ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ

ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ - mother newborn hospital vientiane 14 - ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ
ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ - Untitled design - ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ

ສະບັບແລ້ວນີ້, ໜັງສືພີມລາວພັດທະນາພວກເຮົາໄດ້ສະເໜີກ່ຽວກັບບັນຫາ ທີ່ຜູ້ປະກັນສັງຄົມສາມາດຮ້ອງຮຽນເຖິງກອງທຶນ ຫລື ໂຮງໝໍໃນກໍລະນີບໍ່ໄດ້ຮັບຄວາມຍຸຕິທໍາຕໍ່ການໃຊ້ບໍລິການປິ່ນປົວທີ່ດີ ແລະ ໃນສະບັບມື້ນີ້ຈະສະເໜີຕື່ມກ່ຽວກັບ 8 ຜົນປະໂຫຍດຕົ້ນຕໍທີ່ຜູ້ປະກັນຈະໄດ້ຮັບຫລັງຈາກເຂົ້າເປັນສະມາຊິກກອງທຶນຄື: (1) ອຸດ​ໜູນ​ອຸປະຕິ​ເຫ​ດ​ແຮງ​ງານ ​​​ແມ່ນ​ການ​ໃຫ້ການ​ຄຸ້ມ​ຄອງ​ຜູ້​ເປັນ​ສະມາຊິກ​ຫາກ​ມີ​ການ​ເຈັບ​ເປັນ​ຍ້ອນ​ການ​ປະຕິບັດວຽກ​ງານແຕ່​ເບົາ​ໄປ​ຫາ​ໜັກຈົນ​ຮອດ​ເສຍ​ຊີວິດ​ຍ້ອນ​ອຸປະຕິ​ເຫດ, ໂດຍຈະ​​ຄຸ້ມ​ຄອງນັບຕັ້ງ​ແຕ່​ເຂົ້າ​ໂຮງໝໍ​, ທັງມີ​ເງິນ​ທົດ​ແທນ​ການ​ຂາດ​ລາຍ​ໄດ້​ໃນໄລຍະ​ຟື້ນ​ຟູ​ສຸຂະພາບ​ຢູ່​ເຮືອນ ຫລື ​ເສຍ​ອົງຄະຍ້ອນ​ອຸປະຕິ​ເຫດ, ​ຈະຄິດ​ໄລ່ເງິນ​ເດືອນ​ຜູ້​ເສຍ​ອົງຄະ​ໃຫ້​ກິນ​ຕະຫລອດ​ຊີວິດ ຫລື ຖ້າກໍລະນີ​ມີ​ການ​ເສຍ​ຊີວິດ​ກໍ​ມີ​ເງິນ​ມ້ຽນຄາບ​ສົ່ງສະການ ​ແລະ ​ເງິນຊ່ວຍເຫລືອ​ຄອບຄົວ​ເຂົາ​ເຈົ້າຕາມ​ລະບຽບ​ການ​ຂອງ​ປະກັນ​ສັງຄົມ. (2) ອຸດ​ໜູນ​ປິ່ນປົວ​ສຸຂະພາບ ​ແມ່ນ​ການ​ສະໜອງ​ການ​ປິ່ນປົວ​ໃນ​ຍາມ​ທີ່​ເກີດ​ມີ​ການ​ເຈັບ​ເປັນ​ຍ້ອນ​ພະຍາດ​ຂອງ​ຕົນ​ເອງ ການ​ປິ່ນປົວ​ໃນ​ລະບົບ​ປະກັນ​ສັງຄົມ​ນີ້​ແມ່ນຄຸ້ມ​ຄອງ​​ທັງ​ຜູ້​ທີ່​ເປັນ​ສະມາຊິກ, ຄູ່​ສົມລົດ ​ແລະ ລູກ​, ປັດຈຸບັນສະ​ເພາະ​ລູກ​ທີ່ອາຍຸ​ເກີນ 18-23 ປີຫາກ​ຍັງ​ເປັນ​ນັກ​ສຶກສາ ປະກັນ​ສັງຄົມ​ກໍ​ຍັງ​ໃຫ້ການ​ຄຸ້ມ​ຄອງ​ການ​ປິ່ນປົວ​ສຸຂະພາບ​ເຊັ່ນ​ດຽວ​ກັນ​, ການ​ປິ່ນປົວ​ສຸຂະພາບໃນ​ລະບົບ​ປະກັນ​ສັງຄົມ​ນີ້​ແມ່ນປິ່ນປົວ​ໃຫ້​ດີ, ປິ່ນປົວ​ໃຫ້​ເຊົາບໍ່​ຈຳກັດ​ວົງເງີ​ນ ແລະ ບໍ່​ຈຳ​ກັດ​ຈຳນວນ​ຄັ້ງ​​​ໃນ​ການ​ປິ່ນປົວ. (3) ອຸດ​ໜູນ​ອອກລູກ ຫລື ຫລຸ​ລູກ ແມ່ນ​ການຈ່າຍ​ເງິນ​ໃຫ້​ກັບ​ຜູ້​ທີ່​ເປັນ​ສະມາຊິກ​ເພດ​ຍິງຫລັງ​ເກີດ​ລູກ​ ຫລື ຫລຸ​ລູກ ທີ່​ມີ​ອາຍຸ​ຖືພາ 3 ​ເດືອນ​ຂຶ້ນ​ໄປຈຳ​ເປັນ​ຕ້ອງ​ໄດ້​ພັກຜ່ອນ​ຟື້ນ​ຟູ​ສຸຂະພາບ ອິງ​ຕາມ​ກົດໝາຍ​ເປັນ​ໄລຍະ​ເວລາ 3-5 ​ເດືອນ ປະກັນ​ສັງຄົມ​ຈະຄິດ​ໄລ່​ເງິນ​ອຸດ​ໜູນ​ໃຫ້ຈໍານວນ 80% ​ແລະ ຍັງ​ມີ​ເງິນ​ບຳ​​ເນັດອອກລູກອີກ 60% ຂອງ​ເງິນ​ເດືອນ​ປະກັນ​ຕົນຕໍ່​ລູກ​ໜຶ່ງ​ຄົນຖ້າ​ເກີດ​ລູກ​ແຝດ​ແມ່ນ​ຄູນ​ຕາມ​ຈຳນວນ​ລູກ​ (ຜູ້​ຊາຍ​ທີ່​ເມຍ​ເປັນ​ແມ່​ເຮືອນ​ບໍ່​ມີ​ລາຍ​ຮັບ​ຫາກ​ວ່າ​ເມຍ​​ເກີດ​ລູກ​ກໍ​ສາມາດ​ຂໍ​ຮັບ​ເງິນ​ບຳ​ເນັດ​ອອກລູກ​ໄດ້​ເຊັ່ນ​ດຽວ​ກັນ). (4) ອຸດ​ໜູນ​ປ່ວຍ​ການ ​ແມ່ນ​ການ​ສະໜອງ​ເງິນ​ທົດ​ແທນ​ການ​ຂາດ​ລາຍ​ໄດ້ໃຫ້​ກັບສະມາຊິກ​ຜູ້​ທີ່​ພັກຜ່ອນ​ຟື້ນ​ຟູສຸຂະພາບ​ ເນື່ອງ​ຈາກ​ວ່າ​ເຈັບ​ເປັນ​ຍ້ອນ​ບັນ​ຫາ​ສຸຂະພາບ ຫລື ​ເກີດ​ອຸປະ​ຕິ​ເຫດທີ່ມີ​ການ​ຢັ້ງຢືນ​ຈາກ​ໂຮງໝໍ ​ແມ່ນ​ສາມາດ​ມາ​ຂໍ​ຮັບ​ເງິນ​ອຸດ​ໜູນປ່ວຍ​ການ​ກັບ​ປະກັນ​ສັງຄົມ​ໄດ້, ເຊິ່ງ​ຈ່າຍ​ໃຫ້​70% ຂອງ​ເງິນ​ເດືອນ​ປະກັນ​ຕົນ ອີງ​ຕາມຈຳນວນ​ມື້​ພັກ​ທີ່​ແພດ​ກຳນົດ ​ແລະ ສູງ​ສຸດ​ບໍ່​ເກີນ 1 ປີ, ຫາກ​ຍັງ​ສືບ​ຕໍ່​ເຈັບ​ເປັນ​ສາມາດ​ຮັບ​ນະ​ໂຍບາຍ​ອື່ນ​ຈາກ​ປະກັນ​ສັງຄົມ. (5) ອຸດ​ໜູນ​ບຳນານ ​ແມ່ນ​ການຈ່າຍເງິນ​ເດືອນບຳນານ​ໃຫ້​ສະມາຊິກ​​ຜູ້​ທີ່​ມີ​ອາຍຸຄົບ​ກະສຽນ​ຄື: ຜູ້​ຊາຍ 60 ປີ, ແມ່ຍິງ 55 ປີ, ໂດຍມີ​ການ​ຢັ້ງຢືນ​ຈາກ​ການຈັດ​ຕັ້ງ​ທີ່​ກ່ຽວຂ້ອງ ແລະ ມີ​ປີ​ການ​ຄົບ​ຕາມ​ລະບຽບການ, ຖ້າ​ຄົບ​ເງື່ອນ​ໄຂ​ດັ່ງກ່າວ​ກໍ​ຈ່າຍ​ເງິນ​ບຳນານ​ໃຫ້​ເປັນ​ລາຍ​ເດືອນ, ພ້ອມ​ໃຫ້ສິດ​ປິ່ນປົວ​ສຸຂະພາບ​ໃນ​ຕອນ​ທີ່​ເປັນ​ຜູ້​ບຳນານ​ໄປ​ຕະຫລອດ​ຊີວິດ, ຖ້າ​ມີ​ການ​ເສຍ​ຊີວິດກໍມີ​​ເງິນ​ມ້ຽນຄາບ​ສົ່ງສະການ ​ແລະ ​ເບິ່ງ​ແຍງ​ຄອບຄົວ​ໃຫ້​ຕື່ມອີກ. (6) ອຸດ​ໜູນ​ເສຍ​ຊີວິດ ​ແມ່ນການ​ສະໜອງ​​ເງິນອຸດ​ໜູນ​ມ້ຽນຄາບ​ສົ່ງສະການ ​ແລ​ະ ​ເງິນ​ອຸດ​ໜູນ​ຄອບຄົວ​ຕາມ​ປີ​ການ​ທີ່ຜູ້​ເສຍ​ຊີວິດ​ຈ່າຍ​ເງິນ​ສົມທົບ​ເຂົ້າ​ກອງ​ທຶນ, ຖ້າ​ມີ​ການ​ຢັ້ງຢືນ​ການເສຍ​ຊີວິດ​ເກີດ​ຂຶ້ນບໍ່​ວ່າ​ຈະ​ເປັນຈາກ​ໂຮງໝໍ ຫລື ການຈັດ​ຕັ້ງກ່ຽວຂ້ອງຜູ້​ທີ່​ເປັນ​ສະມາຊິກ​ປະກັນ​ສັງຄົມ​ເອງ, ຄູ່​ສົມລົດ ຫລື ລູກ​ທີ່​ຕ່ຳ​ກ່ວາ 18 ປີ​ນັ້ນ ປະກັນ​ສັງຄົມ​ກໍມີ​ການ​ສະໜອງ​ເງິນ​ໃຫ້​ຄອບຄົວ​ເຂົາ​ເຈົ້າ​ຕາມ​ລະບຽບ​ການ ລວມ​ໄປ​ເຖິງ​ຜູ້​ທີ່​ຮັບເງິນ​ເດືອນ​ເສຍ​ອົງຄະ ​ແລະ ຜູ້​ຮັບ​ເງິນ​ບຳນານ​ກໍມີ​ສິດຮັບ​ເງິນ​ອຸດ​ໜູນ​ເສຍ​ຊີວິ​ດ ຈາກ​ປະກັນ​ສັງຄົມ​​ໄດ້​ເຊັ່ນ​ກັນ​. (7) ອຸດ​ໜູນສະມາຊິກ​ຄອບຄົວ​ຜູ້​ເສຍ​ຊີວິດ ​ສືບ​ເນື່ອງມາຈາກ​ອຸດ​ໜູນ​​ເສຍ​ຊີວິດ​ນັ້ນຫລັງ​ຈາກ​ທີ່​ສະມາຊິກ​ຜູ້ປະກັນ​ຕົນ​ເສຍ​ຊີວິດ​ໄປ​ແລ້ວ ຮັບ​ເງິນ​ອຸດ​ໜູນ​ເສຍ​ຊີວິດ​ໄປ​ແລ້ວ​ຕໍ່​ມາປະກັນ​ສັງຄົມ​ຍັງ​ໃຫ້ການ​ຄຸ້ມ​ຄອງສະມາຊິກ​ຄອບຄົວ​ຂອງ​ຜູ້​ປະກັນ​ຕົນ​ຄື: ຄູ່​ສົມລົດ ​ແລະ ລູກ​ທີ່​ຕ່ຳ​ກ່ວາ 18ປີ ສາມາດ​ມາ​ຂໍ​ຮັບ​ເງິນ​ອຸດ​ໜູນ​ສະມາຊິກ​ຄອບຄົວ​ໄດ້​ເປັນ​ລາຍ​ເດືອນຕາມ​ລະບຽບ​ການ​ຂອງ​ປະກັນ​ສັງຄົມ ແລະ (8) ອຸດ​ໜູນຫ​ວ່າງງານ ຜູ້​ເປັນ​ສະມາຊິກ​ປະກັນ​ສັງຄົມ​ຫາກ​​ເກີດ​ມີ​ການຫ​ວ່າງ​ງານຕາມ​ເງື່ອນ​ໄຂ​ຂອງ​ປະກັນ​ສັງຄົມຄື: ມີ​ການຫວ່າງງານດ້ວຍ​ເຫດຜົນຈາກ​ຫົວໜ່ວຍ​​ທຸລະ​ກິດ​ທີ່​ເຮັດ​ວຽກ​ຢູ່​ນັ້ນ​ຖືກ​ປະກາດ​ລົ້ມ​ລະລາຍບໍ່​ສາມາດ​ເຄື່ອນ​​ໄຫວທຸລະ​ກິດ​ໄດ້​ອີກ​ຕໍ່​ໄປ ຫລື ອີກ​ເງື່ອນ​ໄຂ​ແມ່ນ​ວິ​ສາ​ຫະກິດ​ທີ່​ເຮັດ​ວຽກ​ຢູ່​ນັ້ນ​ຈຳ​ເປັນ​ຕ້ອງ​ໄດ້​ລົດຈຳນວນ​ແຮງ​ງານ​ລົງ​​ເນື່ອງ​ຈາກ​ມີ​ວິ​ກິດ​ທາງ​ດ້ານ​​ເງິນ ​ໂດຍມີ​ການ​ຢັ້ງຢືນ​ຈາກ​ພາກສ່ວນ​ກ່ຽວຂ້ອງ​ແມ່ນ​ສາມາດ​ມາ​ຂໍ​ຮັບ​ເງິນ​ອຸດໜູນຫວ່າງ​ງານ​ກັບ​ປະກັນ​ສັງຄົມ​ໄດ້ ​ໃນ​ໄລຍະ​ລໍຖ້າ​ຊອກ​ວຽກ​ເຮັດ​​​ໃໝ່.

ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ - Wave100S AD to Website 2020 0 - ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ
ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ - WhatsApp Image 2020 05 27 at 5 - ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ
ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ - WhatsApp Image 2020 05 27 at 5 - ຜົນປະໂຫຍດຂອງຜູ້ປະກັນສັງຄົມທີ່ຈະໄດ້ຮັບ
error: Alert: ເນື້ອຫາຂ່າວມີລິຂະສິດ !!