ຫາຄວາມທ້າທາຍໃຫມ່, ມາເນ ຕັ້ງເປົ້າອຳລາ ລີເວີພູລ-ກຽມຍ້າຍໄປບາເຢິນ ມິວນິກ ລະດູການນີ້

ສື່ເຢຍລະມັນລາຍງານວ່າ ຊາດີໂອ ມາເນ ກອງຫນ້າລີເວີພູລ ມີຄວາມສົນໃຈຍ້າຍໄປຮ່ວມທີມ ບາເຢິນ ມິວນິກ ທີມໃຫຍ່ແຫ່ງບຸນເດສລີກາ ໃນລະດູການນີ້ເພື່ອຫາຄວາມທ້າທາຍໃຫມ່ໃນອາຊີບນັກເຕະ.

ສຳລັບ ມາເນ ເຫລືອສັນຍາກັບ ລີເວີພູລ ຢູ່ເຖິງປີ 2023 ແຕ່ຍັງບໍ່ມີການເຈລະຈາເລື່ອງການຍ້າຍອອກໄປແຕ່ຢ່າງໃດ ທ່າມກາງຂ່າວລືວ່າດາວເຕະອາຍຸ 30 ປີລາຍນີ້ກຽມຍ້າຍສັງກັດ.

ໂດຍ ມາເນ ໄດ້ອອກມາໃຫ້ສຳພາດເຖິງອະນາຄົດກັບລີເວີພູລວ່າ : ຈະໃຫ້ຄຳຕອບໃນເລື່ອງດັ່ງກ່າວຫລັງຈາກຈົບການແຂ່ງຂັນ ຢູຟາ ແຊ໊ມປຽນ ລີກ ຮອບຊີງຊະນະເລີດກັບ ຣຽວ ມາດຣິດ ວັນທີ 28 ພຶດສະພານີ້.

ຫລ້າສຸດສື່ໃນເຢຍລະມັນເປີດເຜີຍວ່າ : ມາເນ ມີຄວາມຕັ້ງໃຈຢ່າງຫລາຍໃນການຍ້າຍໄປຢູ່ກັບ ບາເຢິນ ມິວນິກ ໃນໄລຍະລະດູການນີ້ ເນື່ອງຈາກຕ້ອງການຄວາມທ້າທາຍໃຫມ່ຫລັງຫລິ້ນໃຫ້ກັບ ລີເວີພູລ ມາເຖິງ 6 ປີ.