ຄົນທີ່ມີໜີ້ສິນຫລາຍ ຢາກໃຫ້ຄິດແບບນີ້ 4 ວິທີຄິດ ເຖິງຈະມີໜີ້ສິນຫລາຍ, ແຕ່ກໍມີຄວາມສຸກໄດ້
November 11, 2021 - 5:00 PM
- ເຮົາມີຄວາມສາມາດທີ່ຍັງບໍ່ໄດ້ໃຊ້ : ໃນຍາມທີ່ໜີ້ສິນຖ້ວມຫົວ ຫັນໄປທາງໃດກໍບໍ່ມີໃຜຍື່ນມືມາຊ່ວຍ ອາດຍ້ອນໄດ້ຂໍ ຄວາມຊ່ວຍເຫລືອຈາກຜູ້ອື່ນອ້ອມໂຕໝົດແລ້ວ. ພາລະທີ່ມີມັນຫລວງຫລາຍແທ້ ເຮັດວຽກສຸດອິດເມື່ອຍ ເງິນທີ່ໄດ້ມາໃນ ແຕ່ລະເດືອນ ລຳພັງຈະໃຊ້ສອຍກັບເລື່ອງຈຳເປັນເກືອບບໍ່ພໍແລ້ວ ຍັງຕ້ອງດຶງເງິນບາງສ່ວນມາໃຊ້ໜີ້ອີກ ທຸກຢ່າງເບິ່ງ ມືດ 8 ດ້ານໄປໝົດ ຢາກໃຫ້ທ່ານທົບທວນເຖິງຄວາມສາມາດຂອງຕົນເອງວ່າເຮັດຫຍັງໄດ້ແດ່ ອາດເປັນຄວາມມັກ ສ່ວນໂຕ ຫລື ກິດຈະກຳທີ່ມັກ ເຊັ່ນ : ຍາມວ່າງທ່ານມັກປູກຕົ້ນບອນງາມໆໄວ້ຢູ່ເຮືອນ ອາດລອງເພາະພັນເບ້ຍຕົ້ນບອນ ງາມເພີ່ມຕື່ມໃຫ້ມີຈຳນວນຫລາຍຂຶ້ນ ແລະ ເອົາໄປຂາຍໃນອິນເຕີເນັດ ຫລື ຂາດຕະຫລາດນັດໃນມື້ພັກ. ວິທີນີ້ອາດເຮັດ ໃຫ້ທ່ານມີລາຍຮັບເພີ່ມຂຶ້ນຈາກເກົ່າຈົນພັດທະນາເປັນອີກອາຊີບຫລັກໄດ້ໃນທີ່ສຸດ.
- ປ່ອຍວາງແລ້ວຕັ້ງໃຈກັບເປົ້າໝາຍ : ເມື່ອທ່ານຄິດທົບທວນຈົນສາມາດຍອມຮັບກັບບັນຫາໄດ້ແລ້ວ ຄົງຈະຜ່ອນຄາຍ ຄວາມທຸກລົງໄດ້ແດ່ບໍ່ຫລາຍກໍໜ້ອຍ ຫລັງຈາກນັ້ນຂໍໃຫ້ທ່ານປ່ອຍວາງບັນຫາລົງ ເຮົາບໍ່ຈຳເປັນຕ້ອງແບກພາລະທຸກ ຢ່າງໄວ້ເທິງບ່າຕະຫລອດເວລາ ບໍ່ດັ່ງນັ້ນຈະເອົາກຳລັງເຫື່ອແຮງໃສກ້າວຍ່າງຕໍ່ໄປຂ້າງໜ້າໄດ້ ຈາກນີ້ຂໍພຽງຕັ້ງໃຈທີ່ ຈະປົດໜີ້ສິນແລ້ວໃຊ້ຊີວິດຢ່າງເຂັ້ມແຂງ ຈົ່ງມອບຄວາມເຊື່ອໝັ້ນໃຫ້ແກ່ຕົນເອງຢ່າງເຕັມທີ່ ໃຫ້ກຳລັງໃຈຕົນເອງວ່າໂຕ ເຮົາຍັງເຮັດຫຍັງໄດ້ອີກຫລວງຫລາຍ ຂໍພຽງບໍ່ກຽດຄ້ານ ແລະ ມີວິໄນໃນການໃຊ້ເງິນ ກໍຈະເຮັດໃຫ້ເຮົາສາມາດບໍລິ ຫານລາຍຮັບ – ລາຍຈ່າຍໄດ້ຢ່າງດຸ່ນດ່ຽງ ແລະ ເຫລືອເງິນໄປຜ່ອນຊຳລະໜີ້. ຫາກທ່ານຍຶດເອົາສະຕິປັນຍາເປັນທີ່ຕັ້ງ ແລ້ວເຊື່ອວ່າຕ້ອງເອົາໂຕລອດໃຫ້ຜ່ານພົ້ນວິກິດຊີວິດຄັ້ງນີ້ໄດ້ຢ່າງແນ່ນອນ.
