ສະຫະພັນບານເຕະອັງກິດກຽມສອບ ຮີໂຣ ເອຟເວີຕັນ ທີ່ພາທີມຊະນະ ເຊລຊີ ໃນພຣີເມຍລີກ

ຄວັນຫລົງການແຂ່ງຂັນບານເຕະພຣີເມຍລີກ ອັງກິດ ເຊິ່ງ ເອຟເວີຕັນ ເປີດບ້ານຊະນະ ເຊລຊີ 1-0 ເຮັດໃຫ້ ເອຟເວີຕັນ ເກັບເພີ່ມເປັນ 32 ຄະແນນ ຈາກ 33 ນັດ ຄອງອັນດັບ 18 ສ່ວນ ເຊລຊີ ມີ 66 ຄະແນນ ຄອງອັນດັບ 3 ຄືເກ່ົາ.

ລະຫວ່າງການແຂ່ງຂັນນາທີ 46 ຣິຊາລິສັນ ກອງຫນ້າທີ່ຍິງປະຕູໃຫ້ກັບທີມ ເອຟເວີຕັນ ໄດ້ສຳເລັດ ກໍສະຫລອງກັບຫມູ່ຮ່ວມທີມຕາມປົກກະຕິ ກ່ອນຈະແລ່ນເຂົ້າມາຢິບພຸທີ່ແຟນບານເອຟເວີຕັນ ຂວ້າງລົງມາໃນສະຫນາມ ແລະ ກໍຂວ້າງກັບຂຶ້ນໄປເທິງອັດສະຈັນແຟນບານທີມຕົວເອງ.

ຫລ້າສຸດ ເດິກາດຽນ ສື່ຊື່ດັງຂອງອັງກິດລາຍງານວ່າ ເຖິງວ່າ ເຄວິນ ເຟຣັນ ຜູ້ຕັດສິນຂອງເກມດັ່ງກ່າວບໍ່ໄດ້ລົງໂທດ ຣິຊາລິສັນ ແຕ່ທາງສະມາຄົມບານເຕະ ອັງກິດ (FA) ກໍບໍ່ໄດ້ນິ້ງນອນໃຈ ພວມກວດເລັ່ງສອບເຫດການດັ່ງກ່າວ ສ່ວນໂຄສົກຂອງເອຟເວີຕັນ ເປີດເຜີຍວ່າ ‘‘ ເຮົາຈະພິຈາລະນາເລື່ອງນີ້ ແຕ່ເທົ່າທີ່ເຮົາກວດສອບ ລາວພຽງພະຍາຍາມຈະໂຍນພຸອອກນອກສະຫນາມ ’’.

ສຳລັບ ເອຟເວີຕັນ ພວມສຸ່ມສ່ຽງຕໍ່ການຕົກຊັ້ນຈາກລີກສູງສຸດຂອງອັງກິດເປັນຄັ້ງທຳອິດໃນຮອບ 68 ປີ ຫລັງຈາກຕອນນີ້ມີພຽງ 32 ຄະແນນ ຈາກ 33ນັດ ຄອງອັນດັບ 18 ໃນພຣີເມຍລີກ ຕາມຫລັງ ເບີນລີ ທີມອັນດັບ 16 ແລະ ລິດ ຢູໄນເຕັດ ທີມອັນດັບ 17 ທີີ່ຢູ່ໃນເຂດປອດໄພຢູ່ 2 ຄະແນນ ແລະ ເຫລືອຕາຕະລາງແຂ່ງຂັນອີກພຽງ 6 ນັດເທົ່ານັ້ນ.