ໄກ່ເດືອຍທອງ ມາແຮງ ຈິກສາລະກາດົງເລະ ແຊງປືນໃຫຍ່ຂຶ້ນອັນດັບ 4

ການແຂ່ງຂັນບານເຕະ ພຣີເມຍລີກ ອັງກິດ ເມື່ອວັນອາທິດທີ 3 ເມສາ ທີ່ຜ່ານມາ ທັອດແນມ ຮັອດສະເປີ ຕ້ອງການຄະແນນເພື່ອລຸ້ນທັອບ 4 ທໍາອິດ. ເປີດຮັງ ທັອດແນມ ຮັອດສະເປີ ຮັບການມາຢາມຂອງ ນິວຄາສເຊິນ ໂດຍເກມນີ້ “ສາລິກາດົງ” ໄດ້ປະຕູຂຶ້ນນຳກ່ອນ 1-0 ໃນນາທີ 39 ຈາກ ຟາບຽນ ຊາ ແຕ່ນາທີ 43 ໄກ່ເດືອຍ ທອງຄຳ” ຕີສະເໝີ 1 -1 ໄດ້ສໍາເລັດຈາກການໂໝ່ງຂອງ ເບນ ເດວິສ ກ່ອນຈົບເຄິ່ງເວລາທໍາອິດດ້ວຍຜົນສະເໝີນີ້

ເຂົ້າສູ່ເຄິ່ງເວລາທີ່ສອງ “ໄກ່ເດືອຍທອງ” ໄດ້ປະຕູຂຶ້ນນໍາຢ່າງໄວວາ 2-1 ໃນນາທີ 48 ຂອງ ແມັດ ໂດເຮີຕີ ຫຼັງຈາກນັ້ນເຈົ້າຖິ່ນເດີນໜ້າບຸກແຫຼກ ກ່ອນທີ່ຈະຍິງເພີ່ມອີກ 3 ປະຕູ ຈາກ ຊອນ ເຮືອງມິນ ນາທີ 54 ເອເມສັນ ໂຣຢານ ນາທີ 63 ແລະ ສະຕີເວນ ເບີກໄວ ນາທີ 83, ຊ່ວງເວລາທີ່ເຫຼືອບໍ່ມີປະຕູເພີ່ມອີກ, ຈົບເກມ ທັອດແນມ ຮັອດສະເປີ ເປີດຮັງຖະຫຼົ່ມ ຂາດລອຍ 5-1 ເກັບ 54 ຄະແນນຈາກ 30 ນັດ ເລື່ອນຂຶ້ນມາຢູ່ອັນດັບທີ 4 ຂອງຕາຕະລາງ ໂດຍມີຄະແນນເທົ່າກັບ ອາເຊນອລ ແຕ່ປະຕູໄດ້ເສຍດີກວ່າ.

ຢ່າງໃດກໍ່ຕາມ, ພວກເຂົາຍັງແຂ່ງຫຼາຍກວ່າປືນໃຫຍ່ 2 ນັດ, ຂະນະທີ່ ນິວຄາສເຊິນ ແຂ່ງ ​​30 ນັດ ມີ 31 ຄະແນນ ຢູ່ອັນດັບ 15 ຂອງຕາຕະລາງ.