ວິປະກອນ ຄະດີສີສຸກດາວເຮືອງ ຖືກຈໍາຄຸກເກືອບ 5 ປີ

- 89777285 71fa 4c42 816d f0f79ad6e1b4 - ວິປະກອນ ຄະດີສີສຸກດາວເຮືອງ ຖືກຈໍາຄຸກເກືອບ 5 ປີ
- AGL - ວິປະກອນ ຄະດີສີສຸກດາວເຮືອງ ຖືກຈໍາຄຸກເກືອບ 5 ປີ

ໜັງສືພິມຄວາມສະຫງົບລາຍງານວັນທີ 11 ພຶດສະພາ 2022 ນີ້ ວ່າ: ຄະນະສານຍາອາ ສານປະຊາຊົນ ນະຄອນຫຼວງວຽງຈັນ ໄດ້ຄົ້ນຄວ້າສໍານວນຄະດີ ໂດຍມີຈໍາເລີຍຊື່ ທ້າວ ວິປະກອນ ຫຼື ລີ່ ອາຍຸ 28 ປີ ຢູ່ບ້ານໂພນທັນ ເມືອງໄຊເສດຖາ ນະຄອນຫຼວງວຽງຈັນ ເຊິ່ງເປັນຈໍາເລີຍທີ 5 ທີ່ກ່ຽວຂ້ອງກັບຄະດີ ທ້າວ ສີສຸກ ຖືກຄະນະສານຕັດສິນລົງໂທດຕັດອິດສະລະພາບຈໍາຄຸກເກືອບ 5 ປີ ພ້ອມທັງປັບໃໝ 10.000.000 ກວ່າກີບ ໃນສະຖານການຄ້າຂາຍອາວຸດເສິກໂດຍບໍ່ຖືກຕ້ອງຕາມກົດໝາຍ.

ຕໍ່ກັບການກະທໍາຜິດຂອງຈໍາເລີຍ 5 ອົງການໄອຍະການປະຊາຊົນ ນະຄອນຫຼວງວຽງຈັນ ໄດ້ຖະແຫຼງໃຫ້ຮູ້ໃນວັນທີ 3 ມີນາຜ່ານມາວ່າ:
ໃນປີ 2015, ທ້າວ ວິປະກອນ ຫຼື ລີ່ ໄດ້ຊື້ປືນສັ້ນຍີ່ຫໍ້ເຊເປ (K54) 1 ກະບອກ ພ້ອມລູກຈຳນວນ 8 ລູກ ນຳຄົນບໍ່ຮູ້ຊື່ ໃນລາຄາ 10.000 ບາດ ຢູ່ແຂວງຈໍາປາສັກ, ພາຍຫຼັງຊື້ມາແລ້ວກໍເອົາໄວ້ກະເປົາພາຍຕິດຕົວໄປນຳຕະຫຼອດ ເພື່ອໄວ້ປ້ອງກັນຕົວ.

ມາຮອດວັນທີ 31 ມີນາ 2017 ເວລາປະມານ 10:00 ໂມງ, ທ້າວ ສີສຸກ (ຈໍາເລີຍ 1) ແລະ ທ້າວ ທົງໄຊ (ຈຳເລີຍ 4) ໄດ້ຂັບຂີ່ລົດແລງໂລເວີສີດໍາ ປ້າຍທະບຽນ ຄອ 9999 ກຳແພງນະຄອນ ມາຮັບຈຳເລີຍຢູ່ເຮືອນ ແລ້ວກໍພາກັນຂັບຂີ່ລົດໄປຮັບເອົາ ທ້າວ ປອນ ເພື່ອເດີນທາງໄປແຂວງຫຼວງພະບາງ, ຈຸດປະສົງແມ່ນໄປທ່ຽວຫຼິ້ນ ແລະ ແຂ່ງເຮືອເຈັດສະກີ້ຢູ່ເຄື່ອນນ້ຳຄານ, ໄປຮອດເວລາ 18:00 ໂມງ ແລ້ວໄປຈອງຫ້ອງພັກຢູ່ໂຮງແຮມອ່າງທອງ. ຈາກນັ້ນ, ກໍພາກັນໄປກິນເຂົ້າຢູ່ຮ້ານອາຫານທີ່ຕິດແມ່ນ້ຳຄານ ແລ້ວກໍພາກັນໄປດື່ມເບຍຕໍ່ຢູ່ໂຮງແຮມຫຼວງພະບາງວິວ ຈົນຮອດເວລາ 1:00 ໂມງ ຂອງວັນທີ 1 ເມສາ 2017 ຈຶ່ງຖືກເຈົ້າໜ້າທີ່ຈັບຕົວພ້ອມດ້ວຍຂອງກາງດັ່ງກ່າວ ມາດໍາເນີນຄະດີຕາມກົດໝາຍ.

