WHO ລາຍງານ ພົບຜູ້ຕິດເຊື້ອຝີຕຸ່ມລີງແລ້ວຢ່າງໜ້ອຍ 80 ຄົນ ໃນ 11 ປະເທດທົ່ວໂລກ
ວັນທີ 20 ພຶດສະພາ 2022, ອົງການອະນາໄມໂລກ (WHO) ລາຍງານ ພົບຜູ້ຕິດເຊື້ອຝີຕຸ່ມລີງ (Monkeypok) ແລ້ວຢ່າງໜ້ອຍ 80 ຄົນ ໃນ 11 ປະເທດທົ່ວໂລກ ເຊິ່ງໃນຈຳນວນນີ້ລວມອິຕາລີ, ສະວີເດນ, ແອັສປາຍ, ປອກຕຸຍການ, ອາເມລິກາ, ການາດາ, ອົດສະຕຣາລີ ແລະ ອັງກິດ. ອີກທັງຍັງມີຜູ້ຕິດເຊື້ອອີກປະມານ 50 ຄົນ ທີ່ກຳລັງເຝົ້າສັງເກດອາການຢູ່.
ໂດຍທົ່ວໄປແລ້ວ ພະຍາດຝີຕຸ່ມລີງມັກພົບຜູ້ຕິດເຊື້ອຢູ່ໃນພື້ນທີ່ຫ່າງໄກຂອງອາຟຣິກາກາງ ແລະ ອາຟຣິກາຕາເວັນຕົກ, ເປັນເຊື້ອໄວຣັສທີ່ບໍ່ຄ່ອຍພົບໃນມະນຸດ, ແຕ່ສາມາດແພ່ກະຈາຍຜ່ານການຕິດຕໍ່ສຳຜັດລະຫວ່າງມະນຸດ ແລະ ສັດ ແລະ ລະຫວ່າງມະນຸດນຳກັນເອງຈາກການສຳຜັດໃກ້ຊິດ ເຊິ່ງຄວາມສ່ຽງໃນການແພ່ກະຈາຍເຊື້ອຢູ່ໃນລະດັບຕໍ່າທີ່ສຸດ.
ອາການຂອງພະຍາດທີ່ພົບເລື້ອຍ ໄດ້ແກ່ ເປັນໄຂ້, ປວດກ້າມຊີ້ນ, ປວດຫົວ, ຕ່ອມນ້ຳເຫລືອງບວມ, ເມື່ອຍ ແລະ ມີອາການທາງຜິວໜັງເຊັ່ນ: ຕຸ່ມໂພງ ເຊິ່ງສ່ວນຫລາຍມັກຈະເຊົາໄດ້ພາຍໃນບໍ່ເທົ່າໃດອາທິດ. ເບື້ອງຕົ້ນຍັງບໍ່ມີວັກຊີນທີ່ສັກເພື່ອປ້ອງກັນ ຫລື ປິ່ນປົວພະຍາດຝີຕຸ່ມລີງໂດຍສະເພາະ.
WHO ຄາດຈຳນວນຜູ້ຕິດເຊື້ອພະຍາດຝີຕຸ່ມລີງອາດເພີ່ມສູງຂຶ້ນອີກ ແນະນຳໃຫ້ເຝົ້າຕິດຕາມພັດທະນາການຂອງພະຍາດຢ່າງໃກ້ຊິດ.
ອ້າງອີງ:
- https://www.who.int/news/item/20-05-2022-who-working-closely-with-countries-responding-to-monkeypox
- https://www.bbc.com/news/health-61532083
- https://www.cnbc.com/2022/05/20/world-health-organization-confirms-80-cases-of-monkeypox-with-outbreaks-in-11-countries.html
