ເປີດປະເທດຕ້ອງເຮັດຕາມເງື່ອນໄຂໄປຕາມຂັ້ນຕອນ

- 7740d7ab acbb 41b5 81fa 59702ad606e9 - ເປີດປະເທດຕ້ອງເຮັດຕາມເງື່ອນໄຂໄປຕາມຂັ້ນຕອນ
- AGL banner - ເປີດປະເທດຕ້ອງເຮັດຕາມເງື່ອນໄຂໄປຕາມຂັ້ນຕອນ

ໂດຍ: ທິດກໍ່າ
ຫລັງຈາກມີກະແສຂ່າວວ່າລັດຖະບານເຮົາຈະເປີດປະເທດ ກໍມີກະແສຄວາມຄິດເຫັນໃນໂລກອອນລາຍໄປຫລາຍແງ່ຫລາຍມຸມ ເຊິ່ງມີທັງແງ່ບວກ ແລະ ແງ່ລົບ. ບາງຄົນກໍວ່າ, ມີຄົນຕິດໂຄວິດ-19 ມື້ລະ 1.000 ພັດຍັງຊິມາເປີດປະເທດ ມັນຊິບໍ່ໜັກໜ່ວງກວ່າເກົ່າບໍ່. ກົງກັນຂ້າມ ມີຫລາຍຄົນພັດສະໜັບສະໜູນເຫັນດີເຫັນຊອບ ແລະ ຊົມເຊີຍທີ່ລັດຖະບານເຮົາມີແຜນເປີດປະເທດ ເພາະສູ້ກັບໂຄວິດ-19 ຜ່ານມາໄດ້ຫລາຍປີແລ້ວ ແລະ ມັນກໍຍັງບໍ່ທັນໝົດໄປຈາກສັງຄົມບ້ານເມືອງເຮົາເທື່ອ. ການເປີດປະເທດມັນກໍມີຜົນດີຫລາຍຢ່າງ ເພາະຈະໄດ້ແກ້ໄຂບັນຫາປາກທ້ອງ ນັບທັງການຟື້ນຟູເສດຖະກິດ-ສັງຄົມຂອງປະເທດໃນຊ່ວງວິກິດກັບໂຄວິດ-19 ແລະ ນອກຈາກນັ້ນ ກໍຍັງມີຄຳເຫັນອື່ນໆທີ່ໄດ້ເວົ້າໃນເຊີງສ້າງສັນ ແລະ ຕຳໜິວິຈານ.

ແຕ່ແນວໃດກໍຕາມ, ຖ້າພວກເຮົາໄດ້ຟັງຄຳເຫັນຂອງທ່ານນາຍົກລັດຖະມົນຕີ ພັນຄຳ ວິພາວັນ ໃນໂອກາດເປີດກອງປະຊຸມສະໄໝສາມັນຄັ້ງທີ 2 ຂອງສະພາແຫ່ງຊາດ ຊຸດທີ IX ກ່ຽວກັບການເປີດປະເທດນັ້ນ ທຸກທ່ານທຸກຄົນອາດເຂົ້າໃຈເປັນຢ່າງດີ ເພາະນະໂຍບາຍເປີດປະເທດຂອງລັດຖະບານເຮົານັ້ນບໍ່ແມ່ນເຮັດເພືອບກັນພ້ອມກັນບາດດຽວໃນທົ່ວປະເທດ, ເຮົາຕ້ອງເຮັດໄປຕາມເງື່ອນໄຂ ແລະ ເປັນໄປຕາມຂັ້ນຕອນ. ຕົວຢ່າງ: ທ້ອງຖິ່ນໃດມີເງື່ອນໄຂເປີດ ທ້ອງຖິ່ນນັ້ນຕ້ອງມີຄວາມພ້ອມເຊັ່ນ: ຄວາມພ້ອມໃນການປ້ອງກັນໂຄວິດ-19 ຖ້າຕິດແລ້ວຈະໄປພັກ, ກັກຕົວຢູ່ໃສ, ປິ່ນປົວແນວໃດ ຄວາມພ້ອມດ້ານໂຮງແຮມ, ແຫລ່ງທ່ອງທ່ຽວ ແລະ ການບໍລິຫານຈັດການອື່ນໆຕ້ອງຮັບປະກັນ ແລະ ມີຄວາມພ້ອມທຸກປະການ.

