ອາເມລິກາຍອມຮັບຖິ້ມລະເບີດໃສ່ເມືອງໂມຊຸນ ຈົນເຮັດໃຫ້ມີປະຊາຊົນເສຍຊີວິດກວ່າ 200 ຄົນ

      ສຳນັກຂ່າວຕ່າງປະເທດລາຍງານວັນທີ 26 ມີນານີ້ວ່າ: ສູນບັນຊາການກາງກອງທັບອາເມລິກາອອກຖະແຫລງການໃນວັນທີ 26 ມີນາວ່າ: ເປັນຜູ້ປະຕິບັດການໂຈມຕີທາງອາກາດຫລາຍເທ່ືອຢູ່ເບື້ອງຕາເວັນຕົກຂອງເມືອງໂມຊຸນ ລະຫວ່າງວັນທີ 17-23 ມີນາ 2017 ຈົນເຮັດໃຫ້ປະຊາຊົນຫລາຍກວ່າ 200 ຄົນເສຍຊີວິດ.

ສູນບັນຊາການກາງກອງທັບອາເມລິກາຢືນຢັນວ່າ: ການປະຕິບັດທາງທະຫານໃນເຂດດັ່ງກ່າວນັ້ນເປັນໄປຕາມການຮ່ວມມືກັບກອງທັບອີຣັກໃນສົງຄາມປາບປາມກຸ່ມລັດອິດສະລາມ (IS) ແລະ ລາຍງານກ່ຽວກັບຜູ້ເສຍຊີວິດທີ່ມີຈຳນວນຫລາຍ. ຖືເປັນເຫດການທີ່ໜ້າເສົ້າສະຫລົດໃຈຢ່າງຍິ່ງ ໂດຍໄດ້ມີຄຳສັ່ງໃຫ້ລະງັບການໂຈມຕີທາງອາກາດຢູ່ເຂດດັ່ງກ່າວຂອງເມືອງໂມຊຸນເປັນການຊົ່ວຄາວແລ້ວ.