ຜູ້ນຳສິງກະໂປເນັ້ນກຳລັງຕິດຕາມ ‘ໂຄວິດໂອມິຄຣອນ’ ຢ່າງໃກ້ຊິດ ຍອມຮັບອາດຕ້ອງຢຸດການຜ່ອນຄາຍມາດຕະການ

ຜູ້ທີ່ຈະເດີນທາງເຂົ້າສິງກະໂປອາດຕ້ອງລໍຖ້າກ່ອນ ຫລັງນາຍົກລັດຖະມົນຕີ ລີຊຽນລຸງ ອອກມາເປີດເຜີຍວ່າ: ມີໂອກາດປັບມາດຕະການໃຫ້ເຂັ້ມງວດຂຶ້ນ ເຖິງວ່າຫາກໍປະກາດເປີດໃຫ້ຄົນເຂົ້າປະເທດໄດ້ເມື່ອມໍ່ໆນີ້.

ວັນທີ 28 ພະຈິກ 2021, ເວັບໄຂອງໜັງສືພິມສເຕຣດທາມ (Straits Times) ລາຍງານຄຳກ່າວຂອງນາຍົກລັດຖະມົນຕີ ລີຊຽນລຸງ ຂອງສິງກະໂປ ໃນລະຫວ່າງກອງປະຊຸມຂອງພັກ PDP ທີ່ລະບຸວ່າ: ກຳລັງຕິດຕາມຜົນກະທົບຂອງເຊື້ອໂຄວິດກາຍພັນສາຍພັນໂອມິຄຣອນ (Omicron) ຢ່າງໃກ້ຊິດ ແລະ ອາດຈະຕ້ອງຢຸດການຜ່ອນຄາຍມາດຕະການຕ່າງໆໃນການເປີດເສດຖະກິດໄປກ່ອນ.

ນາຍົກລັດຖະມົນຕີ ລີຊຽນລຸງ ເປີດເຜີຍວ່າ: ປັດຈຸບັນຍັງບໍ່ມີຫຍັງແນ່ນອນ ແຕ່ທາງລັດຖະບານອາດຈະຕ້ອງຍອມຖອຍຫລັງ ກ່ອນຈະສາມາດກ້າວຕໍ່ໄປຂ້າງໜ້າໄດ້ ແຕ່ທ່ານຍັງໝັ້ນໃຈວ່າຈະຫາທາງຢູ່ຮ່ວມກັບເຊື້ອໄວຣັສ ແລະ ກັບໄປສູ່ການເຮັດສິ່ງຕ່າງໆທີ່ເຮົາຮັກຢ່າງປອດໄພໄດ້.

ຈາກຂ່າວການກວດພົບເຊື້ອໂຄວິດ-19 ສາຍພັນໂອມິຄຣອນ ເຊິ່ງທາງອົງການອະນາໄມໂລກຈັດໃຫ້ເປັນເຊື້ອກາຍພັນທີ່ໜ້າກັງວົນ (Variant of Concern) ເຮັດໃຫ້ຫລາຍປະເທດເລີ່ມປະກາດຈຳກັດການເດີນທາງແລ້ວ.

ກ່ອນໜ້ານີ້, ລັດຖະບານສິງກະໂປຫາກໍຈະປະກາດຂະຫຍາຍປະເທດທີ່ສາມາດເດີນທາງເຂົ້າສິງກະໂປໂດຍບໍ່ຕ້ອງກັກຕົວ ຕາມມາດຕະການ ‘vaccinated travel tanes (VTLs)’ ໂດຍຈະທະຍອຍອະນຸຍາດອີກ 6 ປະເທດ ໄດ້ແກ່ ໄທ, ກຳປູເຈຍ, ຟິຈິ, ມັລດິຟ, ສີລັງກາ ແລະ ຕຸຣກີ ໃນເດືອນທັນວາທີ່ຈະເຖິງນີ້.

ເຖິງວ່າໃນຕອນນີ້ ສິງກະໂປຈະຍັງບໍ່ໄດ້ອອກມາປະກາດມາດຕະການຈຳກັດການເດີນທາງໃດໆ ແຕ່ຄາດວ່າຈະມີການປະກາດມາດຕະການເພີ່ມຕື່ມອອກມາໃນມໍ່ໆນີ້.

ສິງກະໂປຫາກໍຈະປະກາດຜ່ອນຄາຍມາດຕະການຫລ້າສຸດໃນອາທິດຜ່ານມາ ຫລັງຈາກພະຍາຍາມຄວບຄຸມການລະບາດມາແຕ່ວັນທີ 27 ກັນຍາ.

ໂດຍຕົວເລກຂອງວັນທີ 27 ພະຈິກຜ່ານມາ ສິງກະໂປພົບຜູ້ຕິດເຊື້ອໃໝ່ 1.761 ຄົນ ມີທ່າອ່ຽງຫລຸດລົງຢ່າງຕໍ່ເນື່ອງ ຫລັງຂຶ້ນໄປເຖິງຈຸດສູງສຸດ 5.324 ຄົນ ເມື່ອວັນທີ 27 ຕຸລາ.

ອ້າງອີງ:

https://www.straitstimes.com/…/pap-conference-spore…