ເອຟເວີຕັນ ພິກນະລົກແຊງ ພາເລດ 3-2 ລອດຕົກຊັ້ນພຣີເມຍລີກຮຽບຮ້ອຍແລ້ວ

ເອຟເວີຕັນ ລອດຕົກຊັ້ນຮຽບຮ້ອຍແລ້ວ ຫລັງເປີດບ້ານພິກນະລົກໄລ່ແຊງ ຄຣິສຕັລ ພາເລດ ແບບສຸດມັນ 3-2.

ການແຂ່ງຂັນພຣີເມຍລີກ ອັງກິດ ນັດຫນີຕາຍ ເມື່ອວັນພະຫັດທີ່ຜ່ານມາ ເອຟເວີຕັນ ພິກຈາກທີ່ຕົກເປັນຮອງກ່ອນ 0-2 ກັບມາເປີດບ້ານເອົາຊະນະ ຄຣິສຕັລ ພາເລດ ແບບສຸດມັນ ບີກຫົວໃຈແຟນບານ 3-2 ເອົາຕົວລອດຈາກການຕົກຊັ້ນໄດ້ແນ່ນອນແລ້ວ.

ເກມນີ້ ເອຟເວີຕັນ ເລີ່ມຕົ້ນບໍ່ດີ ຖືກທີມຢາມຍິງກ່ອນເຖິງ 2-0 ແຕ່ເຄິ່ງຫລັງ ສູ້ສຸດໃຈ ຍິງລວດດຽວ 3 ຫນ່ວຍ ພິກກັບມາແຊງຊະນະໄດ້ຢ່າງເຫລືອເຊື່ອ 3-2.

ຈາກໄຊຊະນະນັດນີ້ ເຮັດໃຫ້ ເອຟເວີຕັນ ມີ 39 ຄະແນນຈາກ 37 ນັດ ຄອງອັນດັບ 16 ເອົາຕົວລອດຈາກການຕົກຊັ້ນໄດ້ແນ່ນອນແລ້ວ ເນື່ອງຈາກມີຄະແນນນຳ ເບີນລີ ທີມອັນດັບ 17 ແລະ ລີດ ຢູໄນເຕັດ ທີມອັນດັບ 18 ຢູ່ 4 ຄະແນນ ຂະນະທີ່ເຫລືອການແຂ່ງຂັນອີກພຽງ 1 ນັດເທົ່ານັ້ນ.