ຕາລີບັນມີຄຳສັ່ງ ຜູ້ອ່ານຂ່າວຍິງ ຕ້ອງໃສ່ຜ້າຄຸມປິດບັງໃບໜ້າ ເວລາອອກອາກາດ
ວັນທີ 22 ພຶດສະພາ 2022, ລັດຖະບານຕາລີບັນຂອງອັບການິດສະຖານມີຄຳສັ່ງໃຫ້ຜູ້ອ່ານຂ່າວຍິງຕ້ອງໃສ່ຜ້າຄຸມປິດບັງໃບໜ້າເວລາອອກອາກາດ ເຊິ່ງຄຳສັ່ງດັ່ງກ່າວມີຂຶ້ນນັບແຕ່ວັນທີ 19 ພຶດສະພາຜ່ານມາ, ແຕ່ມີຜູ້ອ່ານຂ່າວພຽງບໍ່ເທົ່າໃດສຳນັກເທົ່ານັ້ນທີ່ປະຕິບັດຕາມ ກ່ອນທີ່ກຸ່ມຕາລີບັນຈະບັງຄັບໃຊ້ກົດດັ່ງກ່າວຢ່າງຈິງຈັງ.
ທາງດ້ານກະຊວງວັດທະນະທຳ ແລະ ຂໍ້ມູນຂ່າວສານລະບຸ ນະໂຍບາຍດັ່ງກ່າວຖືເປັນຈຸດສິ້ນສຸດ ແລະ ບໍ່ສາມາດຕໍ່ລອງໄດ້. ຂະນະທີ່ຜູ້ອ່ານຂ່າວຍິງຈຳນວນຫລາຍຮູ້ສຶກບໍ່ສະບາຍໃຈ. ອີກທັງຍັງລະບຸວ່າ: ຄຳສັ່ງດັ່ງກ່າວເປັນສິ່ງທີ່ບໍ່ສາມາດຄາດເດົາໄດ້ ແລະ ສາສະໜາອິດສະລາມບໍ່ໄດ້ບັງຄັບໃຊ້ເຮົາຕ້ອງປິດບັງໃບໜ້າ.
ນອກຈາກນີ້, ຕາລີບັນຍັງຊີ້ວ່າ: ພຣີເຊັນເຕີຜູ້ຍິງໃນອັບການິດສະຖານເອງກໍຄວນໃສ່ຜ້າປິດປາກ. ຂໍ້ບັງຄັບຕ່າງໆທີ່ບັງຄັບໃຊ້ກັບຜູ້ຍິງອັບການິດສະຖານເລີ່ມບັນທອນສິດ ແລະ ເສລີພາບໃນການໃຊ້ຊີວິດຂອງພວກນາງໃນປະເທດແຫ່ງນີ້ ນັບແຕ່ກຸ່ມຕາລີບັນບຸກຍຶດນະຄອນຫລວງກາບູນ ຢຶດອຳນາດປະທານາທິບໍດີ ແລະ ຄະນະລັດຖະບານຊຸດເກົ່າລົງ ພາຍຫລັງກອງທັບອາເມລິກາຕັດສິນໃຈຖອນທັບອອກຈາກອັບການິດສະຖານໃນທ້າຍເດືອນສິງຫາ 2021.
ໜຶ່ງໃນຜູ້ຍິງອັບການິດສະຖານທີ່ໄດ້ຮັບຜົນກະທົບເຜີຍວ່າ: “ຖ້າຄຳສັ່ງເຫລົ່ານີ້ຖືກບັງຄັບໃຊ້ ຜູ້ຍິງທົ່ວອັບການິດສະຖານຈະຖືກຕັດສິດຕ່າງໆຫລາຍປະການ ຄືເຫັນໃນຕອນນີ້ ຜູ້ຍິງອັບການິດສະຖານກຳລັງຄ່ອຍໆຖືກຈຳກັດສິດຂອງຕົນເພີ່ມຂຶ້ນ”.
ກ່ອນໜ້ານີ້ ກຸ່ມຕາລີບັນກ້າວຂຶ້ນມາປົກຄອງ ແລະ ບໍລິຫານປະເທດໃນໄລຍະປີ 1996-2001 ຖືເປັນຍຸກມືດຂອງບັນດາຜູ້ຍິງ ແລະ ເດັກນ້ອຍຜູ້ຍິງ, ພວກນາງຖືກຈຳກັດສິດ ແລະ ພື້ນທີ່ໃນການໃຊ້ຊີວິດ ໂດຍສະເພາະໃນມິຕິຂອງການສຶກສາ ແລະ ການໃຊ້ຊີວິດໃນພື້ນທີ່ສາທາລະນະ.
ທາງດ້ານ ຟາວຊອຍ ໂຄຟີ ອະດີດຮອງປະທານລັດຖະສະພາອັບການິດສະຖານ ຊີ້ໃຫ້ເຫັນເຖິງຄວາມພະຍາຍາມໃນການຈຳກັດສິດເສລີພາບ ແລະ ພື້ນທີ່ຂອງຜູ້ຍິງໃນອັບການິດສະຖານ. ການອອກກົດຂໍ້ບັງຄັບເຫລົ່ານີ້ສ່ວນໜຶ່ງເປັນໄປເພື່ອໃຫ້ຄວາມສົນໃຈຂອງສາທາລະນະຊົນມຸ້ງເປົ້າໃສ່ບັນຫາດ້ານການຈຳກັດສິດທີ່ເກີດຂຶ້ນ ຫັນເຫໄປຈາກບັນຫາຫລັກບັນຫາສຳຄັນ ຄືບັນຫາປາກທ້ອງ, ບັນຫາເສດຖະກິດ ທີ່ຕາລີບັນເອງບໍ່ສາມາດຈະແກ້ໄຂບັນຫາເຫລົ່ານີ້ໄດ້.
ອ້າງອີງ:
- https://www.aljazeera.com/news/2022/5/22/afghan-women-tv-anchors-forced-to-cover-faces-under-taliban-order
- https://www.theguardian.com/world/2022/may/22/taliban-enforce-face-coverings-afghanistan-female-tv-news-presenters
· https://www.politico.com/news/2022/05/22/afghanistan-taliban-women-face-covers-00034264
