ຫລາຍ​ທ້ອງຖິ່ນໄດ້ຮັບຜົນ​ກະທົບໜັກຈາກ​ພະຍຸ​ຊົງ​ກາມີ​ຜູ້​ເສຍ​ຊີວິດ​ແລ້ວ 2 ຄົນ

- advert banner 728 90 728x90 - ຫລາຍ​ທ້ອງຖິ່ນໄດ້ຮັບຜົນ​ກະທົບໜັກຈາກ​ພະຍຸ​ຊົງ​ກາມີ​ຜູ້​ເສຍ​ຊີວິດ​ແລ້ວ 2 ຄົນ

ຈາກ​ເຫດການ​ພະຍຸ​ຊົງ​ກາ​ພັດ​ຜ່ານ​ເຂົ້າລາວ​​ເມື່ອ​ທ້າຍ​ອາທິດ​ຜ່ານ​ມານີ້​ໄດ້​ເຮັດ​ໃຫ້​ຫລາຍ​ແຂວງ​ເກີດ​ນ້ຳ​ຖ້ວມ ​ແລະ ​ໄດ້​ຮັບ​ຄວາມ​ເສຍ​ຫາຍ​ເປັນ​ຈຳນວນ​ຫລາຍ ຈາກ​ອິດ​ທິພົນຂອງ​ລົມ​ພະຍຸທີ່​ເກີດ​ມີ​ຝົນຕົກ ​ແລະ ນ້ຳ​ຖ້ວມ, ມາ​ຮອດ​ປັດຈຸບັນ​ພົບ​ມີ​ຜູ້​ເສຍ​ຊີວິດ 2 ຄົນຢູ່ເມືອງແກ່ນທ້າວແຂວງໄຊຍະບູລີ, ໂດຍແຫລ່ງຂ່າວແຂວງດັ່ງກ່າວລາຍງານວ່າ: ພາຍຫລັງ​ພາຍຸ​ດີ​ເຟຣດຊັນ​ໂຊນ​ກາ​ພັດ​ຜ່ານ​ລະຫວ່າງວັນ​ທີ 25-27 ກໍລະກົດນີ້, ​ເຊິ່ງກໍ່​ໃຫ້​ເກີດຝົນຕົກ​ແຮງ, ເຮັດ​ໃຫ້​ນ້ຳ​ຫລາຍ​ສາຍ​ເພີ່ມ​ສູງຂຶ້ນ ​ແລະ ​ໄຫລຊຸ​ບ້ານ​ເຮືອນ​ຂອງ​ປະຊາຊົນຢ່າງ​ກະທັນຫັນຢູ່​ບ້ານ​ກົງ​ແດງ ​ແລະ ບ້ານໜອງ​ ໃນ​ເມືອງ​ແກ່ນ​ທ້າວ,​ ສົ່ງ​ຜົນ​ເຮັດ​ໃຫ້​ 89 ຫລັງຄາ​ເຮືອນໄດ້ຮັບຄວາມເສຍຫາຍ ​ແລະ ມີ​ຜູ້​ເສຍ​ຊີວິດ​ 2 ຄົນ, ພ້ອມ​ນີ້​ຍັງ​ມີ​ຊັບ​ສິນ​ ແລະ ເຂົ້າກິນໄດ້ຮັບຄວາມເສຍຫາຍ​ຈໍານວນ​ໜຶ່ງ​. ສະ​ເພາະ​ບ້ານກົງ​ແດງມີປະຊາຊົນ 32 ຄອບຄົວໄດ້ຮັບຜົນກະທົບ ໃນນີ້ເສຍຫາຍໜັກມີ 13 ຄອບຄົວ, ສ່ວນບ້ານໜອງມີປະຊາຊົນໄດ້ຮັບຜົນກະທົບ 57 ຫລັງຄາເຮືອນ ແລະ ເສຍຫາຍໜັກມີ 45 ຄອບຄົວ.

- new3 - ຫລາຍ​ທ້ອງຖິ່ນໄດ້ຮັບຜົນ​ກະທົບໜັກຈາກ​ພະຍຸ​ຊົງ​ກາມີ​ຜູ້​ເສຍ​ຊີວິດ​ແລ້ວ 2 ຄົນ

