ສປປ ເກົາຫລີ ສະຫລອງທ່ານ ກິມຈອງອຸນ ເປັນຜູ້ນຳພັກຄົບ 10 ປີ

ສປປ ເກົາຫລີ ເຊີດຊູການເປັນຜູ້ນຳ ແລະ ຜົນງານຂອງທ່ານ ກິມຈອງອຸນ ລວມທັງເຜີຍແຜ່ຮູບຖ່າຍໃໝ່ ແລະ ນິເທດສະການເນື່ອງໃນວາລະທີ່ທ່ານເປັນເລຂາທິການໃຫຍ່ພັກແຮງງານທີ່ເປັນພັກລັດຖະບານຄົບ 10 ປີ.

ທ່ານ ກິມຈອງອຸນ ຖືວ່າຂຶ້ນປົກຄອງ ສປປ ເກົາຫລີ ນັບແຕ່ໄດ້ຮັບການສະເໜີຊື່ເປັນຜູ້ບັນຊາການສູງສຸດຂອງກອງທັບ ຫລັງຈາກທ່ານ ກິມຈອງອິນ ຜູ້ເປັນບິດາເສຍຊີວິດໃນເດືອນທັນວາ 2011 ໂດຍມື້ນີ້ເປັນວັນຄົບ 10 ປີທີ່ທ່ານໄດ້ຮັບເລືອກເປັນເລຂາທິການໃຫຍ່ພັກແຮງງານ ແລະ ຜູ້ນຳປະເທດ. ທ່ານ ໂຊຣອງແຮ ຄະນະກຳມາທິການຖາວອນແຫ່ງສະມັດຊາປະຊາຊົນສູງສຸດຂອງ ສປປ ເກົາຫລີ ກ່າວໃນກອງປະຊຸມແຫ່ງຊາດວັນທີ 11 ເມສານີ້ ຍົກຍ້ອງທ່ານ ກິມຈອງອຸນ ວ່າ: ເປັນນັກຄິດ ແລະ ນັກທິດສະດີທີ່ມີພອນສະຫວັນ, ເປັນລັດຖະບູລຸດທີ່ໂດດເດັ່ນ ແລະ ເປັນຜູ້ບັນຊາການຍິ່ງໃຫຍ່ທີ່ໄຮ້ຜູ້ສະເໝີເໝືອນ. ສ່ວນສື່ທາງການ ສປປ ເກົາຫລີ ເຜີຍແຜ່ພາບຖ່າຍຢ່າງເປັນທາງການພາບໃໝ່ຂອງທ່ານ ກິມຈອງອຸນ ໃນວັນທີ 10 ເມສາ ແລະ ລາຍງານວ່າ: ພິພິຕະພັນໃນນະຄອນຫລວງພຽງຢາງໄດ້ເປີດນິເທດສະການໃໝ່ທີ່ຈັດສະແດງຜົນງານການເປັນຜູ້ນຳທີ່ເປັນນິລັນດອນຂອງທ່ານ ກິມຈອງອຸນ.

ສປປ ເກົາຫລີ ຈະຈັດງານສະຫລອງໝົດອາທິດນີ້, ໜຶ່ງໃນນັ້ນຈະມີການລະນຶກເຖິງວັນຄ້າຍວັນເກີດປີທີ 110 ຂອງທ່ານ ກິມອິນຊຸງ ຜູ້ສ້າງຕັ້ງປະເທດ ແລະ ປູ່ຂອງທ່ານ ກິມຈອງອຸນ ໃນວັນທີ 15 ເມສາ. ພາບຖ່າຍດາວທຽມທາງການຄ້າເຫັນທະຫານ ສປປ ເກົາຫລີ ຊ້ອມຂະບວນສວນສະໜາມທີ່ອາດຈະມີຂຶ້ນໃນອາທິດນີ້.