ໃນຄວາມເປັນຈິງແລ້ວ, ການຕັດສິນໃຈເປີດປະເທດຂອງລັດຖະບານເຮົາເປັນການທີ່ຖືກຕ້ອງ ຍ້ອນວ່າເສັ້ນທາງລົດໄຟຄວາມໄວສູງ ລາວ-ຈີນ ກໍຈະເລີ່ມເປີດນຳໃຊ້ບໍລິການໃນວັນທີ 3 ທັນວາ 2021 ເປັນຕົ້ນໄປ. ໃນເມື່ອເປີດເສັ້ນທາງລົດໄຟຄວາມໄວສູງໄປແລ້ວ ທຸກສິ່ງຢ່າງມັນກໍຈະຕາມມາເຊັ່ນ: ການເດີນທາງໄປ-ມາ, ການທ່ອງທ່ຽວ, ການຈໍລະຈອນແຈກຢາຍສິນຄ້າ, ການຜະລິດ ແລະ ການພັດທະນາພື້ນຖານໂຄງລ່າງກໍຈະຂະຫຍາຍຕົວ ແລະ ເຕີບໃຫຍ່ປານດອກເຫັດ. ເມື່ອເປັນຄືສະພາບທີ່ວ່າມານີ້ ຢາກບໍ່ຢາກມັນກໍບັງຄັບໄປໃນໂຕໃຫ້ເຮົາຈະຕ້ອງເປີດປະເທດຢ່າງຫລີກລ່ຽງບໍ່ໄດ້.

ເຖິງຢ່າງໃດກໍດີ, ໃນເມື່ອເປີດປະເທດໄປແລ້ວ ສິ່ງທີ່ເຮົາຕ້ອງໄດ້ພ້ອມກັນເຮັດນັ້ນກໍຄືການປະຕິບັດຕາມມາດຕະການຕ່າງໆ ເພື່ອຢູ່ຮ່ວມກັບໂຄວິດ-19 ໃຫ້ໄດ້. ນອກນັ້ນ ກໍຂຸ້ນຂ້ຽວຊອກຫາວັກຊີນມາສັກໃຫ້ປະຊາຊົນໃຫ້ໄດ້ຕາມແຜນຄາດກະ. ນອກນັ້ນກໍເລັ່ງຜະລິດຢາຊະນິດຕ່າງໆມາປິ່ນປົວຜູ້ຕິດເຊື້ອໃຫ້ຫາຍດີ ພິເສດແມ່ນຜະລິດຢາໂມລນູພິຣາເວຍ (Molnupiravir) ເພື່ອມາປິ່ນປົວປະຊາຊົນລາວທີ່ຕິດໂຄວິດ-19 ໃຫ້ຫາຍຂາດປານປິດຖິ້ມ, ເຖິງເມື່ອນັ້ນລະ ຊາດລາວຄົນລາວຈະຢູ່ຊຸ່ມກິນເຢັນ ຍຸທ່າງສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງໄປໂດຍໄວ.

-    AD conten website - ເປີດປະເທດຕ້ອງເຮັດຕາມເງື່ອນໄຂໄປຕາມຂັ້ນຕອນ
- lattana banner - ເປີດປະເທດຕ້ອງເຮັດຕາມເງື່ອນໄຂໄປຕາມຂັ້ນຕອນ
- lattana banner 1 - ເປີດປະເທດຕ້ອງເຮັດຕາມເງື່ອນໄຂໄປຕາມຂັ້ນຕອນ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!