ໂອຊຸລລີແວນ ເຂົ້າຊີງກັບ ທຣຳ ໃນການແຂ່ງຂັນສະນຸກເກີຊີງແຊ໊ມໂລກ

ຣອນນີ ໂອຊຸລລີແວນ ເອົາຊະນະ ຈອນ ຮິກກິນ ຜ່ານເຂົ້າຮອບຊີງຊະນະເລີດສະນຸກເກີ ຊີງແຊ໊ມໂລກ 2022 ໄປພົບກັບ ຈັດ ທຣຳ ທີ່ເອົາຊະນະ ມາກ ເຈ ວິລລຽມ.

ການແຂ່ງຂັນສະນຸກເກີຊີງແຊ໊ມໂລກ 2022 ທີ່ນະຄອນຄຣູຊິເບິລ ເທຍເຕີ ເມືອງເຊຟຟິລ ປະເທດອັງກິດ ເມື່ອວັນທີ 30 ເມສາທີ່ຜ່ານມາ ເປັນຮອບຮອງຊະນະເລີດ ດ້ວຍລະບົບຊະນະ 17 ໃນ 33 ເຟຣມ ຄູ່ທີ່ຫນ້າສົນໃຈ ຣອນນີ ໂອຊຸລລີແວນ ອະດີດແຊ໊ມໂລກ 6 ສະໄຫມ ຈາກອັງກິດ ພົບກັບ ຈອນ ຮິກກິນ ອະດີດແຊ໊ມໂລກ 5 ສະໄຫມ ຈາກສະກັອດແລນ ໂດຍ 2 ເຊສຊັນທຳອິດ ຣອນນີ ນຳຢູ່ 10-6 ເຟຣມ.

ຜົນປາກົດວ່າ ຣອນນີ ຜົນງານຍັງຮ້ອນແຮງຫລັງເອົາຊະນະໄປດ້ວຍ 17-11 ເຟຣມ ຜ່ານເຂົ້າຮອບຊີງຊະນະເລີດຂອງລາຍການນີ້ເປັນຄັ້ງທີ 8 ແລະ ມີໂອກາດຄວ້າແຊ໊ມໂລກເປັນສະໄຫມທີ 7 ທຽບເທົ່າສະຖິຕິສູງສຸດທີ່ ສະຕີເຟັນ ເຮນດຣີ ຕຳນານນັກສະນຸກເກີຈາກສະກັອດແລນເຄີຍເຮັດໄວ້.

ໂດຍຄູ່ແຂ່ງໃນຮອບຊີງຊະນະເລີດຂອງ ໂອຊຸລລີແວນ ນັ້ນກໍຄື ຈັດ ທຣຳ ອະດີດແຊ໊ມໂລກ 1 ສະໄຫມຈາກອັງກິດທີ່ເອົາຊະນະ ມາກ ເຈ ວິລລຽມ ອະດີດແຊ໊ມໂລກ 3 ສະໄຫມຈາກເວລ 17-16 ເຟຣມ.

ທັງນີ້ ຮອບຊີງຊະນະເລີດຈະແຂ່ງໂດຍໃຊ້ລະບົບ ຊະນະ 17 ໃນ 35 ເຟຣມ ແລະ ແບ່ງເປັນ 4 ເຊສຊັນ ໂດຍ 2 ເຊສຊັນ ຈະແຂ່ງວັນທີ 1 ພຶດສະພາ ສ່ວນອີກ 2 ເຊສຊັນ ຈະແຂ່ງວັນທີ 2 ພຶດສະພາ ຕາມເວລາບ້ານເຮົາ.