ລູກາກູ ຍອມຮັບຜົນງານບໍ່ດີຍ້ອນລະບົບການນຳທີມຂອງ ທູເຄິລ

ໂຣເມຣູ ລູກາກູ ດາວຍິງຄ່າໂຕແພງຂອງ ເຊລຊີ ອອກມາເປີດໃຈເຖິງສະຖານະການໃນທີມ ເຊລຊີ ປັດຈຸບັນ ໂດຍນັກເຕະອອກປາກຢ່າງຈະແຈ້ງວ່າບໍ່ມີຄວາມສຸກກັບລະບົບທີມທີ່ນຳໂດຍ ໂທມັສ ທູເຄິລ.

ລູກາກູ ຫາກໍຍ້າຍຈາກ ອິນເຕີ ມິລານ ກັບມາຢູ່ກັບ ເຊລຊີ ດ້ວຍຄ່າໂຕແສນແພງເຖິງ 97,5 ລ້ານປອນ ເຊິ່ງນັກເຕະເປີດເຜີຍວ່າ ບໍ່ມີຄວາມສຸກກັບລະບົບທີມຂອງ ທູເຄິລ ທີ່ເລີ່ມຈະມີບາງສິ່ງທີ່ປ່ຽນໄປແຕ່ດ້ວຍຄວາມເປັນມືອາຊີບ ລາວຍັງຢືນຢັນວ່າຈະຂໍສູ້ຕໍ່ໄປເຖິງຈະບໍ່ຄ່ອຍມີຄວາມສຸກກໍຕາມ.

‘‘ ຂ້ອຍສະບາຍດີ ແຕ່ຂ້ອຍບໍ່ຄ່ອຍມີຄວາມສຸກກັບສະຖານະການທີ່ເປີດຢູ່ ທູເຄິລ ມີລະບົບການຫລິ້ນທີ່ແຕກຕ່າງໄປຈາກເກ່ົາ ຂ້ອຍບໍ່ຍອມແພ້ແນ່ນອນ ຂ້ອຍມືອາຊີບຫລາຍພຽງພໍ ເຖິງຈະບໍ່ຄ່ອຍມີຄວາມສຸກກັບສະຖານະການແບບນີ້ກໍຕາມ ’’.

‘‘ ຂ້ອຍຄິດວ່າທຸກຢ່າງສາມາດເກີດຂຶ້ນໄດ້ໃນໄລຍະລະດູການ ເປັນຫຍັງຂ້ອຍເຖິງອອກຈາກ ອິນເຕີ ມິລານ ເພາະຂ້ອຍຄິດວ່າມັນບໍ່ເຫມາະກັບຂ້ອຍ ຕອນນີ້ ເຖິງເວລາແລ້ວທີ່ຂ້ອຍຈະມາເລົ່າຄວາມຮູ້ສຶກຂອງຂ້ອຍ ຂ້ອຍເວົ້າມາຕະຫລອດວ່າ ຂ້ອຍຍັງຮັກອິນເຕີ ມິລານ ສະເຫມີ ຂ້ອຍຈະຕ້ອງກັບໄປບ່ອນນັ້ນ ຂ້ອຍຮກໃນອີຕາລີກ່ອນຂ້ອຍຈະເຊົາຫລິ້ນບານ ຂ້ອຍຕ້ອງໄດ້ກັບໄປຫລິ້ນບ່ອນນັ້ນອີກຄັ້ງແນ່ນອນ ’’.

ຜົນງານຂອງ ລູກາກູ ໃນລະດູການນີ້ ລົງສະຫນາມໄປແລ້ວ 18 ນັດ ຍິງໄປ 7 ປະຕ ກັບອີກ 2 ແອສຊິສ ໃນທຸກລາຍການ.