ໄບເດນ ປະກາດມອບເງິນ ຊ່ວຍເຫລືອອາຊຽນ 102 ລ້ານໂດລາ ຊີ້ເປັນຫຸ້ນສ່ວນທາງຍຸດທະສາດສຳຄັນ
ອາເມລິກາ ກຽມໃຫ້ເງິນຊ່ວຍເຫລືອພາກພື້ນອາຊຽນ ນຳໄປໃຊ້ໃນດ້ານການຮັບມືພະຍາດລະບາດ, ສະພາບອາກາດປ່ຽນແປງ, ການຄ້າ, ການສຶກສາ ແລະ ຄວາມເທົ່າທຽມທາງເພດ.
ວັນທີ 26 ຕຸລາ 2021, ເວັບໄຊທຳນຽບຂາວຂອງອາເມລິກາ ເປີດເຜີຍຖະແຫລງການລະບຸວ່າ: ປະທານາທິບໍດີ ໂຈ ໄບເດນ ຈະປະກາດມອບເງິນເພື່ອຂະຫຍາຍການຮ່ວມມືລະຫວ່າງ ອາເມລິກາ ແລະ ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ ຫລື ອາຊຽນ ສະທ້ອນໃຫ້ເຫັນເຖິງບົດບາດຂອງພາກພື້ນໃນຖານະຫຸ້ນສ່ວນທາງຍຸດທະສາດ ແລະ ເປັນສູນກາງໃນວິໄສທັດ ອິນໂດ-ປາຊີຟິກທີ່ເປີດກວ້າງ ແລະ ເສລີຂອງອາເມລິກາ.
ໃນກອງປະຊຸມສຸດຍອດຜູ້ນຳອາຊຽນທີ່ມີຂຶ້ນໃນວັນທີ 26 ຕຸລານີ້ ຈະເປັນຄັ້ງທຳອິດໃນຮອບ 4 ປີທີ່ອາເມລິກາເຂົ້າມາມີສ່ວນຮ່ວມ ໂດຍໃນຄັ້ງນີ້ປະທານາທິບໍດີ ໄບເດນ ກຽມສະໜັບສະໜູນເງິນ 102 ລ້ານໂດລາສະຫະລັດ ເພື່ອນຳໄປໃຊ້ໃນດ້ານສາທາລະນະສຸກ, ສິ່ງແວດລ້ອມ, ເສດຖະກິດ ແລະ ການສຶກສາ.
40 ລ້ານໂດລາ ຈະຖືກນຳໄປໃຊ້ໃນການວິໄຈເພື່ອພັດທະນາ ແລະ ເພີ່ມປະສິດທິພາບໃນລະບົບສາທາລະນະສຸກ ໂດຍທຳນຽບຂາວເຜີຍວ່າ: ຕະຫລອດ 20 ປີຜ່ານມາ, ອາເມລິກາໄດ້ມອບເງິນຊ່ວຍເຫລືອດ້ານສາທາລະນະສຸກໃຫ້ອາຊຽນໄປແລ້ວຫລາຍກວ່າ 3,5 ພັນລ້ານໂດລາ.
ຮອງລົງມາຄືງົບສຳລັບຮັບມືສະພາບອາກາດປ່ຽນແປງ (Climate Change) ທີ່ຈັດສັນໄວ້ 20,5 ລ້ານໂດລາ ສຳລັບການບັນລຸເປົ້າໝາຍລະດັບໂລກ ທີ່ຕ້ອງການຄວບຄຸມບໍ່ໃຫ້ອຸນຫະພູມຂອງໂລກສູງຂຶ້ນເກີນ 1,5 ອົງສາ ໂດຍຈະນຳໄປໃຊ້ດ້ານສິ່ງແວດລ້ອມ ແລະ ການພັດທະນາທີ່ຍືນຍົງ ລວມທັງການຫລຸດມົນລະພິດໃນອາກາດ ເຊິ່ງເປັນອີກ 1 ບັນຫາສຳຄັນໃນພາກພື້ນ.
ສ່ວນງົບທີ່ເຫລືອ ຈະເປັນການຈັດສັນໃຫ້ດ້ານການຄ້າ ແລະ ນະວັດຕະກຳ 20 ລ້ານໂດລາ, ໂຄງການເງິນກູ້ຢືມເພື່ອການສຶກສາ 16 ລ້ານໂດລາ, ການຝຶກຄູສອນພາສາອັງກິດ 1,5 ລ້ານໂດລາ ແລະ ສົ່ງເສີມດ້ານຄວາມເທົ່າທຽມ ແລະ ຄວາມສະເໝີພາບທາງເພດອີກ 4 ລ້ານໂດລາ.
ອ້າງອີງ:
https://www.whitehouse.gov/…/fact-sheet-new…/
