ລະບົບສາທາລະນະສຸກສີລັງກາອາດລົ້ມສະຫລາຍ ເພາະພິດວິກິດເສດຖະກິດ ຮຽກຮ້ອງນາໆຊາດເລັ່ງຊ່ວຍເຫລືອ
ວັນທີ 18 ເມສາ, ແພດໃນໂຮງໝໍຫລາຍແຫ່ງຂອງສີລັງກາເຜີຍ ລະບົບສາທາລະນະສຸກສີລັງກາອາດລົ້ມສະຫລາຍ ເນື່ອງຈາກພິດວິກິດເສດຖະກິດທີ່ຮຸນແຮງສຸດໃນຮອບຫລາຍທົດສະວັດ, ຫລາຍພື້ນທີ່ປະສົບການຂາດເຂີນຢາ, ອຸປະກອນ ແລະ ເຄື່ອງມືທາງການແພດ ຮຽກຮ້ອງນາໆຊາດເລັ່ງສົ່ງມອບການຊ່ວຍເຫລືອ.
ດ້ານສະມາຄົມແພດຂອງສີລັງກາລະບຸ ຢາ, ຢາສະຫລົບ, ອຸປະກອນທີ່ໃຊ້ໃນການປູກຖ່າຍອະໄວຍະວະ ລວມທັງການຫຍິບບາດແພເລີ່ມເຂົ້າສູ່ສະພາບຂາດເຂີນ ໂດຍສະເພາະໂຮງໝໍໃນນະຄອນຫລວງໂກລຳໂບ ລະບົບສາທາລະນະສຸກກຳລັງຈະລົ້ມສະຫລາຍ ຖ້າບໍ່ໄດ້ຮັບການຊ່ວຍເຫລືອ ເຊິ່ງສີລັງກາເປັນປະເທດທີ່ໃຫ້ບໍລິການດ້ານສາທາລະນະສຸກຂັ້ນພື້ນຖານຟຣີແກ່ປະຊາຊົນ ຈຶ່ງມີປະຊາຊົນຈຳນວນຫລາຍລ້ານຄົນໄດ້ຮັບຜົນກະທົບໂດຍກົງຈາກສະຖານະການຍາກລຳບາກທີ່ສີລັງກາກຳລັງຜະເຊີນ.
ໂດຍເຈົ້າໜ້າທີ່ທາງດ້ານການແພດທັງຫລາຍໄດ້ຮັບຄຳເຕືອນຈາກທາງລັດຖະບານ ຫ້າມໃຫ້ສຳພາດເຖິງສະຖານະການທີ່ເກີດຂຶ້ນກັບສື່ສາທາລະນະໂດຍພະລະການ ເຊິ່ງອະນຸຍາດໃຫ້ຜູ້ແທນສະມາຄົມ ແລະ ຜູ້ອຳນວຍການຂອງໂຮງໝໍຕ່າງໆ ຮັບຜິດຊອບໜ້າທີ່ດັ່ງກ່າວ ເນື່ອງຈາກຢ້ານສະຖານະການລຸກລາມ ແລະ ຮ້າຍແຮງຕື່ມ.
ນອກຈາກນີ້, ຍັງມີເຈົ້າໜ້າທີ່ທາງດ້ານການແພດຈຳນວນບໍ່ໜ້ອຍຮ່ວມຂະບວນປະທ້ວງ ຮຽກຮ້ອງໃຫ້ລັດຖະບານສີລັງກາຮັບຜິດຊອບ ແລະ ເລັ່ງແກ້ໄຂບັນຫາໂດຍໄວທີ່ສຸດ. ພ້ອມເນັ້ນວ່າ: ວິຊາຊີບແພດບໍ່ໄດ້ເລືອກຝັກຝ່າຍໃນທາງການເມືອງ, ແຕ່ເຮົາຄຳນຶງເຖິງຜູ້ປ່ວຍຂອງເຮົາເປັນອັນດັບທຳອິດ, ເຮົາອອກມາສະແດງພະລັງ ເພາະຕ້ອງການຈະປິ່ນປົວພວກເຂົາ ບໍ່ຢາກໃຫ້ພວກເຂົາຕ້ອງເສຍຊີວິດ.
ອ້າງອີງ:
- https://www.bbc.com/news/world-asia-61111405
- https://www.france24.com/en/live-news/20220416-sri-lanka-declares-5-day-share-trading-halt-over-crisis
- https://www.aljazeera.com/news/2022/4/11/sri-lanka-doctors-warn-of-catastrophic-deaths-amid-shortages
