ເຊກອງ ແກ້ໄຂພາຫະນະທີ່ນໍາເຂົ້າບໍ່ຖືກຕ້ອງ ແລະ ນໍາໃຊ້ບໍ່ຖືກເປົ້າໝາຍໄດ້ 215 ຄັນ ເກັບພາສີໄດ້ 3,5 ຕື້ກວ່າກີບ
April 9, 2022 - 11:22 AM
ພາຍຫລັງປະຕິບັດຕາມຄຳສັ່ງຂອງນາຍົກລັດຖະມົນຕີກໍຄືຄຳແນະນຳຂອງລັດຖະມົນຕີກະຊວງການເງິນ ແລະ ການຕົກລົງຂອງເຈົ້າແຂວງໆເຊກອງໃຫ້ແກ້ໄຂພາຫະນະທີ່ນຳເຂົ້າບໍ່ຖືກຕ້ອງ ແລະ ນຳໃຊ້ບໍ່ຖືກເປົ້າໝາຍ, ເຈົ້າໜ້າທີ່ພາສີແຂວງເຊກອງ ສາມາດສະສາງໄດ້ເຖິງ 215 ຄັນ ຄິດເປັນເງິນພາສີ 3,5 ຕື້ກວ່າກີບ.
ທ່ານ ແກ້ວອຳພອນ ແສງນວນຈັນ ຫົວໜ້າພາສີປະຈຳແຂວງເຊກອງ ໃຫ້ສຳພາດວ່າ: ພວກເຮົາໄດ້ເລີ່ມປະຕິບັດແຕ່ກາງເດືອນພະຈິກ 2021 ແລະ ມາຮອດວັນທີ 31 ມີນາ 2022 ໂດຍຕາມການຂຶ້ນບັນຊີ 367 ຄັນ, ໃນນີ້ມີລົດໃຫຍ່ 176 ຄັນ ແລະ ລົດຈັກ 191 ຄັນ ສາມາດສະສາງໄດ້ 215 ຄັນ (ລົດໃຫຍ່ 143 ຄັນ, ລົດຈັກ 72 ຄັນ) ແລະ ເກັບຄ່າພາສີ-ອາກອນໄດ້ 3.576.171.500 ກີບ.
ແນວໃດກໍດີ ແຕ່ເດືອນເມສາຫາເດືອນມິຖຸນາ, ອົງການປົກຄອງແຂວງເຊກອງ ເນັ້ນໃຫ້ຄະນະກຳມະການຮັບຜິດຊອບ ເລັ່ງແກ້ໄຂບັນຫາການນຳເຂົ້າພາຫະນະທີ່ບໍ່ຖືກຕ້ອງເຊັ່ນລົດໃຫຍ່ 33 ຄັນ ແລະ ລົດຈັກ 119 ຄັນ ໃນໄລຍະຜ່ານມາໃຫ້ຂາດຕົວ.
