ມາເລເຊຍເປີດຊາຍແດນໃນຮອບ 2 ປີ ຮັບນັກເດີນທາງສັກວັກຊີນປ້ອງກັນໂຄວິດຄົບ
ນັກທ່ອງທ່ຽວຊາວຕ່າງປະເທດທີ່ສັກວັກຊີນປ້ອງກັນໂຄວິດ-19 ຄົບແລ້ວ ສາມາດເດີນທາງເຂົ້າມາເລເຊຍໄດ້ທັງທາງບົກ, ທາງທະເລ ແລະ ທາງອາກາດ.
ວັນທີ 1 ເມສາ 2022, ສຳນັກຂ່າວຕ່າງປະເທດລາຍງານວ່າ: ການເປີດຊາຍແດນຢ່າງເຕັມຮູບແບບຄັ້ງທຳອິດໃນຮອບ 2 ປີຂອງມາເລເຊຍ ເກີດຂຶ້ນໃນວັນທີ 1 ເມສາ ໂດຍນັກທ່ອງທ່ຽວຊາວຕ່າງປະເທດທີ່ໄດ້ຮັບວັກຊີນປ້ອງກັນໂຄວິດ-19 ຢ່າງໜ້ອຍ 2 ເຂັມ ສາມາດເດີນທາງຂ້າມຈຸດຜ່ານແດນທັງທາງບົກ, ທາງອາກາດ ແລະ ທາງທະເລ ໂດຍບໍ່ຕ້ອງເຂົ້າສູ່ຂະບວນການກັກຕົວອີກຕໍ່ໄປ.
ທັງນີ້, ລັດຖະບານມາເລເຊຍຍອມຮັບວ່າ: ອຸດສາຫະກຳການທ່ອງທ່ຽວເຊິ່ງເປັນໜຶ່ງໃນແຫລ່ງສ້າງລາຍໄດ້ຫລັກຂອງປະເທດ ຟື້ນຕົວຊ້າເມື່ອບໍ່ມີການຮ່ວມຂັບເຄື່ອນຈາກນັກທ່ອງທ່ຽວຕ່າງປະເທດ. ຂະນະດຽວກັນ ຜູ້ປະກອບການໃນດ້ານນີ້ຕ້ອງການເວລາ ແລະ ຊັບພະຍາກອນ ເພື່ອຟື້ນຟູກິດຈະການຈົນສາມາດຍ່າງໄປທາງໜ້າໄດ້ອີກ ໂດຍພາກລັດ ແລະ ໜ່ວຍງານທີ່ກ່ຽວຂ້ອງ ຮ່ວມກັນປະເມີນການຮັບນັກທ່ອງທ່ຽວຢ່າງໜ້ອຍ 2 ລ້ານຄົນພາຍໃນປີນີ້.
