ນາຍົກຊີ້ຕ້ອງສືບຕໍ່ແກ້ໄຂປະກົດການຫຍໍ້ທໍ້ທຸກດ້ານໃຫ້ຂາດຕົວ

- advert banner 728 90 728x90 - ນາຍົກຊີ້ຕ້ອງສືບຕໍ່ແກ້ໄຂປະກົດການຫຍໍ້ທໍ້ທຸກດ້ານໃຫ້ຂາດຕົວ

ໃນໂອກາດມີຄໍາເຫັນຊີ້ນໍາຕໍ່ກອງປະຊຸມລັດຖະບານປະຈໍາເດືອນກໍລະກົດ 2017 ຂອງທ່ານນາຍົກລັດຖະມົນຕີ ທອງລຸນ ສີສຸລິດ ໄດ້ເນັ້ນວ່າ: ໃນຕໍ່ໜ້ານີ້, ທຸກຂະແໜງການຕ້ອງເພີ່ມທະວີຄວາມເອົາໃຈໃສ່ໃນວຽກງານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ສະຖຽນລະພາບທາງດ້ານການເມືອງໃຫ້ໝັ້ນທ່ຽງ, ໂດຍສະເພາະເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຕ່າງໆຂອງສັງຄົມ ເປັນຕົ້ນແມ່ນໜໍ່ແໜງອາຊະຍາກໍາ, ຢາເສບຕິດ, ຂີ້ລັກງັດແງະ, ປຸ້ນຈີ້-ຊິງຊັບ, ແກ໋ງກວນເມືອງ, ອັກຄີໄພ ແລະ ການເຄື່ອນໄຫວອື່ນໆທີ່ເຫັນວ່າບໍ່ຖືກຕ້ອງສອດຄ່ອງກັບລະບຽບກົດໝາຍ, ພ້ອມທັງເອົາໃຈໃສ່ສືບຕໍ່ຄຸ້ມຄອງ ແລະ ຮັກສາສະຖຽນລະພາບທາງດ້ານເສດຖະກິດມະຫາພາກ, ຄຸ້ມຄອງອັດຕາເງິນເຟີ, ອັດຕາແລກປ່ຽນໃຫ້ຢູ່ໃນເກນປົກກະຕິ, ຕິດຕາມ ການເຄື່ອນໄຫວຂອງທະນາຄານທຸລະກິດ ແລະ ບັນດາສະຖາບັນການເງິນໃຫ້ດໍາເນີນການຢ່າງຖືກຕ້ອງຕາມລະບຽບກົດໝາຍ, ນອກນີ້ໃຫ້ເອົາໃຈໃສ່ຄົ້ນຄວ້າທິດທາງແກ້ໄຂຢ່າງຮອບຄອບ ແລະ ທັນການຕໍ່ການເຄື່ອນໄຫວລະດົມທຶນທີ່ບໍ່ຖືກລະບຽບ, ເອົາໃຈໃສ່ຄົ້ນຄວ້າອັດຕາດອກເບ້ຍເງິນກູ້ ແລະ ກົນໄກການສະໜອງທຶນເພື່ອຊຸກຍູ້ສົ່ງເສີມການຜະລິດພາຍໃນ, ໂດຍສະເພາະການສ້າງເງື່ອນໄຂໃຫ້ພາກທຸລະກິດພາຍໃນສາມາດເຂົ້າເຖິງແຫລ່ງທຶນ, ຄຸ້ມຄອງລາຄາສີນຄ້າຕາມທ້ອງຕະຫລາດ ເປັນຕົ້ນແມ່ນປະເພດສີນຄ້າອຸປະໂພກ-ບໍລິໂພກ ທີ່ກະທົບຕໍ່ພື້ນຖານການດໍາລົງຊີວິດຂອງປະຊາຊົນ ເຊັ່ນ: ເຂົ້າ, ຊີ້ນ, ປາ ແລະ ອື່ນໆ. ນອກຈາກນີ້ ກໍໃຫ້ສືບຕໍ່ປັບປຸງວິສາຫະກິດທີ່ມີບັນຫາໃຫ້ສາມາດເຄື່ອນໄຫວຢ່າງມີປະສິດທິຜົນໂດຍໄວ, ສົ່ງເສີມການລົງທຶນຂອງຕ່າງປະເທດເພື່ອເປັນມາດຕະການກະຕຸ້ນເສດຖະກິດ. ພ້ອມທັງໃຫ້ບັນດາຂະແໜງການຂັ້ນສູນກາງ ແລະ ທ້ອງຖິ່ນ ເອົາໃຈໃສ່ຕິດຕາມກວດກາການບໍລິການປະຕູດຽວຂອງຂະແໜງການຕົນຮັບພິຊອບ ຖ້າພົບເຫັນອຸປະສັກກີດຂວາງທ່ວງດຶງ ບໍ່ວ່າກົນໄກ ຫລື ບຸກຄົນ ແມ່ນໃຫ້ຮີບຮ້ອນແກ້ໄຂໄວ ເພື່ອຊຸກຍູ້ການລົງທຶນທັງພາຍໃນ ແລະ ຕ່າງປະເທດ, ອັນສໍາຄັນແມ່ນໃຫ້ສືບຕໍ່ຮັບຟັງຄໍາຄິດເຫັນຂອງປະຊາຊົນທີ່ສ່ອງແສງຜ່ານສາຍດ່ວນ ເພື່ອເປັນຂໍ້ມູນໃນການຕິດຕາມສະພາບການປະຕິບັດໜ້າທີ່ຂອງແຕ່ລະຂະແໜງການ. ສືບຕໍ່ເພີ່ມທະວີການແກ້ໄຂພາຫະນະນໍາເຂົ້າບໍ່ຖືກຕ້ອງຕາມແຈ້ງການແນະນໍາເພີ່ມຕື່ມຂອງກະຊວງການເງິນ, ໃຫ້ເຂັ້ມງວດໃນການຄຸ້ມຄອງ, ກວດກາສີນຄ້າຢູ່ບັນດາຮ້ານຄ້າປອດພາສີ ແລະ ສະກັດກັ້ນການລັກລອບໜີພາສີໃນດ່ານ ແລະ ນອກດ່ານ, ສືບຕໍ່ຕິດຕັ້ງເຄື່ອງບັນທຶກການຂາຍສີນຄ້າ ແລະ ການບໍລິການຂອງຂະແໜງສ່ວຍສາອາກອນໃຫ້ສໍາເລັດໂດຍໄວ.

- lattana 1 - ນາຍົກຊີ້ຕ້ອງສືບຕໍ່ແກ້ໄຂປະກົດການຫຍໍ້ທໍ້ທຸກດ້ານໃຫ້ຂາດຕົວ
- 1 1 - ນາຍົກຊີ້ຕ້ອງສືບຕໍ່ແກ້ໄຂປະກົດການຫຍໍ້ທໍ້ທຸກດ້ານໃຫ້ຂາດຕົວ
error: Content is protected !!