ຮອງນາຍົກ ຊີ້ແຈງ ຕໍ່ຂໍ້ຊັກຖາມຂອງສະມາຊິກສະພາແຫ່ງຊາດ ກ່ຽວກັບຄວາມຄືບໜ້າການແກ້ໄຂຂໍ້ຄົງຄ້າງ ຢູ່ຂົງເຂດການລົງທຶນຂອງລັດ

ວັນທີ 3 ພະຈິກ 2021 ຜ່ານມາ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ໄດ້ຊີ້ແຈງຕໍ່ຂໍ້ຊັກຖາມຂອງສະມາຊິກສະພາແຫ່ງຊາດ (ສສຊ) ໃນຫລາຍບັນຫາ ເປັນຕົ້ນແມ່ນການແກ້ໄຂບັນດາຂໍ້ຄົງຄ້າງຢູ່ຂົງເຂດການລົງທຶນຂອງລັດ ຊຶ່ງໄລຍະຜ່ານມາ, ລັດຖະບານໄດ້ອອກຫລາຍມາດຕະການ ແລະ ໄດ້ເຮັດໃຫ້ຫລາຍໂຄງການຂອງລັດໄດ້ມີປະສິດທິຜົນສູງຂຶ້ນເທື່ອລະກ້າວ; ເປັນຕົ້ນການແຕ່ງຕັ້ງຄະນະສະເພາະກິດ ເພື່ອຊີ້ນໍາການກວດກາໂຄງການລົງທຶນຂອງລັດ ຊຶ່ງໄດ້ແບ່ງຄວາມຮັບຜິດຊອບແມ່ນ ຄະນະສະເພາະກິດຂັ້ນສູນກາງ ຮັບຜິດຊອບລົງກວດກາໂຄງການທີ່ມີມູນຄ່າ 10 ຕື້ກີບຂຶ້ນໄປ, ສ່ວນຂະແໜງການ ແລະ ທ້ອງຖິ່ນ ຮັບຜິດຊອບກວດກາໂຄງການມູນຄ່າ 10 ຕື້ກີບ ລົງມາ ໂດຍໄດ້ຈັດຕັ້ງປະຕິບັດ ແຕ່ເດືອນ 8/2019 – 4/2021. ແຕ່ເນື່ອງຈາກໄດ້ຮັບຜົນກະທົບຈາກການແຜ່ລະບາດຂອງພະຍາດໂຄວິດ-19 ຈຶ່ງເຮັດໃຫ້ມີຄວາມຊັກຊ້າ ແລະ ໄດ້ໂຈະການເຄື່ອນໄຫວຊົ່ວຄາວ.

ອີງຕາມຜົນການຈັດຕັ້ງປະຕິບັດຕົວຈິງ, ຄະນະສະເພາະກິດຂັ້ນສູນກາງ ໄດ້ກວດກາ 1.206 ໂຄງການ ມູນຄ່າ 97.834 ຕື້ກີບ (ກວດກາສໍາເລັດ 760 ໂຄງການ, ເທົ່າກັບ 63% ຂອງແຜນ ການ, ມູນຄ່າ 55.492,2 ຕື້ກີບ), ຜ່ານການກວດກາ ເຫັນວ່າໂຕເລກບໍ່ສອດຄ່ອງກັນຈຳນວນ 1.781 ຕື້ກີບ ແລະ 383 ພັນໂດລາ ຊຶ່ງຈະຕ້ອງໄດ້ເກັບກູ້ຄືນ ແລະ ຫັກລົບອອກຈາກມູນຄ່າໂຄງການ. ນອກນີ້, ຍັງພົບເຫັນໂຄງການທີ່ບໍ່ໄດ້ຮັບຮອງຈຳນວນໜຶ່ງ ແລະ ພົບເຫັນໂຄງການ 121 ໂຄງການ ທີ່ມີມູນຄ່າຕາມສັນຍາສູງກວ່າມູນຄ່າຂອງໂຄງການ ທີ່ໄດ້ຄິດໄລ່ຕາມຫົວໜ່ວຍທີ່ກະຊວງກ່ຽວຂ້ອງໄດ້ກຳນົດ (ໝາຍວ່າ 20% ຂຶ້ນໄປ ເທົ່າກັບ 3.127 ຕື້ກີບ).

ສໍາລັບໂຄງການ 10 ຕື້ກີບ ລົງມາ, ໃນທົ່ວປະເທດມີ 4.336 ໂຄງການ ມູນຄ່າ 11.693 ຕື້ກີບ (ກວດກາສໍາເລັດແລ້ວ 1.244 ໂຄງການ, ເທົ່າກັບ 28,7% ຂອງແຜນການ) ຜ່ານການກວດກາພົບເຫັນໂຕເລກທີ່ບໍ່ສອດຄ່ອງ 26,38 ຕື້ກີບ ແລະ 15.491 ໂດລາ ຊຶ່ງຈະຕ້ອງໄດ້ເກັບກູ້ຄືນ ແລະ ຫັກລົບອອກຈາກມູນຄ່າໂຄງການ; ພົບເຫັນໂຄງການທີ່ບໍ່ທັນໄດ້ຮັບຮອງ (ໂຄງການນອກແຜນ) ມູນຄ່າ 23,91 ຕື້ກີບ ແລະ ພົບເຫັນ 62 ໂຄງການ ມີມູນຄ່າຕາມສັນຍາສູງກວ່າມູນຄ່າໂຄງການຕາມການຄິດໄລ່ລາຄາຂອງກະຊວງກ່ຽວຂ້ອງກໍານົດ 20% ທີ່ຈະຕ້ອງໄດ້ຕໍ່ລອງລົງ ເພື່ອໃຫ້ມູນຄາຫຼຸດລົງຢ່າງສົມເຫດສົມຜົນ.

ທ່ານຮອງນາຍົກກ່າວຕື່ມວ່າ: ໃນການສ້າງແຜນການລົງທຶນຂອງລັດ ປີ 2021, ແມ່ນມີການຫັກລົບ 141 ໂຄງການ ມູນຄ່າ 1.574 ຕື້ກີບ, ແຕ່ຍັງບໍ່ທັນສາມາດຈັດຕັ້ງປະຕິບັດໄດ້ 50 ໂຄງການ ມູນຄ່າ 520,7 ຕື້ກີບ ຍ້ອນຍັງບໍ່ທັນເອກະພາບດ້ານຂໍ້ມູນໂຄງການຕາມຜົນການກວດສອບເທື່ອ ຊຶ່ງກະຊວງແຜນການ ແລະ ການລົງທຶນ ຈະສົມທົບກັບອົງການກວດກາແຫ່ງລັດ ແລະ ເຈົ້າຂອງໂຄງການ ນັບທັງຂັ້ນສູນກາງ ແລະ ທ້ອງຖິ່ນເພື່ອເອກະພາບ ສູ່ການດໍາເນີນຂັ້ນຕອນການຫັກລົບໃນຂັ້ນຕອນໄປ. ສ່ວນໂຄງການອື່ນໆ, ກໍຈະໄດ້ປະສານສົມທົບກັບພາກສ່ວນກ່ຽວຂ້ອງ ແລະ ທ້ອງຖິ່ນ ເປັນເຈົ້າການໃນການກວດກາຂໍ້ມູນຕົວຈິງ ແລະ ຈະໄດ້ປະຕິບັດຕາມຜົນການກວດສອບ, ຫຼັງຈາກນັ້ນກໍຈະສັງລວມ ແລະ ລາຍງານລັດຖະບານ, ອົງການກວດສອບແຫ່ງລັດ ແລະ ອົງການກວດກາແຫ່ງລັດ.

ສ່ວນການແກ້ໄຂໜີ້ສິນໂຄງການລົງທຶນຂອງລັດ, ທ່ານຮອງນາຍົກໄດ້ກ່າວວ່າ: ລັດຖະບານໄດ້ມີຄວາມພະຍາຍາມດ້ວຍຄວາມເອົາໃຈໃສ່ສູງ ເພື່ອແກ້ໄຂໜີ້ສິນໃຫ້ຫຼຸດຜ່ອນລົງຢູ່ໃນລະດັບທີ່ຄວບຄຸມໄດ້ ແລະ ບໍ່ໃຫ້ສົ່ງຜົນກະທົບຕໍ່ການຄຸ້ມຄອງເສດຖະກິດມະຫາພາກ ໂດຍໄດ້ເພີ່ມທະວີການຈັດຕັ້ງປະຕິບັດນະໂຍບາຍ ແລະ ມາດຕະການຕ່າງໆ ເປັນຕົ້ນແມ່ນການແກ້ໄຂໜີ້ສິນດ້ວຍງົບປະມານປົກກະຕິ, ການອວ່າຍໜີ້ສາມແຈ ແລະ ອອກພັນທະບັດ (ງວດ 1 ປີ 2020 ປະຕິບັດໄດ້ 5 ພັນຕື້ກີບ 99,97%, ງວດ 2 ປີ 2021 ປະຕິບັດໄດ້ 82% ແລະ ຈະສືບຕໍ່ໃນ 3 ເດືອນທ້າຍປີນີ້).

ໃນປີ 2021 ນີ້, ໂຄງການລົງທຶນຂອງລັດມີທັງໝົດ 6.669 ໂຄງການ ມູນຄ່າຕາມສັນຍາ 76.527 ຕື້ກີບ (ຄ້າງຈ່າຍຕາມໜ້າທີ່ວຽກທີ່ສຳເລັດຕົວຈິງ 40.880 ຕື້ກີບ ຊຶ່ງໃນນັ້ນໂຄງການຮອດກໍານົດຊໍາລະຊະສາງຕາມສັນຍາມີ 8.656,17 ຕື້ກີບ). ໃນຕໍ່ໜ້າຈະສຸມໃສ່ແກ້ໄຂໜີ້ສິນໂຄງການລົງທຶນຂອງລັດ ຢ່າງເປັນລະບົບ ຕາມງົບປະມານປົກກະຕິ ຊຶ່ງຜ່ານມາໄດ້ແກ້ໄຂໂຄງການມູນຄ່າທີ່ຍັງຄ້າງ 200 ລ້ານກີບລົງມາ ແລະ ແຜນໃນປີ 2022 ແມ່ນຈະສຸມໃສ່ແກ້ໄຂໂຄງການມູນຄ່າທີ່ຍັງຄ້າງ 300 ລ້ານກີບລົງມາ. ພ້ອມທັງຈະປະຕິບັດບັນດານະໂຍບາຍສະເພາະຢ່າງມີຈຸດສຸມ ໂດຍສະເພາະການແກ້ໄຂໜີ້ສິນຄື: 1). ໜີ້ສິນໂຄງການລົງທຶນຂອງລັດທີ່ຕິດພັນກັບການຜະລິດເພື່ອຄໍ້າປະກັນສະບຽງອາຫານ ແລະ ການຜະລິດເປັນສິນຄ້າ; 2). ແມ່ນແກ້ໄຂໜີ້ສິນການລົງທຶນຂອງລັດ ທີ່ຍັງຄ້າງຊໍາລະຕໍ່ຜູ້ປະກອບການລາຍໃຫຍ່; 3). ໜີ້ສິນຕໍ່ຜູ້ປະກອບການທີ່ມີຈຸດປະສົງ ຢາກປະກອບສ່ວນພັນທະໃຫ້ແກ່ລັດໄດ້ຮັບນະໂຍບາຍໃນການແກ້ໄຂໜີ້ສິນ; 4). ແກ້ໄຂໜີ້ມີສ່ວນຫຼຸດ; 5). ຫັນໜີ້ເປັນທຶນ ແລະ 6). ແມ່ນການອອກພັນທະບັດ.