ກະ​ຊວງ​ພາຍ​ໃນ ສະເໜີຮ່າງກົດໝາຍວ່າດ້ວຍການສຳຫລວດວັດແທກ ແລະ ສ້າງແຜນທີ່ ໃຫ້ສະພາແຫ່ງຊາດພິຈາລະນາຮັບຮອງ

ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ສະເໜີຮ່າງກົດໝາຍສ້າງໃໝ່ວ່າດ້ວຍ ການສຳຫລວດວັດແທກ ແລະ ສ້າງແຜນທີ່ ເຊິ່ງປະກອບດ້ວຍ 10 ພາກ, 16 ໝວດ ແລະ 92 ມາດຕາ. ຈຸດປະສົງ ຮ່າງກົດໝາຍສະບັບນີ້ ເພື່ອແນໃສ່ໃຫ້ມີຂໍ້ມູນໃໝ່ ຮັບໃຊ້ແກ່ການວາງແຜນ ພັດທະນາເສດຖະກິດ-ສັງຄົມຂອງຊາດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການຄຸ້ມຄອງ ແລະ ຕິດຕາມກວດກາ ຊັບພະຍາກອນທຳມະຊາດ ແລະ ສິ່ງແວດລ້ອມ.  ໃນວາລະການດຳເນີນກອງປະຊຸມສະໄໝສາ ມັນເທື່ອທີ 2 ຂອງສະພາແຫ່ງຊາດຊຸດທີ IX ໃນຕອນເຊົ້າວັນທີ 11 ພະຈິກ 2021.

ທ່ານລັດຖະມົນຕີກະຊວງພາຍໃນ ກ່າວວ່າ: ເຫດຜົນ ແລະ ຄວາມຈໍາເປັນຂອງການສ້າງຮ່າງກົດໝາຍສະບັບນີ້ ເນື່ອງຈາກວ່າ ຂໍ້ມູນສໍາຫລວດວັດແທກ, ພາບຖ່າຍ, ແຜນທີ່ ແລະ ຂໍ້ມູນຂ່າວສານພູມສາດ ມີຄວາມສໍາຄັນ ແລະ ຈໍາເປັນ ສຳລັບທຸກໆປະເທດ ບໍ່ວ່າປະເທດ ທີ່ມີເສດຖະກິດຂະຫຍາຍຕົວສູງ, ກໍາລັງຂະຫຍາຍຕົວ ແລະ ປະເທດດ້ອຍພັດທະນາກໍຕາມ. ຂໍ້ມູນດັ່ງກ່າວແມ່ນມີຄວາມຈຳເປັນ ແລະ ສໍາຄັນ ເພາະວ່າ ເປັນຂໍ້ມູນພື້ນຖານ ເພື່ອນໍາໃຊ້ເຂົ້າໃນ ການວາງແຜນພັດທະນາເສດຖະກິດ-ສັງຄົມ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການສຶກສາຄົ້ນຄ້ວາວິທະຍາສາດ, ການຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ. ພ້ອມກັນນີ້, ຂໍ້ມູນສໍາຫລວດວັດແທກ, ພາບຖ່າຍທາງອາກາດ ແລະ ແຜນທີ່ ຍັງເປັນເອກະສານຫລັກຖານທີ່ສໍາຄັນ ທາງດ້ານກົດໝາຍ ໃນການເຈລະຈາຕໍ່ລອງ ກໍານົດເສັ້ນ ແລະ ປັກຫລັກໝາຍຊາຍ ແດນແຫ່ງຊາດ ກັບບັນດາປະເທດອ້ອມຂ້າງ. ນອກຈາກນີ້, ຂໍ້ມູນແຜນທີ່ ຍັງເປັນເອກະສານໜຶ່ງ ທີ່ສໍາຄັນສໍາລັບການສຶກສາຄົ້ນຄວ້າ ກ່ຽວກັບຮູບຮ່າງຂອງໜ່ວຍໂລກ, ລະບົບຈັກກະວານ, ພື້ນທີ່ ແລະ ຂອບເຂດ ການປົກຄອງຂອງລັດ.

