ກອງປະຊຸມຄົບຄະນະບໍລິຫານງານພັກ ກະຊວງການເງິນຄັ້ງທີ 6 ສະໄໝທີ III ເນັ້ນວຽກງານພັດທະນາບຸກຄະລາກອນຕິດພັບກັບການແກ້ໄຂພະນັກງານເຫຼືອບໍ່ພໍ
ໃນວັນທີ 18 ເມສາ 2022 ຜ່ານມານີ້, ກະຊວງການເງິນ ໄດ້ດຳເນີນກອງປະຊຸມຄົບຄະນະບໍລິຫານງານພັກ ຄັ້ງທີ 6 ສະໄໝທີ III ຂອງອົງຄະນະພັກກະຊວງການເງິນ, ໂດຍການເປັນປະທານຂອງສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກ,ລັດຖະມົນຕີກະຊວງການເງິນ, ມີບັນດາສະຫາຍຄະນະປະຈຳພັກ,ກຳມະການຄະນະພັກ, ຄະນະພັກຮາກຖານ, ໜ່ວຍພັກຮາກຖານ, ຄະນະພັກ ແລະ ຄະນະນຳແຕ່ລະຂັ້ນຂອງກະຊວງການເງິນເຂົ້າຮ່ວມ.
ໃນກອງປະຊຸມຄົບຄະນະບໍລິຫານງານພັກ ຄັ້ງທີ 6 ສະໄໝທີ III ຂອງອົງຄະນະພັກກະຊວງການເງິນ, ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດການປັບປຸງກົງຈັກການຈັດຕັ້ງຂອງກະຊວງການເງິນ,ສະພາບການຈັດຕັ້ງປະຕິບັດວຽກງານພັດທະນາບຸກຄະລາກອນຕິດພັບກັບການແກ້ໄຂພະນັກງານເຫຼືອບໍ່ພໍ ແລະ ສະຫຼຸບຕີລາຄາການຈັດຕັ້ງປະຕິບັດແຜນງົບປະມານແຫ່ງລັດປະຈໍາງວດທີ I ຂອງປີ 2022, ທິດທາງແຜນການງວດ II ປີ 2022. ພ້ອມທັງໄດ້ໄດ້ຮັບຟັງການຜ່ານບົດສະຫຼຸບຕີລາຄາສະພາບການປັບປຸງກົງຈັກການຈັດຕັ້ງຂອງກະຊວງການເງິນ ແລະ ໄດ້ພ້ອມກັນປະກອບຄຳຄິດເຫັນໃສ່ບົດສະຫຼຸບດັ່ງກ່າວເພື່ອໃຫ້ມີຄວາມໝາຍຄົບຖ້ວນຂຶ້ນກວ່າເກົ່າ.
ໂອກາດດັ່ງກ່າວ, ສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກ, ລັດ ຖະມົນຕີກະຊວງການເງິນ, ໄດ້ໃຫ້ກຽດໂອ້ລົມກ່ອນອື່ນສະຫາຍໄດ້ສະແດງຄວາມຊົມເຊີຍຕໍ່ບັນດາສະຫາຍທີ່ໄດ້ເຊີດຊູຄວາມເປັນເຈົ້າການຄວາມຮັບຜິດຊອບສູງ, ສຸມທຸກສະຕິປັນຍາເຂົ້າໃນການຄົ້ນຄິດ, ວິໄຈບັນຫາ ແລະ ປະກອບຄຳຄິດຄຳເຫັນຢ່າງກົງໄປກົງມາເຮັດໃຫ້ສາມາດສະຫຼຸບຕີລາຄາຍົກໃຫ້ເຫັນໄດ້ສະພາບຄວາມເປັນຈິງດ້ານຕັ້ງໜ້າ, ສິ່ງທີ່ພົ້ນເດັ່ນເພື່ອເສີມຂະຫຍາຍ ແລະ ແກ້ໄຂບັນຫາຂໍ້ຄົງຄ້າງ, ສິ່ງທ້າທາຍ ແລະ ຄວາມຫຍຸ້ງຍາກທາງດ້ານເສດຖະກິດ-ການເງິນ ງົບ ປະມານເພື່ອຫາວິທີໃນການປັບປຸງ ແລະ ແກ້ໄຂໄປຕາມທິດນຳຂອງພັກ ແລະ ລັດຖະບານກໍຄືກະຊວງການເງິນຈະຕ້ອງໄດ້ປະຕິບັດຕາມແຜນດຳເນີນງານທັງວຽກພັກ-ລັດ ແລະ ບັນດາຄາດໝາຍທີ່ວາງໄວ້ໂດຍສະເພາະວຽກງານຈຸດສຸມໃນປີ 2022 ເພື່ອໃຫ້ບັນດາສະຫາຍເອົາໃຈໃສ່ຢ່າງມີຈຸດສຸມ ແລະ ເພີ່ມທະວີບັນດາມາດຕະການຕົ້ນ: ເພີ່ມທະວີການເມືອງ-ແນວຄິດໃຫ້ແກ່ຄະນະພັກຄະນະນຳ, ສະມາຊິກພັກ-ພະນັກງານຫຼັກແຫຼງ ແລະ ທຸກຂັ້ນຂອງຂະແໜງການເງິນທັງສູນກາງ ແລະ ທ້ອງຖິ່ນໃຫ້ມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ໄດ້ຮັບມອບໝາຍ, ຄະນະບໍລິຫານພັກກະຊວງ, ຄະນະແຕ່ລະຂັ້ນ ແລະ ສະມາຊິກພັກແຕ່ລະສະຫາຍຕ້ອງໄດ້ສືບຕໍ່ຈັດຕັ້ງຜັນຂະຫຍາຍຄຳສັ່ງເລກທີ 01 ຂອງກົມການເມືອງສູນການພັກ, ລົງວັນທີ 03 ມັງກອນ 2018 ວ່າດ້ວຍການເພີ່ມທະວີກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ເອົາໃຈໃສ່ຈັດຕັ້ງປະຕິມະຕິວ່າດ້ວຍການເພີ່ມທະວີການນຳພາຂອງພັກ,ເພື່ອສ້າງການຫັນປ່ຽນຢ່າງແຂງແຮງ ແລະ ເລິກເຊິງສະບັບເລກທີ 04/ຄບສພ, ລົງວັນທີ 30 ກັນຍາ 2021 ຄຳສັ່ງວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ ເລກທີ 18/ນຍ, ລົງວັນທີ 16 ກັນຍາ 2021, ເອົາໃຈໃສ່ສ້າງທ່າຫັນປ່ຽນໃໝ່ອັນແຂງແຮງ, ເລິກເຊິ່ງ ແລະ ຮອບດ້ານ, ສຸມໃສ່ປັບປຸງພັດທະນາ ແລະ ນຳໃຊ້ເຕັກໂນໂລຊີຫັນເປັນທັນສະໄໝ, ເພື່ອຂຸດຄົ້ນ ແລະ ເສີມຂະຫຍາຍຄວາມສາມາດບົ່ມຊ້ອນ, ສຸມໃສ່ວາລະແຫ່ງຊາດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ທົບທວນຄືນ ແລະ ຄົ້ນຄວ້າລະອຽດບັນດານິຕິກໍາ, ນະໂຍບາຍທີ່ມີໃນປັດຈຸ ບັນໃຫ້ສອດຄ່ອງເພື່ອແກ້ໄຂບັນຫາຕ່າງໆ,ເພີ່ມທະວີວຽກງານການບັນຊີ, ການກວດກາພາຍໃນຕິດພັນກັບຜົນຂອງການກວດສອບແຫ່ງລັດ ໂດຍສະເພາະແມ່ນການແກ້ໄຂຜົນການກວດສອບໃຫ້ທັນການ ແລະ ເປັນຮູບປະທຳ, ເອົາໃຈໃສ່ຊຸກຍູ້, ແນະນຳຫົວໜ່ວຍງົບປະມານ, ບັນດາວິສາຫະກິດໃຫ້ຖືບັນຊີຕາມກົດໝາຍ ແລະ ເພີ່ມທະວີວຽກງານຕິດຕາມກວດກາ ການນຳໃຊ້ປະມານຂອງລັດຢ່າງເຂັ້ມງວດ. ພ້ອມດຽວກັນນີ້, ຕ້ອງສະກັດກັ້ນ ແລະ ຕ້ານການສໍ້ລາດບັງຫຼວງ, ປັບປຸງລະບົບການຈັດຕັ້ງຂອງຂະແໜງການເງິນໂດຍສຸມໃສ່ປັບປຸງດ້ານກົງຈັກຂອງ 3 ຂະແໜງການສາຍຕັ້ງ ແລະ ຈັດວາງບຸກຄະລາກອນໃຫ້ສອດຄ່ອງກັບວຽກ, ເອົາໃຈໃສ່ແກ້ໄຂ້ພະນັກງານເຫຼືອບໍ່ພໍ, ປັບປຸງພາລະບົດບາດຂອງພະແນກ ການເງິນ, ນະຄອນຫຼວງ, ເມືອງ, ນະຄອນ, ເທດສະບານໃຫ້ສຳເລັດ.
ໂອກາດນີ້, ສະຫາຍບຸນໂຈມ ອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະ ມົນຕີກະຊວງການເງິນ ຍັງໄດ້ຮຽກຮ້ອງມາຍັງບັນດາສະຫາຍຄະນະພັກ, ຄະນະນໍາແຕ່ລະຂັ້ນມີການບັນຊາຊີ້ນຳໂດຍກົງສ້າງກຳລັງແຮງຂອງຕົນໂດຍມີການວາງແຜນພັດທະນາບຸກຄະລາກອນຂອງຕົນໃນໄລຍະສັ້ນ ແລະ ໄລຍະຍາວໃຫ້ມີຄວາມຮູ້ຄວາມສາ ມາດແນໃສ່ປະຕິບັດວຽກງານການເງິນ, ເພື່ອຮັບໃຊ້ການຂະຫຍາຍຕົວຂອງເສດຖະກິດ-ສັງຄົມຢ່າງມີປະສິດທິຜົນພ້ອມກັນປະຕິບັດແຜນງົບປະມານປະຈຳປີ 2022 ໃຫ້ໄດ້ຕາມລະດັບຄາດໝາຍທີ່ວາງໄວ້.
