ເປແອສເຊ ກຽມປ່ອຍ ເນມາ ອອກຈາກທີມ ເຖິງຈະຂາດທຶນມະຫາສານກໍຕາມ

ປາຣີສ ແຊັງ ແຊັກແມັງ ກຽມປ່ອຍຕົວ ເນມາ ກອງຫນ້າຊຸບເປີສະຕາອອກຈາກທີມໃນຕະຫລາດນັກເຕະລະດູການນີ້ ເຖິງຈະຂາດທຶນເກີນເຄິ່ງກໍຕາມ.

ສຳລັບ ເນມາ ຍ້າຍຈາກບາເຊໂລນາ ມາຢູ່ກັບ ເປແອສເຊ ເມື່ອປີ 2017 ດ້ວຍຄ່າຕົວລະດັບສະຖິຕິໂລກ 198 ລ້ານປອນ.

ໂດຍນັກເຕະອາຍຸ 30 ປີ ຍິງໄປແລ້ວ 98 ປະຕູຈາກການລົງສະຫນາມ 141 ເກມໃນທຸກລາຍການ ເຖິງປານນັ້ນລາວກໍຍັງບໍ່ສາມາດພາທີມບັນລຸເປົ້າໝາຍສູງສຸດນັ້ນກໍຄືການຄວ້າແຊ໊ມຢູຟາ ແຊ໊ມປຽນລີກ ມາຄອງໄດ້.

ຫລ້າສຸດ ສື່ໃນສະເປນລາຍງານວ່າ : ເປແອສເຊ ຈະມີການຜ່າຕັດທີມຄັ້ງໃຫຍ່ໃນລະດູການນີ້ ແລະ ສ່ວນຫນຶ່ງໃນແຜນຄືການປ່ອຍ ເນມາ ອອກຈາກທີມ.

ສື່ຊື່ດັງລະບຸວ່າ : ເປແອສເຊ ພ້ອມຂາຍຜູ້ຫລິ້ນທີມຊາດບຣາຊິລໃນລາຄາຂັ້ນຕຳ່ພຽງ 76 ລ້ານປອນ ນັ້ນຫມາຍຄວາມວ່າ ຫາກການຊື້ຂາຍເກີດຂຶ້ນແທ້ ພວກເຂົາຈະຂາດທຶນເຖງ 122 ລ້ານປອນ.