ທ່ານ ໄບເດນ ໄວ້ອາໄລໃຫ້ຊາວອາເມລິກາ 1 ລ້ານຄົນທີ່ເສຍຊີວິດຈາກໂຄວິດ-19 ເນັ້ນການລະບາດຍັງບໍ່ຈົບ

ຜູ້ນຳອາເມລິກາຮຽກຮ້ອງໃຫ້ທົ່ວໂລກຮ່ວມກັນປ້ອງກັນບໍ່ໃຫ້ເກີດເຊື້ອກາຍພັນຊະນິດຕໍ່ໄປ ຫລັງມີຊາວອາເມລິກາເສຍຊີວິດຈາກໂຄວິດແລ້ວ 1 ລ້ານກວ່າຄົນ.

ວັນທີ 12 ພຶດສະພາ 2022, ສຳນັກຂ່າວຊີເອັນເອັນ (CNN) ລາຍງານກອງປະຊຸມ Global Covid-19 Summit ຄັ້ງທີ 2 ທີ່ອາເມລິກາເປັນເຈົ້າພາບຮ່ວມກັບເຢຍລະມັນ, ອິນໂດເນເຊຍ, ເຊເນກັລ ແລະ ເບລີຊ ເພື່ອສົ່ງເສີມການຮ່ວມມືລະດັບນາໆຊາດໃນການຮັບມືການລະບາດຂອງພະຍາດໂຄວິດ-19.

ປະທານາທິບໍດີ ໂຈ ໄບເດນ ຂອງອາເມລິກາ ໄດ້ຂຶ້ນກ່າວເປີດພິທີວ່າ: “ການລະບາດຍັງບໍ່ຈົບ ມື້ນີ້ເຮົາໄດ້ມາເຖິງຈຸດທີ່ໜ້າເສົ້າສຳລັບອາເມລິກາ ນັ້ນຄືການທີ່ມີຜູ້ເສຍຊີວິດຈາກໂຄວິດ 1 ລ້ານຄົນ ປຽບທຽບໄດ້ກັບຕັ່ງວ່າງ 1 ລ້ານໜ່ວຍອ້ອມໂຕ້ອາຫານຂອງຄອບຄົວ ເຊິ່ງເປັນການສູນເສຍທີ່ບໍ່ອາດທົດແທນໄດ້”.

ຜູ້ນຳອາເມລິກາ ເນັ້ນວ່າ: ທົ່ວໂລກຈະຕ້ອງເລີ່ມເຮັດວຽກຮ່ວມກັນນັບແຕ່ຕອນນີ້ ເພື່ອປ້ອງກັນບໍ່ໃຫ້ເກີດເຊື້ອກາຍພັນຊະນິດຕໍ່ໄປ ແລະ ບໍ່ໃຫ້ເກີດພະຍາດລະບາດຄັ້ງໃໝ່ອີກ. ພ້ອມຮຽກຮ້ອງໃຫ້ສະພາຄອງເກຣດສະໜອງງົບປະມານສຸກເສີນດ້ານໂຄວິດ-19 ເພື່ອປົກປ້ອງຊາວອາເມລິກາ.

ອ້າງອີງ:

https://edition.cnn.com/…/covid-global…/index.html

https://www.whitehouse.gov/…/2nd-global-covid-19…/