ຈົ່ງຮ່ວມແຮງຮ່ວມໃຈກັນ ຊ່ວຍເຫລືອຜູ້ປະສົບໄພຈາກພາຍຸຊົງກາ

- advert banner 728 90 728x90 - ຈົ່ງຮ່ວມແຮງຮ່ວມໃຈກັນ ຊ່ວຍເຫລືອຜູ້ປະສົບໄພຈາກພາຍຸຊົງກາ

ໂດຍ: ທ່ຽງ​ທຳ

​ເພື່ອນ​ຜູ້​ອ່ານ​ທີ່​ຮັກ​ແພງ, ດັ່ງ​ພວກ​ເຮົາ​ໄດ້​ອອກ​ຂ່າວ​ໄປ​ແລ້ວ ຈາກ​ຄວາມ​ເສຍ​ຫາຍ​ຕ່າງໆ​ຈາກ​ພາຍຸ​ຊົງກາ ​ແລະ ພາຍຸ​ດີ​​ເປຣຊັນ​ທີ່​ພັດ​ຜ່ານ​ຫລາຍ​ເຂ​ດຂອງ​ປະ​ເທດ​ເຮົາ ອັນ​ໄດ້​ກໍ່​ໃຫ້​ເກີດ​ຜົນ​ເສຍ​ຫາຍ ນັບ​ທັງ​ຊີວິດ ​ແລະ ຊັບ​ສິນ, ​ເຮືອນ​ຊານ​ບ້ານ​ຊ່ອງ, ​ໄຮ່ນາ​ຮົ້ວສວນ​ຕ່າງໆ​ຂອງ​ປະຊາຊົນ​ເຮົາ​ເປັນ​ຈຳນວນ​ບໍ່​ໜ້ອຍ, ສະ​ເພາະ​ຢູ່​ບ້ານ​ກົງ​ແດງ ​ແລະ ບ້ານ​ໜອງ ​ເມືອງ​ແກ່ນ​ທ້າວ ​ແຂວງ​ໄຊ​ຍະ​ບູລີ ນອກຈາກ​ເຮືອນ​ຊານ​ຈຳນວນ 89 ຫລັງ ​ແລະ ຊັບ​ສິນ ພ້ອມ​ຜົນລະປູກ​ເປັນ​ຈຳນວນ​ຫລາຍ​ຖືກ​ນ້ຳຊຸ​ເສຍ​ຫາຍ​ແລ້ວ ຍັງ​ເຮັດ​ໃຫ້​ມີ​ຜູ້​ເສຍ​ຊີວິດ 2 ຄົນ, ສ່ວນ​ຢູ່​ເຂດ​ພາກ​ກາງ ​ແລະ ພາກ​ໃຕ້​ລາວ​ກໍ​ໄດ້​ຮັບ​ຜົນ​ກະທົບ​ຢ່າງ​ໜັກໜ່ວງ ຄື​ຢູ່​ແຂວງ​ສະຫວັນ​ນະ​ເຂດ​ມີ 254 ຄອບຄົວ​ໃນ​ເມືອງ​ໄຊ​ພູ​ທອງ​ໄດ້​ຮັບ​ຜົນ​ກະທົບ, ​ເນື້ອທີ່​ນາ​ທີ່​ຫາ​ກໍ​ປັກ​ດຳ​ໃໝ່​ຈຳນວນ 450 ກວ່າ​ເຮັກຕາຖືກ​ນ້ຳຖ້ວມ. ສຳລັບ​ແຂວງ​ອັດ​ຕະປື​ແມ່ນ​ເຂດ​ເມືອງ​ສະໜາມ​ໄຊ​ມີ 447 ຫລັງຄາ​ເຮືອນ​ໄດ້​ຮັບ​ຄວາມ​ເສຍ​ຫາຍ, ​ເນື້ອທີ່​ນາ​ມີ​ຫລາຍ​ກວ່າ 200 ​ເຮັກຕາ​ຖືກ​ນ້ຳຖ້ວມ ​ແລະ ຜົນລະປູກ​ອື່ນໆ​ໄດ້​ຮັບ​ຄວາມ​ເສຍ​ຫາຍ​ເປັນ​ຈຳນວນ​ຫລາຍ ​ແລະ ຢູ່​ແຂວງ​ສາລະ​ວັນ​ມີ 30 ບ້ານ​ທີ່​ໄດ້​ຮັບ​ຜົນ​ກະທົບ, ​ເນື້ອທີ່​ປູກ​ເຂົ້າຫລາຍ​ກວ່າ 1.500 ​ເຮັກຕາ​ຖືກ​ນ້ຳຖ້ວມ, ​ໃນ​ນັ້ນໜັກໜ່ວງ​ກວ່າ​ໝູ່​ແມ່ນ​ກຸ່ມ 2 ບ້ານ​ເລົ່າ ​ແລະ ກຸ່ມ 3 ບ້ານ​ວາປີ ​ແລະ ສະພາບ​ນ້ຳຖ້ວມ​ດັ່ງກ່າວ​ຍັງ​ຈະ​ແກ່ຍາວ​ໄປ​ຫລາຍ​ວັນ. ດັ່ງນັ້ນ ຈຶ່ງ​ຂໍ​ຮຽກຮ້ອງ​ໃຫ້​ທົ່ວ​ສັງຄົມ​ຮ່ວມ​ແຮງ​ຮ່ວມ​ໃຈ​ກັນ​ຊ່ວຍ​ເຫລືອ​ຜູ້​ປະສົບ​ໄພ​ດັ່ງກ່າວ​ໃຫ້​ເຂົາ​ເຈົ້າ​ໄດ້​ມີ​ເງື່ອນ​ໄຂ​ດຳລົງ​ຊີວິດ ​ແລະ ຕ້ານ​ກັບ​ເຫດ​ຮ້າຍ​ດັ່ງກ່າວ​ໃຫ້​ຜ່ານ​ພົ້ນ​ໄປ​ໂດຍ​ໄວ ​ໂດຍ​ສະ​ເພາະ​ອາຫານ​ການ​ກິນ, ນ້ຳດື່ມ ​ແລະ ​ເຄື່ອງ​ໃຊ້​ປະຈຳ​ວັນ​ອື່ນໆ​ທີ່​ຈຳ​ເປັນຕ່າງໆ, ສ່ວນ​ຜູ້​ເຮັດ​ວຽກ​ງານ​ສາທາລະນະ​ສຸກ​ກໍ​ຈະ​ຕ້ອງ​ໄດ້​ຮີບ​ຮ້ອນ​ລົງ​ກວດກາ​ເຂດ​ໄດ້​ຮັບ​ຜົນ​ກະທົບ ​ເພື່ອ​ຈະ​ມີ​ມາດ​ຕະການ​ຮັບ​ມື​ກັບ​ການລະບາດ​ຂອງ​ພະຍາດ​ຕ່າງໆ​ທີ່​ອາດ​ຈະ​ເກີດ​ຂຶ້ນຫລັງ​ນ້ຳຖ້ວມ​ເຊັ່ນ: ພະຍາດ​ຖອກທ້ອງ, ຕາ​ແດງ, ຕີນ​ມື​ເປັນ​ຕຸ່ມ​ເປືອຍ ​ແລະ ອື່ນໆ​ໃຫ້​ທັນ​ການ ​ແລະ ມີ​ປະສິດທິ​ຜົນ.

- 1 1 - ຈົ່ງຮ່ວມແຮງຮ່ວມໃຈກັນ ຊ່ວຍເຫລືອຜູ້ປະສົບໄພຈາກພາຍຸຊົງກາ
- Tiger Head 728x90 - ຈົ່ງຮ່ວມແຮງຮ່ວມໃຈກັນ ຊ່ວຍເຫລືອຜູ້ປະສົບໄພຈາກພາຍຸຊົງກາ
error: Content is protected !!