10 ອາຫານແກ້ໄຂ້ຫວັດສຳລັບເດັກ

ສະພາບອາດໃນຍາມຝົນຫາຍາມໜາວ ເຮັດໃຫ້ຫລາຍຄົນມີອາການໄອ, ຈາມ ເກີດຈາກການເປັນໄຂ້ຫວັດ ອາກາດທີ່ຊຸ່ມ ຈຶ່ງງ່າຍຕໍ່ການເຈັບປ່ວຍເປັນໄຂ້ຫວັດ ແລະ ເຈັບຄໍ ໂດຍສະເພາະຢ່າງຍິ່ງສຳລັບເດັກນ້ອຍທີ່ເປັນໄຂ້ຫວັດງ່າຍຫລາຍ. ມື້ນີ້ພວກເຮົາຂໍສະເໜີ 10 ລາຍການອາຫານແກ້ໄຂ້ຫວັດສຳລັບເດັກ ທີ່ກິນແລ້ວອາການໄຂ້ຫວັດຈະຄ່ອຍໆດີຂຶ້ນຈົນເຊົາ ເປັນປົກກະຕິໃນທີ່ສຸດມາແນະນຳ ດັ່ງນີ້ :

1. ໝາກກ້ຽງ ແລະ ໝາກໄມ້ໃນຕະກູນຊິຕຣັສ : ໝາກກ້ຽງເປັນໝາກໄມ້ທີ່ມີລົດຊາດສົ້ໝ ນອກຈາກຈະເປັນແຫ່ລງຂອງ ວິຕາມິນ C ທີ່ດີແລ້ວ ໝາກກ້ຽງ ແລະ ໝາກໄມ້ຕະກູນຊິຕຣັສ ຍັງປະກອບໄປດ້ວຍສານຕ້ານອະນຸມູນອິດສະລະ ທີ່ຊ່ວຍໃນການສ້າງລະບົບພູມຕ້ານທານທີ່ແຂງແຮງ ເຮັດໃຫ້ຮ່າງກາຍແຂງແຮງ ແລະ ເປັນໄຂ້ຫວັດໄດ້ຍາກຂຶ້ນ ສາມາດເອົາມາໃສ່ໃນເຂົ້າໜົມຫວານ ຫລື ໃສ່ໃນຍຳສະຫລັດ – ຍຳໝາກໄມ້ລວມກໍແຊບ ຊ່ວຍເພີ່ມລົດຊາດ ຫລື ຈະຄັ້ນ ເອົານ້ຳໝາກກ້ຽງສົດໆກໍໄດ້. ສ່ວນໝາກນາວກໍຍັງຊ່ວຍຫລຸດຜ່ອນອາການເຈັບຄໍໄດ້ດີ ສາມາດເອົາໄປຊົງໃນນ້ຳອຸ່ນ ດື່ມເພື່ອໃຫ້ຊຸ່ມຊື່ນຄໍໄດ້ນຳອີກ.
2. ຜັກໃບຂຽວ : ເປັນຕົ້ນແມ່ນຜັກສະຫລັດ, ຜົກຫົມ, ໝາກກາດນາ, ຜັກກະລ່ຳດອກ, ຜັກບົ້ງ ແລະອື່ນໆ ມີສານອາຫານທີ່ ຈຳເປັນຕໍ່ຮ່າງກາຍເດັກ ເພາະມັນສາມາດສ້າງພູມຕ້ານທານທີ່ແຂງແຮງ ລວມທັງຍັງອຸດົມໄປດ້ວຍວິຕາມິນ A, K ແລະ C ຈະເອົາມາປະສົມລົງໃນນ້ຳປັ່ນຜັກ-ໝາກໄມ້, ຂົ້ວຜັກລວມມິດ, ຜັກຫົມອົບຊີສ, ແກງ, ເຮັດເປັນຍຳສະຫລັດ ຫລື ກິນຜັກສົດເປັນຜັກກັບກໍໃຫ້ຄຸນປະໂຫຍດທັງໝົດ.
