WHO ແນະນຳພາກພື້ນອາຊີ-ປາຊີຟິກ ກຽມຮັບມືໂອມິຄຣອນ ເພີ່ມຂີດຄວາມສາມາດ ການໃຫ້ບໍລິການສຸຂະພາບ-ເລັ່ງສັກວັກຊີນ
ເຈົ້າໜ້າທີ່ຂອງອົງການອະນາໄມໂລກ (WHO) ໄດ້ແນະນຳໃຫ້ພາກພື້ນອາຊີ-ປາຊີຟິກເພີ່ມຂີດຄວາມສາມາດໃນການໃຫ້ບໍລິການດ້ານສຸຂະພາບ ແລະ ເພີ່ມອັດຕາການສັກວັກຊີນ ເພື່ອກຽມພ້ອມກ່ອນຈະມີຜູ້ຕິດເຊື້ອໂຄວິດ ທີ່ຄາດວ່າຈະເພີ່ມຂຶ້ນຈາກການລະບາດຂອງເຊື້ອສາຍພັນໂອມິຄຣອນ.
ໂດຍທ່ານ ທາເຄຊິ ຄາໄຊ ຜູ້ອຳນວຍການພາກພື້ນປາຊີຟິກຕາເວັນຕົກຂອງ WHO ລະບຸວ່າ: ການໃຊ້ມາດຕະການຄວບຄຸມຊາຍແດນຈະ “ຊື້ເວລາ” ທີ່ໄວຣັສຈະເຂົ້າມາໄດ້, ແຕ່ທຸກປະເທດ ແລະ ທຸກທ້ອງຖິ່ນຕ້ອງກຽມຕົວຕໍ່ການເພີ່ມຂຶ້ນຂອງຈຳນວນຜູ້ຕິດເຊື້ອ.
“ທຸກຄົນບໍ່ຄວນເພິ່ງພາມາດຕະການດ້ານຊາຍແດນພຽງຢ່າງດຽວ ສິ່ງສຳຄັນທີ່ສຸດຄືການກຽມພ້ອມສຳລັບສາຍພັນເຫລົ່ານີ້ທີ່ອາດຈະມີປະສິດທິພາບການແຜ່ເຊື້ອໄດ້ສູງ, ຈົນຮອດປັດຈຸບັນ ຂໍ້ມູນທີ່ມີຢູ່ຊີ້ໃຫ້ເຫັນວ່າ ເຮົາບໍ່ຕ້ອງປ່ຽນແນວທາງຂອງເຮົາ” ທ່ານ ຄາໄຊ ກ່າວ.
ທ່ານ ຄາໄຊ ຍັງແນະນຳໃຫ້ແຕ່ລະປະເທດປັບໃຊ້ມາດຕະການຮັບມືຕາມກິລິຍາບົດຂອງແຕ່ລະປະເທດ ໂດຍຍຶດເຄື່ອງມືສຳຄັນ 5 ປະການ ໄດ້ແກ່ ການສັກວັກຊີນ ໂດຍສະເພາະກຸ່ມສ່ຽງສູງ, ມາດຕະການທາງສັງຄົມ ແລະ ສາທາລະນະສຸກ, ການເບິ່ງແຍງຜູ້ຕິດເຊື້ອໂຄວິດ, ການເຝົ້າລະວັງເພື່ອກວດຫາຜູ້ຕິດເຊື້ອ ແລະ ການເພີ່ມຂຶ້ນຂອງຜູ້ຕິດເຊື້ອທີ່ອາດເກີດຂຶ້ນແຕ່ຫົວທີ ແລະ ການຄວບຄຸມດ້ານຊາຍແດນ.
ຂະນະທີ່ ດຣ. ບາບາຕຸນເດ ໂອໂລໂວກູເຣ (Babatunde Olowokure) ຜູ້ອຳນວຍການດ້ານເຫດສຸກເສີນລະດັບພາກພື້ນຂອງ WHO ບອກວ່າ: ຍັງມີການດຳເນີນການວິໄຈເພື່ອໃຫ້ເຂົ້າໃຈເພີ່ມຂຶ້ນກ່ຽວກັບຄວາມສາມາດໃນການແຜ່ເຊື້ອ, ຄວາມຮຸນແຮງຂອງພະຍາດ ແລະ ຜົນກະທົບທີ່ເກີດຂຶ້ນຈາກເຊື້ອສາຍພັນໂອມິຄຣອນຕໍ່ປະຊາກອນຢູ່ ແລະ ແນະນຳໃຫ້ແຕ່ລະປະເທດເພີ່ມຂີດຄວາມສາມາດໃນການຮັບມື ໂດຍໃຊ້ປະສົບການຈາກການຮັບມືເຊື້ອສາຍພັນເດວຕາ ແລະ ໃຊ້ເຄື່ອງມືສຳຄັນ 5 ປະການນຳ.
ອ້າງອີງ:
- https://www.aljazeera.com/news/2021/12/3/new-york-becomes-fourth-us-state-to-confirm-omicron-live
- https://www.reuters.com/world/asia-pacific/who-urges-asia-pacific-ready-omicron-driven-surge-infections-2021-12-03/
- https://www.who.int/westernpacific/news-room/speeches/detail/regional-director-s-remarks-at-the-virtual-press-conference-on-3-december-2021
- https://www.youtube.com/watch?v=5EbH5phMmsk
