ນາຍົກເນັ້ນໃຫ້ ຍທຂ ເຜີຍແຜ່ຄວາມສໍາຄັນໂຄງການທາງລົດໄຟລາວ-ຈີນໃຫ້ສັງຄົມຮັບຮູ້ກວ້າງຂວາງ

- advert banner 728 90 728x90 - ນາຍົກເນັ້ນໃຫ້ ຍທຂ ເຜີຍແຜ່ຄວາມສໍາຄັນໂຄງການທາງລົດໄຟລາວ-ຈີນໃຫ້ສັງຄົມຮັບຮູ້ກວ້າງຂວາງ

ນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນໃຫ້ກະຊວງໂຍທາທິການ ແລະ ຂົນສົ່ງ ເພີ່ມທະວີວຽກງານໂຄສະນາເຜີຍແຜ່ກ່ຽວກັບຄວາມໝາຍສໍາຄັນຂອງໂຄງການກໍ່ສ້າງເສັ້ນທາງລົດໄຟລາວ-ຈີນໃຫ້ສັງຄົມຮັບຮູ້ຢ່າງກວ້າງຂວາງ, ເນື່ອງຈາກເປັນໂຄງການພັດທະນາຂະໜາດໃຫຍ່ທີ່ຈະນໍາຜົນປະໂຫຍດຢ່າງຫລວງຫລາຍມາສູ່ປະເທດຊາດ.

- lattana 1 - ນາຍົກເນັ້ນໃຫ້ ຍທຂ ເຜີຍແຜ່ຄວາມສໍາຄັນໂຄງການທາງລົດໄຟລາວ-ຈີນໃຫ້ສັງຄົມຮັບຮູ້ກວ້າງຂວາງ

