກອາເມລິກາຍົກເລີກຂໍ້ຈຳກັດການເດີນທາງບາງປະການເປັນຄັ້ງທຳອິດ ນັບແຕ່ມີການແຜ່ລະບາດຂອງພະຍາດໂຄວິດມາເກືອບ 1 ປີ 10 ເດືອນ ໂດຍຈະມີຜົນບັງຄັບໃຊ້ນັບແຕ່ວັນທີ 8 ພະຈິກນີ້.
ໂດຍອາເມລິກາຈະເລີ່ມອະນຸຍາດໃຫ້ນັກເດີນທາງເຊິ່ງສ່ວນຫລາຍເກືອບທັງໝົດເຂົ້າຮັບວັກຊີນຕ້ານໂຄວິດແລ້ວ ສາມາດເດີນທາງເຂົ້າປະເທດໄດ້ ເຊິ່ງແຕ່ລະສາຍການບິນຈະຕ້ອງມີການຄັດກອງ ແລະ ກວດສອບສະຖານະການເຂົ້າຮັບວັກຊີນຂອງຜູ້ໂດຍສານກ່ອນຈະເດີນທາງມາອາເມລິກາຢ່າງເຂັ້ມງວດ.
ມາດຕະການຫ້າມ ແລະ ຂໍ້ຈຳກັດໃນການເດີນທາງເຂົ້າອາເມລິກາ ປະກາດໃຊ້ມາແຕ່ສະໄໝອະດີດປະທານາທິບໍດີ ໂດນັລ ທຣຳ ກ່ອນຈະຂະຫຍາຍໄລຍະເວລາການປະກາດໃຊ້ອອກໄປໃນຊ່ວງທີ່ປະທານາທິບໍດີ ໂຈ ໄບເດນ ເຂົ້າມາຮັບຕຳແໜ່ງຕໍ່ ໂດຍນັກເດີນທາງສ່ວນຫລາຍທີ່ຖືກຫ້າມມາຈາກບຣາຊິວ, ຈີນ, ອາຟຣິກາໃຕ້, ອັງກິດ, ປະເທດໃນເຊງເກັ້ນ 26 ປະເທດ ລວມທັງໄອຣ໌ແລນ, ອິນເດຍ ແລະ ອີຣານ.
ຄຳຖະແຫລງຂອງ ໄບເດນ ລະບຸວ່າ: “ນີ້ຄືບັນຫາກ່ຽວກັບຜົນປະໂຫຍດຂອງອາເມລິກາທີ່ຈະພະຍາຍາມຍົກເລີກຂໍ້ຈຳກັດທາງດ້ານການເດີນທາງໄປເທື່ອລະປະເທດທີ່ເຄີຍປະກາດໃຊ້ໄປກ່ອນໜ້ານີ້ລະຫວ່າງທີ່ມີການແຜ່ລະບາດຂອງໂຄວິດ ແລະ ເພື່ອປັບໃຊ້ນະໂຍບາຍການເດີນທາງທາງອາກາດທີ່ອາໄສການສັກວັກຊີນເປັນຫລັກ ເພື່ອພິຈາລະນາ ແລະ ຄັດກອງໃຫ້ການເດີນທາງເຂົ້າມາອາເມລິກາເປັນໄປຢ່າງປອດໄພ”.
ໂດຍແຕ່ລະສາຍການບິນຕ້ອງຢືນຢັນວ່າຫລັກຖານທີ່ຜູ້ໂດຍສານສະແດງເປັນຫລັກຖານແທ້ທີ່ຮັບຮອງຈາກໜ່ວຍງານທີ່ກ່ຽວຂ້ອງ ແລະ ຄວນຈະຕ້ອງເຂົ້າຮັບວັກຊີນມາແລ້ວຢ່າງໜ້ອຍ 2 ອາທິດກ່ອນເດີນທາງ ໂດຍຍິ່ງຖ້າເປັນວັກຊີນທີ່ໄດ້ຮັບຮອງຈາກທາງການອາເມລິກາຈະມີໂອກາດໄດ້ຮັບການອະນຸມັດໃຫ້ເດີນທາງເຂົ້າປະເທດໄດ້.
ຂະນະທີ່ຜູ້ທີ່ຍັງບໍ່ໄດ້ເຂົ້າຮັບການສັກວັກຊີນ ລວມທັງຜູ້ທີ່ເປັນພົນລະເມືອງອາເມລິກາຈະຕ້ອງສະແດງຜົນການກວດທີ່ຢືນຢັນບໍ່ພົບການຕິດເຊື້ອໂຄວິດພາຍໃນ 24 ຊົ່ວໂມງກ່ອນອອກເດີນທາງ, ສ່ວນເດັກທີ່ມີອາຍຸຕໍ່າກວ່າ 18 ປີ ຈະໄດ້ຮັບການຍົກເວັ້ນເງື່ອນໄຂກ່ຽວກັບການເຂົ້າຮັບວັກຊີນ, ແຕ່ຍັງຈຳເປັນຕ້ອງສະແດງຜົນກວດຫາເຊື້ອທີ່ຢືນຢັນວ່າບໍ່ພົບການຕິດເຊື້ອພາຍໃນ 3 ວັນກ່ອນອອກເດີນທາງ.
ອ້າງອີງ:
- https://www.reuters.com/world/us/us-outline-nov-8-international-travel-reopening-vaccination-rules-2021-10-25/
- https://www.bbc.com/news/world-us-canada-59044856
- https://www.wsj.com/articles/u-s-reopening-of-borders-to-international-travelers-what-to-know-about-the-rules-11635191544
