ຈັບຜູ້ຂາຍຍ່ອຍ ນໍາໄປສູ່ການຈັບຜູ້ຈໍາໜ່າຍ 

ພັທ ຄໍາມະນີ ແກ້ວສີຫາ ຫົວໜ້າພະແນກຕໍາຫຼວດ ປກສ ເມືອງໄຊທານີ ໃຫ້ສໍາພາດໃນວັນທີ 5 ມັງກອນນີ້ ວ່າ: ເພື່ອເປັນການສະກັດກັ້ນ ແລະ ຕ້ານກຸ່ມບໍ່ຫວັງດີທີ່ຫວັງມ້າງເພທໍາລາຍຄວາມສະຫງົບຂອງປະເທດ ທັງເປັນການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ; ປກສ ເມືອງໄຊທານີ ຈຶ່ງໄດ້ຫັນເອົາກໍາລັງວິຊາສະເພາະລົງຕິດຕາມ-ກວດກາເພື່ອຂຶ້ນບັນຊີເປົ້າໝາຍທີ່ພົວພັນຢາເສບຕິດຢູ່ບັນດາຈຸດຫຼໍ່ແຫຼມໃນຂອບເຂດຄວາມຮັບຜິດຊອບຂອງຕົນດ້ວຍຄວາມເດັດຂາດ, ໂປ່ງໃສ ແລະ ເປັນມືອາຊີບ ເຮັດໃຫ້ສາມາດມ້າງ-ແກ້ໄຂຄະດີໄດ້ເປັນຈໍານວນຫຼາຍ; ຄະດີທີ່ພົ້ນເດັ່ນຫລ້າສຸດທີ່ເກີດຂຶ້ນຢູ່ບ້ານດອນໜູນໃນວັນທີ 23 ທັນວາ 2021 ຜ່ານມາ ທີ່ເຈົ້າໜ້າທີ່ສາມາດຈັບຜູ້ຖືກຫາໄດ້ 3 ຄົນ ພ້ອມທັງ ຢຶດຂອງກາງຢາບ້າໄດ້ 31.210 ເມັດ ແລະ ຊັບສິນທີ່ກ່ຽວຂ້ອງໄປສອບສວນ.
ພັທ ຄໍາມະນີ ແກ້ວສີຫາ ເປີດເຜີຍວ່າ: ຄະດີດັ່ງກ່າວເກີດຂຶ້ນໃນເວລາ 22:30 ໂມງຂອງວັນທີ 22 ທັນວາ 2021, ຂະນະທີ່ເຈົ້າໜ້າທີ່ ປກສ ກຸ່ມບ້ານໄຊ ແລະ ອົງການປົກຄອງບ້ານດອນໜູນເມືອງໄຊທາ ນີ ອອກກວດກາລາດຕາເວນຕາມຄວາມຮັບຜິດຊອບຢູ່ຕາມເສັ້ນທາງຮ່ອມ ໄດ້ເຫັນເປົ້າໝາຍມີທ່າທາງພິ ລຸດສົງໄສທີ່ກໍາລັງຄ້າຂາຍຢາເສບຕິດຢູ່ ຈຶ່ງໄດ້ນໍາໄປສອບສວນ ຈຶ່ງຮູ້ວ່າຜູ້ກ່ຽວ ຊື່ ທ້າວ ອາມີ ຫຼື ອັອດ ອາຍຸ 39 ປີ ຢູ່ບ້ານດອນໜູນ. ນອກນີ້, ຍັງພົບຂອງກາງປະເພດຢາບ້າ 210 ເມັດ. ຜ່ານການສອບສວນຂະຫຍາຍຜົນ ຈຶ່ງຈັບເປົ້າໝາຍຊື້-ຂາຍຢາເສບຕິດຕາມການຊັດທອດຂອງທ້າວ ອາມີ ໄດ້ອີກ 2 ຄົນຄື: ນາງ ໄຊພອນ ອາຍຸ 57 ປີ ມີຂອງກາງຢາບ້າ 1.000 ເມັດ ແລະ ທ້າວ ສາຍສະຫອນ ຫຼື ຄໍາຫຼ້າ ອາຍຸ 29 ປີ ຂໍ້ຫາເສບຢາເສບຕິດ ແລະ ປິດບັງການກະທໍາຜິດຂອງຄົນອື່ນ ເຊິ່ງທັງສອງເປັນແມ່ລູກກັນຢູ່ບ້ານດອນໜູນ.