- ຕ້ອງກ້າທີ່ຈະຍອມຮັບຄວາມຈິງ : ເໜືອສິ່ງອື່ນໃດເມື່ອຊີວິດເກີດບັນຫາ ເຮົາຕ້ອງຕັ້ງສະຕິໃຫ້ໄດ້ສາກ່ອນ ບໍ່ຄິດໂທດຕົນ ເອງຈົນເກີນເຫດ ເພາະການຈົມຢູ່ກັບບັນຫາດ້ວຍຄວາມຄິດເກົ່າໆ ນອກຈາກເຮົາຈະເບິ່ງບໍ່ເຫັນທາງອອກແລ້ວ ຍັງຈະ ເຮັດໃຫ້ຈິດໃຈຫົດຫູ່ ເສົ້າໝອງ ຈິດຕົກ ຈົນບໍ່ເປັນອັນເຮັດຫຍັງທັງໝົດ. ການພະເຊີນໜ້າຍອມຮັບຄວາມຈິງທີ່ເກີດຂຶ້ນ ແມ່ນສິ່ງທີ່ດີທີ່ສຸດ ເພາະເຮົາຈະເຮັດໄດ້ ເພາະຫາກບໍ່ຍອມຮັບເຖິງການກະທຳຂອງຕົນເອງໃຫ້ໄດ້ສາກ່ອນ ກໍເປັນເລື່ອງ ຍາກທີ່ເຮົາຈະຜ່ານພົ້ນວິກິດບັນຫານັ້ນໄປໄດ້. ການມີຊີວິດຢູ່ກັບປັດຈຸບັນ ຮູ້ວ່າເຮົາເຮັດຫຍັງຢູ່ ແລະ ຈະຕ້ອງເຮັດຫຍັງ ຕໍ່ໄປໃນອະນາຄົດ ແມ່ນຈຸດເລີ່ມຕົ້ນຂອງທາງອອກແຫ່ງບັນຫາ. ເມື່ອມີສະຕິແລ້ວ ການຫາທາງແກ້ໄຂຄົງບໍ່ແມ່ນເລື່ອງ ທີ່ຍາກຈົນເກີນໄປ ຂໍພຽງທ່ານມີກຳລັງໃຈທີ່ດີ ມີພູມຕ້ານທານ ແລະ ໃຊ້ສະຕິນຳທາງຢູ່ສະເໝີ.
- ທົບທວນເຖິງເຫດຜົນຂອງການເປັນໜີ້ : ເມື່ອເຮົາຍອມຮັບຄວາມຈິງໄດ້ແລ້ວວ່າມີໜີ້ສິນຫລາຍໜ້ອຍປານໃດ ຈາກນັ້ນ ຈຶ່ງຄິດທົບທວນເຖິງຕົ້ນເຫດແຫ່ງການເປັນໜີ້ວ່າເປັນຫຍັງເຮົາຈຶ່ງມີໜີ້ສິນກ້ອນນີ້ຂຶ້ນມາ ອາດເປັນການກູ້ຢືມຊື້ເຮືອນ ຫລັງໃຫຍ່ເພື່ອສ້າງຄອບຄົວ, ຊື້ລົດເພື່ອໃຊ້ໃນຄອບຄົວ ຫລື ການຊື້ອະສັງຫາລິມະຊັບເພື່ອການລົງທຶນ ເຫລົ່ານີ້ລ້ວນ ເປັນໜີ້ສິນທີ່ຖືເປັນການສ້າງຊັບສິນໃຫ້ກັບຊີວິດ ເຖິງວ່າຈະຕ້ອງແບກຮັບພາລະກ້ອນໃຫຍ່ ແລະ ໃຊ້ເວລາຫລາຍສິບປີ ກ່ວາຈະຜ່ອນຊຳລະໝົດໄດ້, ແຕ່ຖືວ່າເປັນການລົງທຶນທີ່ກຸ້ມຄ່າ ເພາະໃນອະນາຄົດສິ່ງເຫລົ່ານີ້ຈະກາຍເປັນສົມບັດຂອງ ເຮົາ ແລະ ສາມາດເປັນມໍລະດົກຕົກທອດໄປຍັງລູກຫລານໄດ້ນຳອີກ. ຫາກທ່ານມີໜີ້ໃນລັກສະນະນີ້ຂໍໃຫ້ທ່ານເຮັດໃຈ ໃຫ້ສະບາຍ ແລະ ປັບທັດສະນະຄະຕິໃໝ່ ຈົ່ງເຫັນຄຸນຄ່າໃນຕົນເອງໃຫ້ຫລາຍຂຶ້ນ ຢ່ານຶກເສຍໃຈໃນການຕັດສິນໃຈຊື້ ເພາະມັນແມ່ນໜີ້ສິນທີ່ທ່ານໄດ້ຄິດພິຈາລະນາມາແລ້ວເປັນຢ່າງດີ.