ທ່ານຮອງ​ເຈົ້າ​ເມືອງ​ແກ່ນ​ທ້າວ ​ໃຫ້​ຮູ້ວ່າ: ພາຍຫລັງ​ເກັບ​ກຳ​ຂໍ້​ມູນ ​ແລະ ປະ​ເມີນ​ຜົນ​ເສຍ​ຫາຍ​ອັນ​ລະອຽດ​ແລ້ວ ຈະ​ໄດ້​ສະ​ເໜີ​ໃຫ້​ຄະນະ​ນຳ​ແຂວງ​ໄດ້​ຮັບ​ຊາບ ​ເພື່ອ​ດຳ​ເນີນ​ການ​ຊ່ວຍ​ເຫລືອ​​ໂດຍ​ໄວ. ຂະນະ​ທີ່​ແຫ​ລ່ງຂ່າວ​ແຂວງສະຫວັນ​ນະ​ເຂດ​ ລາຍ​ງານ​ວ່າ: ຈາກເຫດການພາຍຸຊົງກາພັດຜ່ານໃນວັນທີ 23-27 ກໍລະກົດນີ້, ມີຝົນຕົກໜັກ ແລະ ເກີດນໍ້າຖ້ວມກະທັນຫັນ, ​ມີເນື້ອ​ທີ່ 451 ເຮັກຕາ ແລະ 254 ຄອບຄົວທີ່ໄດ້ຮັບຜົນກະທົບ, ໃນນັ້ນເມືອງໄຊພູທອງມີ: ບ້ານພູມມະເຈດີ, ບ້ານໂພນສົ້ມໂຮງ, ບ້ານດອນຕຸມ ແລະ ບ້ານຕາດແດດ, ເຮັດໃຫ້ເຂົ້ານາປີຂອງປະຊາຊົນທີ່ກຳລັງດຳຫາກໍສຳເລັດ ແລະ ເຄື່ອງປູກ ເປັນຈຳນວນຫລາຍໄດ້ຮັບຄວາມເສຍຫາຍ.

ຂ່າວໃຫ້ຮູ້ອີກວ່າ: ໃນວັນທີ 28 ກໍລະກົດນີ້, ທ່ານ ນາມ​ ວິ​ຍາ​ເກດ ​ເຈົ້າ​ແຂວງອັດ​ຕະປື ກໍ​ໄດ້​ລົງ​ກວດກາ​ຜົນ​ເສຍ​ຫາຍຈາກ​ພະຍຸ​ຊົງ​ກາຢູ່ເມືອງສະໝາມ​ໄຊ ມີ 4 ບ້ານ​ຄື: ບ້ານປາກ​ບໍ່, ໜອງ​ແຂ້, ບ້ານ​ດອນ, ບ້ານ​ໂພນ​ສະອາດ, ລວມມີ 447 ຫລັງຄາເຮືອນໄດ້ຮັບຜົນກະທົບ, ມີເນື້ອທີ່ນາ 232 ເຮັກຕາຖືກນ້ຳຖ້ວມ ແລະ ຜົນລະປູກອື່ນໆໄດ້ຮັບຄວາມເສຍຫາຍ, ຊຶ່ງທາງແຂວງຈະຕ້ອງໄດ້ຮີບຮ້ອນໃຫ້ການຊ່ວຍເຫລືອ.

ກົມ​ອຸ​ຕິ​ນິຍົມ ​ແລະ ອຸ​ທົກ​ກະສາ​ດ ຍັງ​ໄດ້​ແຈ້ງ​ເຕືອນ​ວ່າ: ໃຫ້ສືບຕໍ່ເຝົ້າລະວັງສະພາບຝົນຕົກໜັກ ແລະ ນໍ້າຖ້ວມ, ຊຶ່ງປັດຈຸບັນຮ່ອງຄວາມກົດດັນອາກາດຕໍ່າໄດ້ພາດຜ່ານແຂວງພາກເໜືອລົງຫາພາກກາງຂອງປະເທດລາວ, ປ່ອງເຂົ້າສູ່ລົມພາຍຸເນແສັດ (Nesat) ຫົວທີ9, ມີຈຸດໃຈກາງຢູ່ເສັ້ນຂະໜານທີ 20 ອົງສາເໜືອ ແລະ ເສັ້ນແວງທີ 125,8 ອົງສາຕາເວັນອອກ, ພວມເຄື່ອນທີໄປທາງທິດຕາເວັນຕົກສຽງເໜືອດ້ວຍຄວາມໄວ 15 ກິໂລແມັດຕໍ່ຊົ່ວໂມງ, ສົມທົບກັບລົມມໍລະສຸມຕາເວັນຕົກສ່ຽງໃຕ້ມີກຳລັງແຮງພັດປົກຄຸມ, ຊຶ່ງລັກສະນະເຊັ່ນນີ້ຍັງຈະເຮັດໃຫ້ມີຝົນຕົກໃນລະດັບຄ່ອຍຫາປານກາງ ແລະ ຕົກໜັກເປັນບາງໂອກາດ, ພ້ອມມີລົມພັດແຮງຢູ່ບັນດາແຂວງພາກກາງຫາພາກໃຕ້ຕື່ມອີກ. ດັ່ງນັ້ນ ຈຶ່ງຂໍແຈ້ງເຕືອນເຖິງພໍ່ແມ່ປະຊາຊົນທີ່ອາໄສຢູ່ໃນເຂດດັ່ງກ່າວ, ຈົ່ງສືບຕໍ່ເຝົ້າລະວັງ ແລະ ກຽມພ້ອມຮັບມືກັບສະພາບນໍ້າຖ້ວມຊຸ, ນໍ້າຖ້ວມອັ່ງ ແລະ ລົມພັດແຮງທີ່ອາດຈະເກີດຂື້ນ ແລະ ໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດຢ່າງເປັນປະຈໍາ.

- lattana 1 - ຫລາຍ​ທ້ອງຖິ່ນໄດ້ຮັບຜົນ​ກະທົບໜັກຈາກ​ພະຍຸ​ຊົງ​ກາມີ​ຜູ້​ເສຍ​ຊີວິດ​ແລ້ວ 2 ຄົນ

 

error: Content is protected !!