ຈາກນັ້ນ, ເຈົ້າໜ້າທີ່ຈຶ່ງໄດ້ນໍານາງ ໄຊພອນ ໄປສອບສວນນໍາໄປສູ່ການຈັບທ້າວ ສຸບັນ ອາຍຸ 58 ປີ ຢູ່ບ້ານດອນໜູນ ໃນຂໍ້ຫາ ຄ້າຂາຍຢາເສບຕິດ ໂດຍພົບຂອງກາງປະເພດຢາບ້າ 30.000 ເມັດ, ເງິນ 150.000.000 ກີບ, 3.784.000 ບາດ, 24.000 ໂດລາ, ລົດໃຫຍ່ 3 ຄັນ, ວັດຖຸຄ້າຍຄືເງິນ ແລະ ຄໍາ ແລະ ໃບຕາດິນຈໍານວນໜຶ່ງ. ສໍາລັບທ້າວ ສຸບັນ ແມ່ນເປົ້າໝາຍຄ້າຂາຍຢາເສບຕິດທີ່ເຈົ້າໜ້າທີ່ຕິດ ຕາມການເຄື່ອນໄຫວມາໄດ້ 2 ປີ ແລ້ວ ຈົນມີຂໍ້ມູນຫຼັກຖານໜາແໜ້ນ ຈຶ່ງນໍາໄປສູ່ການຈັບກຸມໃນຄັ້ງນີ້.

ໃນການແກ້ໄຂຄະດີໄດ້ເຮັດຢ່າງຖືກຕ້ອງຕາມຫຼັກການວິຊາສະເພາະ ເປັນຕົ້ນເວລາຈັບ ຕ້ອງໃຫ້ມີຫຼັກຖານ ຫຼືວ່າມີຂອງກາງ, ມີຄວາມເດັດຂາດ ນໍາໃຊ້ມາດຕະການຕ່າງໆທີ່ກົດໝາຍໄດ້ກໍານົດໄວ້, ໃນເວ ລາໄລ່ນໍາ ຕ້ອງໃຫ້ມີຄວາມວອ່ງໄວ, ມີການຕັດສິນໃຈສູງ ແລະ ມີຄວາມໂປ່ງໃສຕໍ່ໜ້າທີ່ ໂດຍສະເພາະເວລາຈັບ-ກວດຄົ້ນຕົນຕົວ, ກວດຄົ້ນເຄຫາສະຖານ, ພາຫະນະແລະອື່ນໆຕ້ອງມີການຈັດຕັ້ງບ້ານເຂົ້າຮ່ວມ ພ້ອມທັງເຮັດບົດບັນທຶກ ແລະ ຖ່າຍຮູບຢູ່ກັບທີ່ ໂດຍຊ້ອງໜ້າຜູ້ຖືກຈັບຢ່າງລະອຽດ ເພື່ອຄວາມສະດວກໃນການປະກອບຂໍ້ມູນຫຼັກຖານໃສ່ສໍານວນຄະດີໃຫ້ເຮັດກຸມ ແລະ ແນໃສ່ໃຫ້ຜູ້ກະທໍາຜິດ ຖືກດໍາເນີນຄະດີຕາມຂັ້ນຕອນຂອງກົດໝາຍ.

ຂໍ້ມູນ: ຄວາມສະຫງົບ Lao Security News