ເກີດມາເພື່ອສິ່ງນີ້, 60 ແຮັດທຣິກ ແລະ 13 ສະຖິຕິສຸດຍອດຂອງ ໂຣນັລໂດ

ເຖິງຈະມີຜົນງານທີ່ຂຶ້ນໆລົງໆກັບ ແມນເຊສເຕີ ຢູໄນເຕັດ ແຕ່ ຄຣິສຕຽນໂນ ໂຣນັລໂດ ຍັງສ້າງຊື່ສຽງໃນຖານະຈອມຖະຫລົ່ມປະຕູໂຕເກ່ັງໄດ້ຄືເກ່ົາ.

ນັບເປັນຄັ້ງທີສອງທີ່ດາວຍິງຊາວໂປຣຕຸເກສຫວນກັບມາສວມຊຸດຂອງແມນຢູ ແລະ ລາວສະແດງໃຫ້ເຫັນວ່າຍັງເປັນທີ່ເພິ່ງພາໃນຍາມຍາກໃຫ້ກັບຕົ້ນສັງກັດໄດ້ສະເຫມີ.

ຈາກເກມຫລ້າສຸດໃນພຣີເມຍລີກ ດາວຍິງອາຍຸ 37 ປີ ຮັກສາຄວາມຫວັງໃນການຄວ້າອັນດັບສີ່ຂອງທີມໄດ້ຕໍ່ໄປດ້ວຍການເຫມົາ 3 ປະຕູຊ່ວຍໃຫ້ ຜີແດງ ເອົາຊະນະ ນໍຣິສ ທີມທ້າຍຕາຕະລາງໄປໄດ້ແບບໃຈຫາຍໃຈຂວ້ຳ 3-2.

ຈາກຜົນງານດັ່ງກ່າວ ເຮັດໃຫ້ມີການເປີດເຜີຍວ່າ ເປັນແຮັດທຣິກ ຄັ້ງທີ 60 ແລ້ວ ທີ່ລາວເຮັດໄດ້ນັບຕັ້ງແຕ່ເລີ່ມຕົ້ນອາຊີບນັກເຕະ ໂດຍແບ່ງເປັນເກມລະດັບສະໂມສອນ 50 ຄັ້ງ ແລະ ເກມລະດັບຊາດ 10 ຄັ້ງ.

ແນວໃດກໍດີ 60 ແຮັດທຣິກຂອງ ໂຣນັລໂດ ຍັງເຕັມໄປດ້ວຍສະຖິຕິອີກຫລວງຫລາຍດັ່ງນີ້ :

