ມາເລເຊຍຍົກເລີກໃສ່ຜ້າປິດປາກ ເປີດປະເທດເຕັມຮູບແບບ

ມາເລເຊຍຍົກເລີກບັງຄັບໃສ່ຜ້າປິດປາກນອກອາຄານ, ນັກເດີນທາງທີ່ສັກວັກຊີນຄົບບໍ່ຕ້ອງສະແດງຜົນກວດໂຄວິດ, ຈຳນວນຜູ້ຕິດເຊື້ອແຕ່ລະວັນໃນປະເທດເຫລືອຫລັກພັນ.
ວັນທີ 28 ເມສາ 2022, ສຳນັກຂ່າວແຊນແນລນິວເອເຊຍ ລາຍງານວ່າ: ມາເລເຊຍໄດ້ຍົກເລີກມາດຕະການປ້ອງກັນພະຍາດໂຄວິດ-19 ສ່ວນຫລາຍ ເລີ່ມວັນທີ 1 ພຶດສະພາ 2022 ໂດຍຈະຍົກເລີກການບັງຄັບໃສ່ຜ້າປິດປາກນອກອາຄານ, ການກວດພະຍາດນັກເດີນທາງທີ່ສັກວັກຊີນຄົບໂດສ ແລະ ບໍ່ຈຳເປັນຕ້ອງມີປະກັນໄພການເດີນທາງ ເພື່ອຈະເດີນທາງເຂົ້າມາເລເຊຍ, ແຕ່ປະຊາຊົນຍັງຕ້ອງໃສ່ຜ້າປິດປາກຖ້າຢູ່ໃນອາຄານເຊັ່ນ: ຮ້ານສັບພະສິນຄ້າ ແລະ ລະບົບຂົນສົ່ງສາທາລະນະ ແລະ ຍັງແນະນຳໃຫ້ໃສ່ຜ້າປິດປາກຖ້າຢູ່ໃນພື້ນທີ່ແອອັດ.
ທ່ານ ໄຄຣີ ຈາມາລຸດດິນ ລັດຖະມົນຕີສາທາລະນະສຸກຂອງມາເລເຊຍ ປະກາດວ່າ: ຈະຍົກເລີກການກວດພະຍາດໂຄວິດ-19 ທັງກ່ອນ ແລະ ຫລັງການເດີນທາງເຂົ້າມາເລເຊຍຂອງນັກເດີນທາງທີ່ສັກວັກຊີນຄົບໂດສ, ຜູ້ທີ່ເຊົາຈາກພະຍາດໂຄວິດ 6 ເຖິງ 60 ວັນກ່ອນເດີນທາງ ແລະ ເດັກອາຍຸຕໍ່າກວ່າ 12 ປີ. ສ່ວນຜູ້ທີ່ຍັງສັກວັກຊີນບໍ່ຄົບໂດສຈະຍັງຕ້ອງສະແດງຜົນກວດພະຍາດໂຄວິດ-19 ແລະ ເຂົ້າສູ່ຂະບວນການກັກຕົວເປັນເວລາ 5 ວັນ. ນອກຈາກນີ້ ຍັງໄດ້ຍົກເລີກການໃຊ້ແອັບພລິເຄຊັນຕິດຕາມຕົວເພື່ອເຊັກອິນເຂົ້າສະຖານທີ່ຕ່າງໆ ມີພຽງຜູ້ຕິດພະຍາດໂຄວິດ-19 ເທົ່ານັ້ນທີ່ຈະຕ້ອງສັງເກດອາການຢູ່ເຮືອນ ແລະ ບໍ່ອະນຸຍາດໃຫ້ເດີນທາງເຂົ້າສະຖານທີ່.
ມາເລເຊຍໄດ້ເລີ່ມເປີດປະເທດຢ່າງເຕັມຮູບແບບເມື່ອວັນທີ 1 ເມສາ 2022 ຫລັງຈາກຕ້ອງປິດຊາຍແດນເພື່ອສະກັດພະຍາດໂຄວິດ-19 ເປັນເວລາ 2 ປີ, ສ່ວນສະຖານະການການແພ່ລະບາດໃນປະເທດຕົວເລກຜູ້ຕິດເຊື້ອໂດຍລວມເລີ່ມຫລຸດລົງເລື້ອຍໆຢູ່ປະມານ 3.000 ຄົນຕໍ່ວັນ.
ອ້າງອີງ: CNA