ສ້າງລັດແຫ່ງອຳນາດນິຕິບັນຍັດສັງຄົມນິຍົມ, ໂດຍປະຊາຊົນ, ເພື່ອປະຊາຊົນ

ວິທະຍຸກະຈາຍສຽງຫວຽດນາມລາຍງານວ່າ: ວັນທີ 18 ເມສາ 2022 ຢູ່ຮ່າໂນ້ຍ, ທ່ານ ຫງວຽນ ຊວນ ຟຸກ ປະທານປະເທດຫວຽດນາມ, ຫົວໜ້າຄະນະຊີ້ນຳການສ້າງແຜນຮ່າງຍຸດທະສາດກ່ຽວກັບການສ້າງລັດແຫ່ງອຳນາດນິຕິບັນຍັດສັງຄົມນິຍົມຮອດປີ 2030, ກຳນົດທິດຮອດປີ 2045 ເປັນປະທານກອງປະຊຸມຄັ້ງທີ 2 ຂອງຄະນະຊີ້ນຳ ໂດຍມີທ່ານ ຟ້າມ ມິງຈິງ ນາຍົກລັດຖະມົນຕີ ຫວຽດນາມ, ຮອງປະທານຄະນະຊີ້ນຳ, ທ່ານ ເວືອງ ດິ່ງເຫ້ວ ປະທານສະພາແຫ່ງຊາດ, ຮອງຫົວໜ້າຄະນະຊີ້ນຳ ເຂົ້າຮ່ວມ.

ທ່ານ ຫງວຽນ ຊວນຟຸກ ກ່າວຕໍ່ກອງປະຊຸມດັ່ງກ່າວ ໂດຍໄດ້ຍ້ອງຍໍ, ຕີລາຄາສູງບັນດາອົງການທີ່ໄດ້ພະ ຍາຍາມປະຕິບັດໜ້າທີ່ຕາມການມອບໝາຍຄືສະພາແຫ່ງຊາດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ກະຊວງຕຳຫລວດ, ສະພາທິດສະດີສູນກາງ…ໄດ້ປຶກສາຫາລືຫລາຍເທື່ອເພື່ອຮັບຟັງຄຳເຫັນຊີ້ນຳບັນດາອົງການ, ນັກຊ່ຽວຊານກ່ຽວກັບການຮ່າງແຜນ ເຊິ່ງສະມາຊິກຄະນະຊີ້ນຳຫລາຍທ່ານໄດ້ຕິດຕາມຢ່າງໃກ້ຊິດ, ເປັນເຈົ້າການ, ປະກອບຄຳເຫັນຫລາຍເທື່ອກ່ຽວກັບຂໍ້ຫົວສະເພາະ. ພິເສດ, ບັນດາສະມາຊິກໜ່ວຍຮຽບຮຽງສ້າງຮ່າງແຜນຄັ້ງທີ 1 ໄດ້ສະເໜີຕໍ່ວາລະປະຊຸມຄະນະຊີ້ນຳ.

ທ່ານ ຫງວຽນ ຊວນ ຟຸກ ໄດ້ສະເໜີໃຫ້ບັນດາສະມາຊິກຄະນະຊີ້ນຳປະກອບຄຳເຫັນໃສ່ ໂຄງປະກອບແຜນຮ່າງ; ສະພາບການສ້າງລັດແຫ່ງອຳນາດຕິນິບັນຍັດໃນໄລຍະຜ່ານມາລວມທັງໝາກຜົນທີ່ບັນລຸໄດ້, ສິ່ງຈຳກັດ, ສາເຫດ ແລະ ຄາດຄະເນສະພາບການ ແນໃສ່ກ້າວໄປສູ່ການສ້າງລັດແຫ່ງອຳນາດນິຕິບັນຍັດສັງຄົມນິຍົມຫວຽດນາມ ໂດຍປະຊາຊົນ, ເພື່ອປະຊາຊົນ. ແຜນຮ່າງຈະໄດ້ສະເໜີຕໍ່ກົມການເມືອງ, ຄະນະເລຂາສູນກາງພັກທີ່ຈະເຖິງນີ້.