1. 60 ແຮັດທຣິກ ແບ່ງເປັນການລົງຫລົິນໃຫ້ ຣິລ ມາດຣິດ 44 ຄັ້ງ, ແມນເຊສເຕີ ຢູໄນເຕັດ 3 ຄັ້ງ, ຢູເວນຕູສ 3 ຄັ້ງ ແລະ ທີມຊາດ ໂປຣຕຸເກສ 10 ຄັ້ງ.
2. ເປັນນັກເຕະຄົນທີ 6 ທີ່ເຮັດ ແຮັດທຣິກໄດ້ໃນເກມໃນບ້ານຂອງພຣີເມຍລີກສອງນັດຕິດຕໍ່ກັນ ແລະ ເປັນນັກເຕະຄົນດຽວຂອງແມນຢູຄົນດຽວເທົ່ານັ້ນ.
3. ລົງຫລິິ້ນລະດັບອາຊີບມາທັງຫມົດ 1,117 ນາທີ ໂຣນັລໂດ ມີສະຖິຕິເຮັດແຮັດທຣິກໄດ້ໃນທຸກໆ 18,6 ເກມ.
4. ສູນຫນ້າໂປຣຕຸເກສ ເຮັດແຮັດທຣິກແບບເພີເຟັກໄດ້ທັງຫມົດ 9 ຄັ້ງ ຈາກການໃຊ້ຕີນຂວາ, ຕີນຊ້າຍ ແລະ ຫົວ ຍິງປະຕູໃນເກມດຽວກັນ.
5. 50 ແຮັດທຣິກກັບສະໂມສອນຂອງ ໂຣນັລໂດ ແບ່ງໄດ້ເປັນເກມໃນ ລາ ລີກາ 34 ແຮັດທຣິກ, ເກມພຣີເມຍລີກ 3 ແຮັດທຣິກ, ເກມ ເຊເຣຍອາ 2 ແຮັດທຣິກ, ເກມ ແຊ໊ມປຽນລີກ 8 ແຮັດທຣິກ,​ ເກມໂກປາ ເດລ ເຣ 2 ແຮັດທຣິກ ແລະ ເກມ ສະໂມສອນໂລກ 1 ແຮັດທຣິກ.
6. ຍິງແຮັດທຣິກຫລາຍທີ່ສຸດ 10 ຄັ້ງ ໃນເກມລະດັບຊາດ ແລະ ບໍ່ມີໃຜຍິງແຮັດທຣິກໃນແຊ໊ມປຽນລີກ ຫລາຍກວ່າລາວອີກແລ້ວ.
7. ເຮັດແຮັດທຣິກໄດ້ຫລາຍກວ່າ ລີໂອເນລ ເມສຊີ ເຊິ່ງຍິງ 3 ໜ່ວຍໃນເກມດຽວກັນໃຫ້ ບາເຊໂລນາ ໄດ້ 48 ຄັ້ງ ແລະ ກັບທີມຊາດອາເຈນຕີນາອີກ 7 ຄັ້ງ ລວມເປັນ 55 ຄັ້ງ.
8. ຍິງແຮັດທຣິກໄດ້ 30 ຄັ້ງ ກ່ອນມີອາຍຸຄົບ 30 ປີ ເມື່ອເດືອນກຸມພາ 2015 ແລະ ຍິງເພີ່ມອີກ 30 ແຮັດທຣິກ ນັບຈາກວັນນັ້ນ ຂະນະທີ່ ເມສຊີ ເຮັດໄດ້ 14 ແຮັດທຣິກ ຂະນະມີອາຍຸຄົບ 30 ປີເມື່ອເດືອນມິຖຸນາ 2017.
9. ນັບຕັ້ງແຕ່ມີອາຍຸຄົບ 30 ປີ ໂຣນັລໂດ ຍິງແຮັດທຣິກຫລາຍກວ່ານັກເຕະຢ່າງ ຫລຸຍ ຊົວເຣສ, ເຊີຄີໂອ ອາເກວໂຣ, ເທຍຣີ ອອງຣີ ແລະ ຊະລາຕັນ ອິບຣາຮີໂມວິດ ຍິງ 3 ໜ່ວຍລວມກັນຕະຫລອດອາຊີບນັກເຕະຂອງພວກເຂົາອີກ.
10. ຍິງແຮັດທຣິກໄດ້ຢ່າງຫນ້ອຍຫນຶ່ງຄັ້ງໃນ 14 ຈາກ 15 ປີຫລັງ ໂດຍຄັ້ງສຸດທ້າຍທີ່ລາວຍິງແຮັດທຣິກບໍ່ໄດ້ເກີດຂຶ້ນໃນປີ 2009.
11. ໂຣນັລໂດ ຍິງປະຕູໄດ້ຫລາຍກວ່າ 20 ໜ່ວຍຕໍ່ເນື່ອງເຖິງ 16 ປີຕິດຕໍ່ກັນແລ້ວ ນັບແຕ່ລາວເຮັດໄດ້ຕັ້ງແຕ່ລະດູການ 2006/07 ເປັນຕົ້ນມາ.
12. ເປັນນັກເຕະຄົນທຳອິດທີ່ມີອາຍຸຫລາຍກວ່າ 36 ປີທີ່ຍິງໄດ້ຫລາຍກວ່າ 15 ປະຕູໃນພຣີເມຍລີກລະດູການດຽວ.
13. ເປັນນັກເຕະຫມາຍເລກ 7 ຂອງແມນຢູຄົນທຳອິດທີ່ຍິງປະຕູໄດ້ຫລາຍກວ່າ 20 ປະຕູຂຶ້ນໄປໃນລະດູການດຽວ ນັບແຕ່ລາວຍິງໄດ້ 26 ປະຕູໃຫ້ກັບແມນຢູ ລະດູການ 2008/09.