ອາເມລິກາຖືກຈັດໃນ ກຸ່ມປະເທດ ‘ປະຊາທິປະໄຕຫລຸດຖອຍ’ ເປັນຄັ້ງທຳອິດ

-              1 - ອາເມລິກາຖືກຈັດໃນ ກຸ່ມປະເທດ ‘ປະຊາທິປະໄຕຫລຸດຖອຍ’ ເປັນຄັ້ງທຳອິດ
- AGL banner - ອາເມລິກາຖືກຈັດໃນ ກຸ່ມປະເທດ ‘ປະຊາທິປະໄຕຫລຸດຖອຍ’ ເປັນຄັ້ງທຳອິດ

ອາເມລິກາຖືກຈັດຢູ່ໃນກຸ່ມປະເທດປະຊາທິປະໄຕຫລຸດຖອຍເປັນຄັ້ງທຳອິດ ຜ່ານລາຍງານໂດຍສະຖາບັນເພື່ອປະຊາທິປະໄຕ ແລະ ການເຂົ້າເຖິງການເລືອກຕັ້ງ. ໃນລາຍງານລະບຸວ່າ: ປະຊາທິປະໄຕໃນອາເມລິກາເລີ່ມຫລຸດຖອຍນັບແຕ່ປີ 2020 ເປັນຕົ້ນມາ.

ວັນທີ 23 ພະຈິກ 2021, ສຳນັກຂ່າວ Al Jazeera ລາຍງານວ່າ: ລາຍງານປະຈຳປີສະບັບຫລ້າສຸດຂອງສະຖາບັນເພື່ອປະຊາທິປະໄຕ ແລະ ການເຂົ້າເຖິງການເລືອກຕັ້ງ (the International Institute for Democracy and Electoral Assistance) ເພີ່ມຊື່ປະເທດອາເມລິກາເຂົ້າເປັນປະເທດທີ່ມີປະຊາທິປະໄຕຫລຸດຖອຍ ລະບຸເລີ່ມແຕ່ປີ 2020 ເປັນຕົ້ນມາ.

ສະຖາບັນດັ່ງກ່າວມີສຳນັກງານໃຫຍ່ຢູ່ນະຄອນຫລວງສະຕອກໂຮມ ປະເທດສະວີເດນ ເຮັດວຽກລາຍງານປະເມີນດັດຊະນີຊີ້ວັດຄວາມເປັນປະຊາທິປະໄຕໃນແຕ່ລະປີ ໂດຍໃຊ້ຂໍ້ມູນທີ່ເກັບມາຢ່າງຕໍ່ເນື່ອງກວ່າ 50 ປີ ແລະ ແບ່ງ 160 ປະເທດທີ່ມີລາຍຊື່ອອກເປັນສ່ວນຕ່າງໆ ໄດ້ແກ່ 1.ກຸ່ມປະເທດປະຊາທິປະໄຕ, 2.ກຸ່ມປະເທດປະຊາທິປະໄຕຫລຸດຖອຍ, 3.ກຸ່ມປະເທດການປົກຄອງແບບປະສົມ, 4.ກຸ່ມປະເທດທີ່ບໍ່ເປັນປະຊາທິປະໄຕ ໂດຍເບິ່ງຈາກການມີລັດຖະບານທີ່ນຳສະເໜີພາບແທນຂອງປະຊາຊົນ, ການຄຸ້ມຄອງສິດທິເສລີພາບຂັ້ນພື້ນຖານ, ການກວດສອບລັດຖະບານ, ການບໍລິຫານໂດຍບໍ່ຄຳນຶງເຖິງຝັກຝ່າຍໃດ ແລະ ການເປີດໂອກາດໃຫ້ມີສ່ວນຮ່ວມຈາກປະຊາຊົນ.

ພາຍໃນລາຍງານຊີ້ວ່າ: “ປີນີ້ເປັນປີທຳອິດທີ່ເຮົາຈັດອາເມລິກາຢູ່ໃນກຸ່ມປະຊາທິປະໄຕຫລຸດຖອຍ, ແຕ່ຂໍ້ມູນຊີ້ແລ້ວວ່າປະຊາທິປະໄຕໃນອາເມລິກາເລີ່ມຫລຸດຖອຍນັບແຕ່ປີ 2020” ໂດຍອະທິບາຍວ່າ: ຈຸດປ່ຽນສຳຄັນຂອງປະຊາທິປະໄຕໃນອາເມລິກາເກີດຂຶ້ນໄລຍະປີ 2021-2022 ເມື່ອອະດີດປະທານາທິບໍດີ ໂດນັລ ທຣຳ ເລີ່ມຕັ້ງຄຳຖາມກັບຄວາມຍຸຕິທຳຂອງການເລືອກຕັ້ງປະທານາທິບໍດີປີ 2020 ຈົນເປັນເຫດໃຫ້ຜູ້ສະໜັບສະໜູນທ່ານບຸກລັດຖະສະພາເມື່ອວັນທີ 6 ມັງກອນ 2021.

ສຳລັບພາບລວມທົ່ວໂລກ ລາຍງານສະບັບນີ້ກ່າວວ່າ: 1 ໃນ 4 ຂອງປະຊາກອນໂລກກຳລັງຢູ່ໃນສະຖານະການປະຊາທິປະໄຕຫລຸດຖອຍພາຍໃນປະເທດຂອງຕົນເອງ. ຂະນະທີ່ 2 ໃນ 3 ຂອງປະຊາກອນໂລກຢູ່ໃນລະບອບປະຊາທິປະໄຕທີ່ບໍ່ສົມບູນ ໂດຍສະຖານະການປະຊາທິປະໄຕໂລກບໍ່ຄ່ອຍດີ-ມີການຫລຸດຖອຍລົງກວ່າເທົ່າຕົວໃນຮອບ 10 ປີຜ່ານມາ.

ກຸ່ມປະເທດທີ່ສະຖານະການປະຊາທິປະໄຕຫລຸດລົງຢ່າງວ່ອງໄວໄດ້ແກ່ ຕວກກີ, ນິກາຣາກົວ, ເຊີເບຍ, ໂປແລນ ແລະ ບຣາຊິວ. ເຖິງຢ່າງໃດກໍດີ, ບາງປະເທດກໍມີສະຖານະການທີ່ພັດທະນາຂຶ້ນເຊັ່ນ: ຢູເຄຣນ ແລະ ມາຊີໂດເນຍເໜືອເຄີຍຢູ່ໃນກຸ່ມປະເທດປະຊາທິປະໄຕຫລຸດຖອຍມາກ່ອນ, ແຕ່ປີນີ້ຖືກນຳອອກຈາກລາຍຊື່ດັ່ງກ່າວ ເນື່ອງຈາກສະຖານະການດີຂຶ້ນ.

ອ້າງອີງ:

https://www.aljazeera.com/…/in-first-us-added-to-annual…

https://www.idea.int/…/the-global-state-of-democracy…

- lattana banner 1 - ອາເມລິກາຖືກຈັດໃນ ກຸ່ມປະເທດ ‘ປະຊາທິປະໄຕຫລຸດຖອຍ’ ເປັນຄັ້ງທຳອິດ
-    AD conten website - ອາເມລິກາຖືກຈັດໃນ ກຸ່ມປະເທດ ‘ປະຊາທິປະໄຕຫລຸດຖອຍ’ ເປັນຄັ້ງທຳອິດ
- lattana banner - ອາເມລິກາຖືກຈັດໃນ ກຸ່ມປະເທດ ‘ປະຊາທິປະໄຕຫລຸດຖອຍ’ ເປັນຄັ້ງທຳອິດ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!