ເລື່ອງຍັງບໍ່ທັນຈົບ, ອັພບຣາໂມວິດ ອາດລົ້ມການຊື້ຂາຍ ເຊລຊີ ແລະ ຮຸນແຮງເຖິງຂັ້ນຍຸບທີມຖາວອນ

ເວັບໄຊທາງການຂອງເຊລຊີ ອອກມາຢືນຢັນວ່າ ກຸ່ມທຶນທີ່ນຳໂດຍ ທັອດ ໂບລີ ນັກທຸລະກິດຊາວສະຫະລັດ ອາເມລິກາ ເຈົ້າຂອງຮ່ວມທີມເບສບອລ ແອວເອ ດ໊ອດເຈີ ໃນເມເຈີລີກ ເບສບອລ ສະຫະລັດອາເມິລກາ ເປັນຄົນທີ່ປະສົບຄວາມສຳເລັດໃນການຊື້ສະໂມສອນຮຽບຮ້ອຍ ດ້ວຍມູນຄ່າ 2,500 ລ້ານປອນ ໂດຍມີລັດຖະບານອັງກິດຄວບຄຸມການຊື້ຂາຍຢ່າງໃກ້ຊິດ.

ຫລ້າສຸດ ເລື່ອງລາວຈະຍັງບໍ່ຈົບງ່າຍໆ ເມື່ອລັດຖະບານອັງກິດອອກມາສະແດງຄວາມກັງວົນວ່າ ອາດເຖິງຂັ້ນຕ້ອງຍຸບທີມ ເຊລຊີ ຖາວອນ ເນື່ອງ ໂຣມັນ ອັພບຣໂມວິດ ຈະຍັງບໍ່ພໍໃຈເງື່ອນໄຂຂອງລັດຖະບານອັງກິດ ທີ່ຕ້ອງການເງິນ 1,600 ລ້ານປອນ ທີ່ເສ່ຍຄົນດັງ ເຄີຍໃຫ້ ເຊລຊີ ຢືມເອົາໄວ້.

ຢ້ອນໄປຫລັງການຊື້ຂາຍສຳເລັດ ລັດຖະບານອັງກິດໄດ້ຮຽກຮ້ອງໃຫ້ ເຊລຊີ ນຳເງິນທີ່ໄດ້ຈາກການຂາຍທີມສົ່ງໃຫ້ລັດຖະບານເບິ່ງແຍງ ເພືື່ອນຳເງິນໄປບໍລິຈາກ ຫລື ສົມທົບເຂົ້າກອງທຶນຊ່ວຍເຫລືອຊາວຢູເຄຣນ ທີ່ໄດ້ຮັບຜົນກະທົບຈາກສົງຄາມ, ນອກຈາກນີ້ ລັດຖະບານອັງກິດຍັງຕ້ອງການເງິນ 1,600 ລ້ານປອນ ທີ່ ອັພບຣາໂມວິດ ເຄີຍໃຫ້ ເຊລຊີ ຢືມໄປບໍລິຫານ ໃຫ້ມາຢູ່ພາຍໃຕ້ການເບິ່ງແຍງຂອງລັດຖະບານ ເພາະເງິນດັ່ງກ່າວ ມາຈາກບໍລິສັດຂອງເສດຖີ ຣັສເຊຍເອງ.

ແຫລ່ງຂ່າວຂອງລັດຖະບານ ເປີດເຜີຍວ່າ ເສດຖີ ຣັດເຊຍ ແລະ ທີມງານບໍ່ເຫັນດີກັບເງື່ອນໄຂດັ່ງກ່າວ ເຮັດໃຫ້ເກີດຄວາມກັງວົນວ່າຂໍ້ຕົກລົງການຊື້ຂາຍລະຫວ່າງ ເຊລຊີ ທັອດ ໂບລີ ຈະຖືກຍົກເລີກ ເຊິ່ງຈະເຮັດໃຫ້ ເຊລຊີ ບໍ່ມີສິດທິລົງແຂ່ງຂັນບານເຕະໃນລີກອັງກິດອີກຕໍ່ໄປ ແລະ ຜົນລັບທີ່ຮ້າຍແຮງຂອງເລື່ອງນີ້ກໍຄື ການຍຸບທີມ ເຊລຊີ ຢ່າງຖາວອນ ເນື່ອງຈາກໃບອະນຸຍາດປະກອບການພິເສດຂອງທີມຈະຫມົດອາຍຸໃນວັນທີ 31 ພຶດສະພາທີ່ຈະເຖິງນີ້.