ຄະນະສານອາຍາ ສານປະຊາຊົນ ນະຄອນຫຼວງວຽງຈັນ ຍັງໃຫ້ຮູ້ຕື່ມວ່າ:

ການກະທໍາຂອງ ທ້າວ ວິປະກອນ (ຈຳເລີຍ 5)ໄດ້ມີເຈດຕະນາຊື້ປືນສັ້ນຊະນິດເຊເປ (K54) ບໍ່ມີເອກະສານການນຳໃຊ້ຈຳນວນ 1 ກະບອກ ພ້ອມດ້ວຍລູກປືນ ຈຳນວນ 8 ລູກ ນຳຄົນບໍ່ຮູ້ຊື່ ໃນລາຄາ 10.000 ບາດ ແລ້ວເອົາມາຄອບຄອງໄວ້ໂດຍບໍ່ຖືກຕ້ອງຕາມກົດໝາຍ ຕາມຄຳໃຫ້ການຮັບສາລະພາບ ສະບັບລົງວັນທີ 02, 27 ເມສາ 2017 ແລະວັນທີ 27 ມີນາ 2018 ຂອງຈຳເລີຍ 5 ຢູ່ຂັ້ນເຈົ້າໜ້າທີ່ ແລະ ເຫັນວ່າ ເປັນການກະທໍາຜິດຕາມມາດຕາ 77 ວັກ 1 ຂອງກົດໝາຍອາຍາ ສະບັບປີ 2005 ທີ່ລະບຸໄວ້ວ່າ:

ບຸກຄົນໃດຫາກໄດ້ຊື້-ຂາຍອາວຸດເສິກ ຫຼື ວັດຖຸລະເບີດໂດຍບໍ່ຖືກຕ້ອງຕາມກົດໝາຍ ຈະຖືກລົງໂທດຕັດອິດສະລະພາບແຕ່ ຫົກເດືອນ ຫາ ຫ້າປີ ແລະ ຈະຖືກປັບໃໝແຕ່ 1.000.000 ກີບ ຫາ 20.000.000 ກີບ.

ມາດຕາ 77 ວັກ 2 ກໍານົດວ່າ: ໃນກໍລະນີຜູ້ກະທຳຜິດຫາກໄດ້ຖືເອົາການຊື້, ການຂາຍອາວຸດເສິກ ຫຼື ວັດຖຸລະເບີດເປັນອາຈີນ, ມີການຈັດຕັ້ງເປັນກຸ່ມ ຫຼື ໃນກໍລະນີທີ່ໄດ້ຊື້-ຂາຍວັດຖຸດັ່ງກ່າວເປັນຈໍານວນຫຼວງຫຼາຍ ຈະຖືກລົງໂທດຕັດອິດສະລະພາບແຕ່ ຫ້າປີ ຫາ ສິບປີ ແລະ ຈະຖືກປັບໃໝແຕ່ 5.000.000 ກີບ ຫາ 50.000.000 ກີບ.

ມາດຕາ 124 ວັກ 2 ໄດ້ກຳນົດໄວ້ວ່າ: ໃນກໍລະນີທີ່ຜູ້ກະທຳຜິດຫາກໄດ້ເອົາການກະທໍາຜິດໃນສະຖານດັ່ງກ່າວເປັນອາຈີນ, ມີການຈັດຕັ້ງເປັນກຸ່ມ ຫຼື ໃນກໍລະນີທີ່ມີຄວາມເສຍຫາຍຢ່າງຫຼວງຫຼາຍ ຈະຖືກລົງໂທດຕັດອິດສະລະພາບແຕ່ໜຶ່ງປີ ຫາ ສາມປີ ແລະ ຈະຖືກປັບໃໝແຕ່ 500.000 ກີບ ຫາ 5.000.000 ກີບ

ມາດຕາ 161 ວັກ 2 ໄດ້ກຳນົດໄວ້ວ່າ: ບຸກຄົນໃດຫາກຮູ້ວ່າແມ່ນເອກະສານປອມ ແລ້ວຍັງນຳເອົາໄປໃຊ້ ຈະຖືກລົງໂທດຕັດອິດສະລະພາບແຕ່ສາມເດືອນ ຫາ ສອງປີ ແລະ ຈະຖືກປັບໃໝແຕ່ 200.000 ກີບ ຫາ 2.000.000 ກີບ.

ສະນັ້ນ, ເມື່ອສານພິຈາລະນາແລ້ວ ຈຶ່ງເຫັນຄວນລົງໂທດຕັດອິດສະລະພາບ ທ້າວ ວິປະກອນ ຫຼື ລີ່ (ຈໍາເລີຍ 5) ຈໍາຄຸກ 4 ປີ 11 ເດືອນ ແລະ ປັບໃໝ 15.000.000 ກີບ.

- lattana banner 1 - ວິປະກອນ ຄະດີສີສຸກດາວເຮືອງ ຖືກຈໍາຄຸກເກືອບ 5 ປີ
-    AD conten website - ວິປະກອນ ຄະດີສີສຸກດາວເຮືອງ ຖືກຈໍາຄຸກເກືອບ 5 ປີ
- lattana banner - ວິປະກອນ ຄະດີສີສຸກດາວເຮືອງ ຖືກຈໍາຄຸກເກືອບ 5 ປີ
No comments yet! You be the first to comment.

Leave a Reply

Your email address will not be published.

This site uses Akismet to reduce spam. Learn how your comment data is processed.

error: Alert: ເນື້ອຫາຂ່າວມີລິຂະສິດ !!