8.800 ແມັດ ! ຈີນຕັ້ງສະຖານີກວດວັດແທກອາກາດສູງສຸດໃນໂລກ

ວັນທີ 4 ພຶດສະພາ 2022, ຄະນະນັກວິໄຈທາງວິທະຍາສາດຂອງຈີນຕັ້ງສະຖານີເຝົ້າຕິດຕາມທາງອຸຕຸນິຍົມວິທະຍາອັດຕະໂນມັດ ໃນຄວາມສູງເໜືອລະດັບນ້ຳທະເລ 8.800 ແມັດ ເທິງພູໂຊໂມລັງມາ ບໍລິເວນຊາຍແດນຈີນ-ເນປານ ເຊິ່ງຖືເປັນສະຖານີປະເພດດັ່ງກ່າວທີ່ຕັ້ງຢູ່ສູງທີ່ສຸດໃນໂລກ.
ສະຖາບັນວິໄຈທີ່ຮາບສູງທິເບດ ສັງກັດສະຖາບັນບັນດິດວິທະຍາສາດຈີນ ລະບຸວ່າ: ສະຖານີແຫ່ງໃໝ່ໄດ້ທົດແທນສະຖານີທີ່ຕັ້ງຢູ່ສູງເໜືອລະດັບນ້ຳທະເລ 8.430 ແມັດ ບໍລິເວນຕອນໃຕ້ຂອງພູໂຊໂມລັງມາ ເຊິ່ງຕັ້ງຂຶ້ນໂດຍຄະນະນັກວິທະຍາສາດຂອງອັງກິດ ແລະ ອາເມລິກາ ເມື່ອປີ 2019.
ລາຍງານລະບຸວ່າ: ມີການຕັ້ງສະຖານີເຝົ້າຕິດຕາມທາງອຸຕຸນິຍົມວິທະຍາແບບລາດຊັນເທິງພູໂຊໂມລັງມາຈຳນວນ 8 ແຫ່ງແລ້ວ ເມື່ອນັບລວມສະຖານີແຫ່ງໃໝ່ນີ້ ເຊິ່ງຖືເປັນໜຶ່ງໃນພັນທະກິດຫລັກຂອງການສຳຫລວດທາງວິທະຍາສາດອັນຄວບຄຸມຮອບດ້ານຄັ້ງໃໝ່ຂອງຈີນເທິງຍອດພູໂຊໂມລັງມາທີ່ມີຄວາມສູງຫລາຍທີ່ສຸດໃນໂລກ.
ທ່ານ ຈ້າວຫົວປຽວ ນັກວິໄຈປະຈຳສະຖາບັນວິໄຈທີ່ຮາບສູງທິເບດ ລະບຸວ່າ: ຂໍ້ມູນອຸຕຸນິຍົມວິທະຍາຈາກການເຝົ້າຕິດຕາມຈະຊ່ວຍສະໜັບສະໜູນການວິໄຈທາງວິທະຍາສາດ ແລະ ກິດຈະກຳປີນພູ.
ອີກຢ່າງໜຶ່ງ, ການສຳຫລວດທາງວິທະຍາສາດອັນຄວບຄຸມຮອບດ້ານຄັ້ງໃໝ່ເທິງພູໂຊໂມລັງມາ ຖືເປັນສ່ວນໜຶ່ງຂອງການສຳຫລວດເພື່ອການວິໄຈທາງວິທະຍາສາດເທິງບ່ອນຮາບສູງຊິງໄຫ່-ທິເບດ ຄັ້ງທີ 2 ຂອງຈີນ.
ອ້າງອີງ: ສຳນັກຂ່າວຊິນຮົວ