ປະຢັດໃນມື້ນີ້ເພື່ອສຸຂີໃນວັນໜ້າ

- 275366141 254270343569797 6469740354050193523 n - ປະຢັດໃນມື້ນີ້ເພື່ອສຸຂີໃນວັນໜ້າ
- AGL - ປະຢັດໃນມື້ນີ້ເພື່ອສຸຂີໃນວັນໜ້າ

ໂດຍ: ທິດກໍ່າ

ການປະຢັດແມ່ນໜຶ່ງໃນຫລາຍໆມາດຕະການເພື່ອເລັ່ງລັດປະຕິບັດວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ. ໃນກອງປະຊຸມລັດຖະບານສະໄໝສາມັນປະຈຳເດືອນເມສາ 2022 ເຊິ່ງໄດ້ເປີດຂຶ້ນຢ່າງເປັນທາງການໃນຕອນເຊົ້າຂອງວັນທີ 26 ເມສາ ແລະ ໄດ້ປິດລົງໃນວັນທີ 27 ເມສາ 2022 ພາຍໃຕ້ການເປັນປະທານຂອງທ່ານ ພັນຄຳ ວິພາວັນ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ ແລະ ຜູ້ຕາງໜ້າຈາກບັນດາກະຊວງເຂົ້າຮ່ວມຢ່າງພ້ອມພຽງ.

ໃນກອງປະຊຸມຄັ້ງນີ້, ໜຶ່ງໃນຫລາຍໆບັນຫາສຳຄັນທີ່ກ່ຽວພັນເຊື່ອມໂຍງເຖິງໜ້າວຽກໃນເດືອນພຶດສະພາ 2022 ອີກອັນໜຶ່ງກໍຄື ເຫັນດີໃຫ້ສືບຕໍ່ປະຕິບັດນະໂຍບາຍປະຢັດ ໂດຍສະເພາະແມ່ນການປະຢັດລາຍຈ່າຍບໍລິຫານ, ລາຍຈ່າຍສຳລັບການຈັດຊື້-ຈັດຈ້າງ ຖ້າບໍ່ຈຳເປັນແທ້ກໍຄວນເລື່ອນໄປກ່ອນ. ສຳລັບການເຄື່ອນໄຫວວຽກງານຢູ່ຕ່າງປະເທດກໍເໝືອນກັນ ຖ້າບໍ່ຈຳເປັນແທ້ໆກໍອາດມອບໃຫ້ເອກອັກຄະລັດຖະທູດຂອງ ສປປ ລາວ ທີ່ຢູ່ປະເທດນັ້ນໆເຂົ້າຮ່ວມແທນ ຫລື ເຂົ້າຮ່ວມໃນຮູບແບບກອງປະຊຸມທາງໄກ ແລະ ພ້ອມກັນນັ້ນ, ກໍຮີບຮ້ອນຈັດຕັ້ງປະຕິບັດດຳລັດວ່າດ້ວຍລົດຂອງລັດໃຫ້ເປັນຮູບປະທຳໂດຍໄວ. ນີ້ຄືທາງອອກສ່ວນໜຶ່ງໃນການປະຢັດທີ່ພັກ ແລະ ລັດຖະບານວາງອອກ ເຊິ່ງບັນຫາຕ່າງໆມັນກໍກ່ຽວພັນໄປເຖິງມາດຕະການປະຕິບັດວາລະແຫ່ງຊາດກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ.

ດັ່ງທີ່ຮູ້ນຳກັນແລ້ວວ່າ, ການປະຢັດມັນບໍ່ພຽງແຕ່ບາງເນື້ອໃນທີ່ໄດ້ກ່າວມາຂ້າງເທິງ ມັນຍັງພົວພັນໄປເຖິງຫລາຍປັດໄຈ ເປັນຕົ້ນປະຢັດເງິນ, ປະຢັດເວລາ, ປະຢັດວັດຖຸ, ປະຢັດແຮງງານ ແລະ ອື່ນໆ.

ຄຳວ່າ: ປະຢັດເງິນ ມັນກໍໝາຍວ່າ ບໍ່ຟູມເຟືອຍໃນການຢູ່, ການກິນ, ການໃຊ້, ການຈ່າຍຕ່າງໆເກີນຄວາມເປັນຈິງ, ຕ້ອງຊື້ ແລະ ໃຊ້ໃນສິ່ງທີ່ຈຳເປັນຢ່າງມີຄຸນນະພາບ ແລະ ມີຜົນປະໂຫຍດສູງສຸດ. ຖ້າຈະໃຫ້ຈຳແນກລະອຽດ ປະຢັດເວລາກໍໝາຍເຖິງ ການນຳໃຊ້ເວລາໃຫ້ມີຄຸນຄ່າ, ຖືເອົາເວລາເປັນເງິນເປັນຄຳ, ເຮັດວຽກຕາມທຸ້ມຕາມໂມງ, ໃຊ້ເວລາໜ້ອຍແຕ່ໄດ້ວຽກຫລາຍ, ໜ້າວຽກສິບວັນຊາວວັນໃຫ້ສຳເລັດລົງພຽງຫ້າວັນ ຫລື ສິບວັນ ທັງວ່ອງໄວໄດ້ຄຸນນະພາບ.

ການປະຢັດວັດຖຸແມ່ນການນຳໃຊ້ວັດຖຸທີ່ດີ, ມີຄຸນນະພາບ, ໃຊ້ໄດ້ຍາວນານ ທັງເໝາະກັບດິນຟ້າອາກາດ. ສ່ວນປະຢັດແຮງງານນັ້ນ ກໍໝາຍເຖິງໃຊ້ກຳລັງຄົນເຮັດວຽກໜ້ອຍແຕ່ມີປະສິດທິພາບສູງ, ມີຄຸນນະພາບ, ໃຊ້ຄົນທີ່ມີຄວາມຮູ້ຄວາມສາມາດ, ຄົນດຸໝັ່ນແຂ່ງຂັນກັນເຮັດວຽກຢ່າງຫ້າວຫັນ, ນຳໃຊ້ວິທະຍາສາດ, ວິທະຍາການເຂົ້າໃນການຜະລິດທຸລະກິດສອດຄ່ອງ ແລະ ເໝາະສົມ.

ເມື່ອກ່າວເຖິງບົດຮຽນໃນການປະຢັດປະເທດເພື່ອນບ້ານຂອງພວກເຮົາ ເປັນຕົ້ນ ສສ ຫວຽດນາມ, ປະທານ ໂຮ່ຈີມິນ ຜູ້ນຳທີ່ແສນຮັກຂອງປະຊາຊົນຫວຽດນາມ ແລະ ປະຊາຊົນລາວ ໄດ້ສັ່ງສອນປະຊາຊົນຫວຽດນາມໃຫ້ພາກັນປະຢັດຈົນໄດ້ວາງຄຳຂວັນອອກມາກາຍເປັນພາລະກິດຂອງຊາດວ່າ: “ການປະຢັດ ແມ່ນພາລະກິດຂອງພວກເຮົາ” ມາຮອດຍຸກປັດຈຸບັນ ປະເທດຫວຽດນາມພວມກ້າວຂຶ້ນເປັນປະເທດທີ່ພວມຮັ່ງມີ, ເຂັ້ມແຂງ ແລະ ພັດທະນາກ້າວຂຶ້ນໄປຢ່າງບໍ່ຢຸດຢັ້ງ. ຈາກປັດໄຈນີ້ສ່ວນໜຶ່ງກໍແມ່ນຍ້ອນການປະຢັດມາເປັນເວລາຍາວນານ.

ເຖິງຢ່າງໃດກໍດີ, ຄາດວ່າປະຊາຊົນລາວ ຖ້າຫາກພ້ອມກັນປະຢັດເພື່ອຕົນເອງ ແລະ ປະເທດຊາດບ້ານເມືອງນັບແຕ່ເວລານີ້ເປັນຕົ້ນໄປໃນອະນາຄົດຕໍ່ໜ້າ ຫລື ຍາວນານ ປະເທດຊາດອາດຮັ່ງມີເຂັ້ມແຂງ, ເງິນກີບລາວກໍຈະບໍ່ອ່ອນຄ່າຄືທຸກວັນນີ້, ລາຄານ້ຳມັນກໍອາດບໍ່ຂຶ້ນຄ່າສອກອອກຄ່າວາ,ການພັດທະນາປະເທດຊາດກໍອາດຈະຮັ່ງມີເຂັ້ມແຂງໄວກວ່ານີ້ຕັ້ງຫລາຍເທົ່າ ເພາະພວກເຮົາພາກັນປະຢັດໃນວັນນີ້ກໍຈະສຸກຂີໃນວັນໜ້າ.

- lattana banner - ປະຢັດໃນມື້ນີ້ເພື່ອສຸຂີໃນວັນໜ້າ
-    AD conten website - ປະຢັດໃນມື້ນີ້ເພື່ອສຸຂີໃນວັນໜ້າ
- lattana banner 1 - ປະຢັດໃນມື້ນີ້ເພື່ອສຸຂີໃນວັນໜ້າ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!