ການເນັ້ນຕໍ່ບັນຫາດັ່ງກ່າວຂອງທ່ານນາຍົກລັດຖະມົນຕີ, ໄດ້ມີຂຶ້ນໃນກອງປະຊຸມລັດຖະບານປະຈໍາເດືອນກໍລະກົດ, ພາຍຫລັງກະຊວງໂຍທາທິການ ແລະ ຂົນສົ່ງ ໄດ້ລາຍງານຄວາມຄືບໜ້າຂອງການຈັດຕັ້ງປະຕິບັດໂຄງການດັ່ງກ່າວວ່າ: ເສັ້ນທາງລົດໄຟສາຍນີ້ມີຄວາມຍາວທັງໝົດ 417 ກິໂລແມັດ, ຜ່ານ 5 ແຂວງຄື: ແຂວງຫລວງນໍ້າທາ, ອຸດົມໄຊ, ຫລວງພະບາງ, ແຂວງວຽງຈັນ ແລະ ນະຄອນຫລວງວຽງຈັນ, ປະກອບມີ 32 ສະຖານີ, ໃນນັ້ນຈະມີການກໍ່ສ້າງຂົວໃໝ່ 167 ແຫ່ງ ແລະ ເຈາະອຸໂມງ 75 ແຫ່ງເທົ່າກັບ 62% ຂອງໂຄງການ, ເສັ້ນທາງລົດໄຟຜ່ານເຂດພູດອຍກວມເອົາ 80%. ໂດຍໄດ້ເລີ່ມລົງມືກໍ່ສ້າງມາແຕ່ທ້າຍປີ 2016 ແລະ ຄາດວ່າຈະໃຫ້ສໍາເລັດ ແລະ ເປີດໃຊ້ບໍລິການໃນປີ 2022. ຕໍ່ບົດລາຍງານດັ່ງກ່າວທ່ານນາຍົກລັດຖະມົນຕີໄດ້ສະແດງຄວາມຊົມເຊີຍຕໍ່ພາກສ່ວນກ່ຽວຂ້ອງທີ່ໄດ້ເອົາໃຈໃສ່ຊີ້ນໍາຕິດຕາມການກໍ່ສ້າງຢ່າງໃກ້ຊິດ ແລະ ເຮັດໃຫ້ການກໍ່ສ້າງມີຄວາມຄືບໜ້າໄປຕາມແຜນການວາງໄວ້. ໂຄງການດັ່ງກ່າວເປັນໂຄງການພັດທະນາໂຄງລ່າງຄົມມະນາຄົມຂະໜາດໃຫຍ່ທັນສະໄໝທີ່ເປັນການຮ່ວມມືລະຫວ່າງສອງປະເທດລາວ-ຈີນ ແລະ ເປັນເສັ້ນທາງລົດໄຟທີ່ຈະເຊື່ອມໂຍງກັບພາກພື້ນ ແລະ ສາກົນໃນອານາຄົດ, ຊຶ່ງຈະນໍາເອົາຜົນປະໂຫຍດອັນໃຫຍ່ຫລວງມາສູ່ປະເທດເຮົາ ແລະ ພາກພື້ນ ໂດຍສະເພາະການຄ້າ, ການລົງທຶນ, ການຂົນສົ່ງສີນຄ້າ, ການທ່ອງທ່ຽວ, ການໄປມາຫາສູ່ຂອງປະຊາຊົນສອງປະເທດລາວ-ຈີນ ກໍຄືພາກພື້ນອາຊຽນນັບມື້ຫລາຍຂຶ້ນ. ສະນັ້ນຂໍໃຫ້ຂະແໜງການກ່ຽວຂ້ອງເອົາໃຈໃສ່ຄຸ້ມຄອງຢ່າງເປັນເຈົ້າການ, ພ້ອມທັງໂຄສະນາເຜີຍແຜ່ຄວາມຄືບໜ້າການກໍ່ສ້າງໂຄງການດັ່ງກ່າວໃຫ້ສັງຄົມຮັບຮູ້ເປັນແຕ່ລະໄລຍະ ເພື່ອເຫັນໄດ້ຄວາມສໍາຄັນຂອງການພັດທະນາ ແລະ ມີສ່ວນຮ່ວມໃນການກໍ່ສ້າງເສັ້ນທາງລົດໄຟດັ່ງກ່າວທີ່ຈະນໍາພາປະຊາຊົນບັນດາເຜົ່າຫລຸດພົ້ນອອກຈາກຄວາມທຸກຍາກ ແລະ ນໍາພາປະເທດຊາດຫລຸດພົ້ນອອກຈາກຄວາມດ້ອຍພັດທະນາຕາມເປົ້າໝາຍທີ່ພັກ ແລະ ລັດຖະບານວາງໄວ້. ຄຽງຄູ່ກັນນັ້ນກໍໃຫ້ເອົາໃຈໃສ່ຄຸ້ມຄອງກວດກາການນໍາເຂົ້າວັດສະດຸ, ອຸປະກອນ, ພາຫະນະ, ນໍ້າມັນເຊື້ອໄຟໃຫ້ຖືກຕ້ອງຕາມລະບຽບກົດໝາຍ ລວມທັງເອົາໃຈໃສ່ການກໍ່ສ້າງຊັບພະຍາກອນມະນຸດເພື່ອຮອງຮັບໂຄງການດັ່ງກ່າວໃຫ້ມີຄຸນະພາບ ແລະ ພຽງພໍ.

- Tiger Head 728x90 - ນາຍົກເນັ້ນໃຫ້ ຍທຂ ເຜີຍແຜ່ຄວາມສໍາຄັນໂຄງການທາງລົດໄຟລາວ-ຈີນໃຫ້ສັງຄົມຮັບຮູ້ກວ້າງຂວາງ
- 1 1 - ນາຍົກເນັ້ນໃຫ້ ຍທຂ ເຜີຍແຜ່ຄວາມສໍາຄັນໂຄງການທາງລົດໄຟລາວ-ຈີນໃຫ້ສັງຄົມຮັບຮູ້ກວ້າງຂວາງ
error: Content is protected !!