3. ຜັກທຽມ : ຖືກເອົາມາໃຊ້ເປັນຢາປິ່ນປົວພະຍາດໄດ້ຫລາກຫລາຍ ເພາະຜັກທຽມຊ່ວຍກະຕຸ້ນການເຮັດວຽກຂອງລະບົບ ພູມຕ້ານທານ ແລະ ສາມາດເຮັດໃຫ້ອາການໄຂ້ຫວັດຫລຸດຜ່ອນລົງ, ໃສ່ຜັກທຽມລົງໃນຂົ້ວ, ແກງ, ຕົ້ມເປັນນ້ຳຊຸບ ຫລື ໃສ່ເຝີໃຫ້ເດັກກິນ ຫລື ຈະເສີບຮ່ວມກັບຈືນມັນຝຣັ່ງກໍແຊບໄປອີກແບບ.
4. ໄຂ່ໄກ່ : ຖືເປັນອາຫານທີ່ດີ ແລະ ກິນງ່າຍທີ່ສຸດ ເພາະອາຫານຫລາຍລາຍການມັກຈະມີໄຂ່ເປັນວັດຖຸດິບ ລວມໄປເຖິງ ເຂົ້າໜົມ. ໄຂ່ມີສານຊີລີນຽມຊ່ວຍສ້າງລະບົບພູມຕ້ານທານທີ່ແຂງແຮງ ແລະ ຍັງເຮັດໃຫ້ຕ່ອມໄທຣອຍເຮັດວຽກໄດ້ດີ. ໄຂ່ຍັງອຸດົມໄປດ້ວຍກົດອະມິໂນ ແລະ ໂປຣຕິນຫລາຍ ຈຶ່ງບໍ່ແປກທີ່ໄຂ່ຈະຊ່ວຍໃຫ້ຮ່າງກາຍແຂງແຮງ ເປັນວັກຊີ້ນທີ່ດີ ໃນການປ້ອງກັນໄຂ້ຫວັດ ລວມໄປເຖິງໄຂ້ຫວັດໃຫຍ່.
5. ຂີງ : ເປັນທີ່ຮູ້ກັນວ່າຄົງບໍ່ຄ່ອຍຖືກໃຈກັບກິ່ນຂອງຂີງພໍປານໃດ, ແຕ່ສັບພະຄຸນຂອງຂີງນັ້ນດີຫລາຍ ເພາະເປັນພືດ ສະໝຸນໄພທີ່ແພດຈີນຕັ້ງແຕ່ສະໄໝບູຮານໃຊ້ປິ່ນປົວໄຂ້ຫວັດ. ຂີງສາມາດແກ້ໄຂ້ຫວັດໄດ້ດີ ທັງຍັງຊ່ວຍໄລ່ເຫື່ອ, ແກ້ອາການປຸ້ນທ້ອງປວດຮາກ ຫາກລູກຂອງທ່ານມີອາການນ້ຳມູກໄຫລ, ໄອ, ຈາມ ພໍ່ແມ່ສາມາດຕົ້ມນ້ຳຂີງໃຫ້ດື່ມໄດ້ ແຕ່ຫາກລູກຂອງທ່ານບໍ່ມັກລົດຊາດຂອງຂີງແທ້ໆໃຫ້ຕື່ມນ້ຳເຜິ້ງໃສ່ ຈະເຮັດໃຫ້ດື່ມໄດ້ງ່າຍຂຶ້ນ.
6. ນ້ຳເຜິ້ງ : ເປັນສານໃຫ້ຄວາມຫວານທຳມະຊາດ ທີ່ທັງຫອມ, ຫວານ, ແຊບ ແລະ ມີສັບພະຄຸນເປັນຢາ ເພາະນ້ຳເຜິ້ງຊ່ວຍຕ້ານໄວຣັສ ເຊິ່ງເຮັດໃຫ້ສາມາດແກ້ອາການໄຂ້ຫວັດ ແລະ ອາການໄອ ໂດຍສະເພາະເດັກທີ່ໄອ ແລະ ຈາມຊ້ຳເຮື້ອ ນ້ຳເຜິ້ງຈະຊ່ວຍໃຫ້ການໄອ-ຈາມຫລຸດລົງຢ່າງເຫັນໄດ້ແຈ້ງ, ແຕ່ຫາກໄວຣັສລົງຄໍແລ້ວ ເລີ່ມມີອາການເຈັບຄໍ ການດື່ມນ້ຳເຜິ້ງອຸ່ນໆບີບໝາກນາວໃສ່ໜ້ອຍໜຶ່ງ ກໍຊ່ວຍໃຫ້ຊຸ່ມຊື່ນຄໍ ແລະ ຫລຸດຜ່ອນອາການເຈັບຄໍໄດ້ດີ.