ສະນັ້ນ, ເພື່ອຈັດຕັ້ງປະຕິບັດວຽກງານດັ່ງກ່າວ ໃຫ້ລວມສູນເປັນເອກະພາບ ໃນຂອບເຂດທົ່ວປະເທດ ຈິ່ງໄດ້ສຶກສາຄົ້ນຄວ້າວາງນະໂຍບາຍ, ລະບຽບກົດໝາຍ, ຂໍ້ກໍານົດ, ມາດຕະຖານເຕັກນິກອອກ ເພື່ອການຄຸ້ມຄອງ, ຕິດ ຕາມກວດກາ, ຊຸກຍູ້ສົ່ງເສີມ ຈັດຕັ້ງປະຕິບັດວຽກງານດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນສູງ. ເຊິ່ງ ໃນໄລຍະຜ່ານມາ ລັດຖະບານ ໄດ້ປະກາດໃຊ້ນິຕິກໍາຈໍານວນໜຶ່ງ ເພື່ອເປັນບ່ອນອີງເຮັດໜ້າທີ່ຄຸ້ມຄອງລັດ ໃນການຈັດຕັ້ງປະຕິບັດວຽກງານດັ່ງກ່າວ ເປັນຕົ້ນ ໄດ້ມີການປະກາດໃຊ້ດຳລັດ ສະບັບເລກທີ 73/ນຍ ລົງວັນທີ 20 ກັນຍາ 1995 ວ່າດ້ວຍວຽກງານສໍາຫລວດວັດແທກ, ຖ່າຍພາບທາງອາກາດ ແລະ ສ້າງແຜນທີ່ ໃນດິນແດນ ສປປ ລາວ, ຕໍ່ມາໄດ້ມີການປັບປຸງມາເປັນດຳລັດ ສະບັບເລກທີ 225/ນຍ ລົງວັນທີ 16 ສິງຫາ 2005 ແລະ ດໍາລັດ ສະບັບເລກທີ 330/ນຍ, ລົງວັນທີ 18 ກັນຍາ 2014 ວ່າດ້ວຍການສໍາຫລວດວັດແທກ, ຖ່າຍພາບທາງອາກາດ ແລະ ສ້າງແຜນທີ່. ເຖິງແມ່ນວ່າດໍາລັດດັ່ງກ່າວ ມີການປັບປຸງມາແລ້ວ 2 ຄັ້ງກໍຕາມ ເຫັນວ່າ ຍັງບໍ່ຄົບຖ້ວນສົມບູນ ແລະ ຮັດກຸມ ປະສິດທິພາບບໍ່ສູງ ແລະ ພຽງພໍ ທີ່ຈະເປັນເຄື່ອງມື ໃນການຄຸ້ມຄອງລັດ ຕໍ່ວຽກງານສໍາຫລວດວັດແທກ ແລະ ສ້າງແຜນທີ່ ຖ້າທຽບໃສ່ການພັດທະນາ ແລະ ການຂະຫຍາຍຕົວ ທາງດ້ານວິທະຍາສາດ-ເຕັກໂນໂລຊີ ແລະ ການສື່ສານ ໃນດິນແດນ ສປປ ລາວ ເພື່ອເຊື່ອມໂຍງກັບພາກພື້ນ ແລະ ສາກົນ ໂດຍສະເພາະ ຂະແໜງການສໍາຫລວດວັດແທກ ແມ່ນໜຶ່ງໃນ 7 ຂະແໜງການຍ່ອຍທີ່ເປັນບູລິມະສິດ ນອນໃນຂະແໜງການບໍລິການ ຂອງເສົາຄໍ້າເສດຖະກິດຂອງອາຊຽນ.

ດັ່ງນັ້ນ, ຈິ່ງໄດ້ຮຽກຮ້ອງໃຫ້ມີກົດໝາຍ ເພື່ອອໍານວຍຄວາມສະດວກ, ຕິດຕາມ ກວດກາ ແລະ ຄຸ້ມຄອງວຽກ ງານດັ່ງກ່າວໃນອະນາຄົດ. ຕໍ່ບັນຫາ ແລະ ສິ່ງທ້າທາຍນັ້ນ ກະຊວງພາຍໃນ ຈິ່ງເຫັນໄດ້ຄວາມຈຳເປັນ ຈະຕ້ອງໄດ້ຄົ້ນຄວ້າສ້າງຮ່າງກົດໝາຍ ວ່າດ້ວຍການສໍາຫລວດວັດແທກ ແລະ ສ້າງແຜນທີ່ ໃຫ້ມີເນື້ອໃນຮັດກຸມ, ຄົບຖ້ວນ ແລະ ສາມາດຈັດຕັ້ງປະຕິບັດໄດ້ ແຕ່ສູນກາງຈົນຮອດທ້ອງຖິ່ນ ເພື່ອນຳສະເໜີ ຕໍ່ລັດຖະບານ ແລະ ສະພາແຫ່ງຊາດພິຈາລະນາຮັບຮອງ.