ປະທານ ສນຊ ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານ ຢູ່ແຂວງວຽງຈັນ
May 3, 2022 - 3:22 PM
ເມື່ອບໍ່ດົນມານີ້, ທ່ານ ສິນລະວົງ ຄຸດໄພທູນ ກໍາມະການກົມການເມືອງສູນ ກາງພັກ ປະທານສູນກາງແນວລາວສ້າງຊາດ (ສນຊ) ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນ ໂດຍໄດ້ຮັບການຕ້ອນຮັບຈາກ ທ່ານ ຄໍາພັນ ສິດທິດຳພາ ກໍາມະການສູນກາງພັກ ເຈົ້າແຂວງວຽງຈັນ, ທ່ານ ເທບພະໄທ ແກ້ວເຂັມເພັດ ຄະນະປະຈໍາພັກ ປະທານແນວລາວສ້າງຊາດແຂວງ ພ້ອມດ້ວຍຄະນະ.
ໃນໂອກາດນີ້ ທ່ານເຈົ້າແຂວງວຽງຈັນ ໄດ້ລາຍງານສະພາບລວມຂອງແຂວງ ໂດຍຫຍໍ້ ໃຫ້ປະທານສູນກາງແນວລາວສ້າງຊາດຮັບຊາບ ໂດຍສະເພາະການພັດທະນາເສດຖະກິດ – ສັງຄົມ ຢູ່ແຂວງວຽງຈັນ ເປັນຕົ້ນບັນດາໂຄງການພັດທະນາແຂວງ, ການຜະລິດກະສິກໍາ, ການທ່ອງທ່ຽວ, ການພັດທະນາພື້ນ ຖານໂຄງລ່າງ ທີ່ພົ້ນເດັ່ນຄື: ຂະບວນການປູກເຂົ້າ, ຕົ້ນໄມ້ໃຫ້ໝາກ, ຜັກປອດສານພິດ, ການລ້ຽງງົວ, ສັດປີກ ແລະ ສິນຄ້າສົ່ງອອກຈໍານວນໜຶ່ງ. ພ້ອມນີ້, ທ່ານເຈົ້າແຂວງຍັງໄດ້ລາຍງານສະພາບການປະຕິບັດຂະບວນການຕ້ານ, ສະກັດກັ້ນ ແລະ ແກ້ໄຂການແຜ່ລະບາດຂອງພະຍາດໂຄວິດ-19, ການສັກຢາວັກຊິນ ພາຍໃນແຂວງ. ຈາກນັ້ນ, ທ່ານປະທານສູນກາງແນວລລາວສ້າງຊາດ ກໍໄດ້ມີຄໍາເຫັນຊົມເຊີຍຕໍ່ການນໍາພາຊີ້ນໍາຂອງຄະນະປະຈໍາພັກແຂວງ ໃນການຜັນຂະຫຍາຍມະຕິ XI ຂອງພັກເຂົ້າສູ່ຊີວິດຕົວຈິງ ແລະ ໄດ້ແຈ້ງຈຸດປະສົງໃນການມາເຄື່ອນໄຫວຢ້ຽມຢາມຄັ້ງນີ້ ແລະ ໄດ້ພົບປະໂອ້ລົມກັບພະນັກງານຫຼັກແຫຼ່ງຂອງເມືອງໂພນໂຮງ, ເມືອງເຟືອງ, ປະຊາຊົນກຸ່ມບ້ານ ໂພນສະຫວາດ ແລະ ທ່ານໄດ້ມີຄໍາເຫັນໂອ້ລົມ ໂດຍໄດ້ເນັ້ນໃສ່ວຽກງານແນວລາວສ້າງຊາດເປັນຕົ້ນ: ຄວາມໝາຍຂອງແຕ່ລະປະໂຫຍກຄໍາຂວັນກອງປະຊຸມໃຫຍ່ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ, 4 ການຫັນປ່ຽນໃໝ່ໃນຂົງເຂດວຽກງານແນວໂຮມ, ການຜັນຂະຫຍາຍ 4 ຮ່ວມ, ໄດ້ຍົກໃຫ້ເຫັນເຖິິງທັດສະນະຂອງພັກຕໍ່ວຽກງານແນວໂຮມ ແລະ ວຽກງານມະຫາຊົນໄລຍະໃໝ່ໂດຍໄດ້ເນັ້ນໃສ່ບັນດາແຜນງານໂຄງການທີ່ໄດ້ຮັບຮອງ ໃນມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງແນວລາວສ້າງຊາດ. ຈາກນັ້ນ, ຄະນະໄດ້ໄປຢ້ຽມຢາມພື້ນຖານວັດທະ ນະທຳ ຢູ່ເມືອງວຽງຄໍາ ແລະ ເມືອງເຟືອງ, ຢ້ຽມຢາມຊຸກຍູ້ຄອບຄົວຕົວແບບໃນການຜະລິດກະສິກໍາປູກຕົ້ນໄມ້ໃຫ້ໝາກ, ຄອບຄົວຕົວແບບລ້ຽງງົວເປັນສິນ ຄ້າ, ຢ້ຽມຊົມຫໍມູນເຊື້ອຕົ້ນແຕ້ຈາລຶກຄວາມແຄ້ນ.