7. ຊາຄາໂມມາຍ : ມີສານເອພີຈີນີນ ຊ່ວຍຫລຸດນ້ຳມູກ ແລະ ໄລ່ຂີ້ກະເທີ່ ເມື່ອດື່ມຊາຄາໂມມາຍ ລູກຂອງທ່ານຈະຮູ້ສຶກ ສະບາຍຄໍ, ຊຸ່ມຊື່ນຄໍ ແລະ ໂລ່ງຮູດັງທັນທີທີ່ໄດ້ດື່ມ. ນອກຈາກນັ້ນແລ້ວ ການດື່ມຊາຄາໂມມາຍຍັງຊ່ວຍໃຫ້ນອນຫລັບ ໄດ້ສະບາຍຂຶ້ນ ເໝາະສົມກັບເດັກທີ່ນອນຫລັບຍາກ ເພາະໃນດອກຄາໂມມາຍມີສານຊະນິດໜຶ່ງ ທີ່ຊ່ວຍຫລຸດຄວາມກັງວົນ ເຮັດໃຫ້ຮູ້ສຶກຜ່ອນຄາຍ.
8. ຊີ້ນງົວ : ອຸດົມໄປດ້ວຍກລູຕາມີນ ເຊິ່ງເປັນກົດອະມິໂນທີ່ເຮັດໃຫ້ຮ່າງກາຍສາມາດຕໍ່ສູ້ກັບການຕິດເຊື້ອພະຍາດໄດ້ໄວ ໂດຍທ່ານສາມາດທອດຊີ້ນງົວ ຫລື ເຮັດເປັນລູກຊີ້ນ ຈ້ຳນ້ຳຊ໊ອດໝາກເລັ່ນ ກໍໄດ້ແຮ່ທາດການຊຽມ, ຟົສຟໍ, ທາດເຫລັກ ແລະ ວິຕາມິນຫລາກຫລາຍ ໂດຍສະເພາະວິຕາມິນ C, ວິຕາມິນ K ແລະ ວິຕາມິນA.
9. ໝາກເຊີຣີ : ມີວິຕາມິນ C ຫລາຍກ່ວາໝາກໄມ້ຕະກູນຊິຕຣັສ ເນື່ອງຈາກສາມາດປ້ອງກັນເມັດເລືອດຂາວ ບໍ່ໃຫ້ຖືກທຳລາຍ ຈຶ່ງເປັນເລື່ອງບໍ່ແປກທີ່ເມື່ອກິນເຂົ້າໄປ ຮ່າງກາຍຈະສ້າງພູມຕ້ານທານທີ່ດີ ປົກປ້ອງຈາກເຊື້ອໄວຣັສ ທີ່ເຮັດໃຫ້ເກີດອາການຫວັດ, ໄອ-ຈາມ ແລະ ເຈັບຄໍ ທັງຍັງຊ່ວຍຫລຸດອາການທີ່ເກີດຈາກຜົນຂ້າງຄຽງຂອງການເປັນ ພະຍາດພູມແພ້ໄດ້ນຳ.
10. ໂຢເກິດ : ມີລາຍງານວິໄຈວ່າໂຢເກິດຊ່ວຍສ້າງເມັດເລືອດຂາວ ແລະ ເພີ່ມສານແອນຕິບໍດີ ຈຶ່ງຊ່ວຍໃຫ້ອາການຂອງ ໄຂ້ຫວັດ ແລະ ພູມແພ້ຫລຸດຜ່ອນລົງ. ດັ່ງນັ້ນ, ການໃຫ້ລູກກິນໂຢເກິດເປັນປະຈຳຈຶ່ງດີຕໍ່ສຸຂະພາບຂອງລູກທີ່ສຸດ.